İQTİSADİYYAT


Azərbaycan “Qastronomik Böyük İpək yolları” beynəlxalq forumunda təmsil olunacaq

Bakı, 22 iyun, AZƏRTAC

Dünya Turizm Təşkilatının (DTT) dəstəyi ilə iyulun 7-dən 9-dək Rusiya Federasiyasının Həştərxan vilayətində birinci “Qastronomik Böyük İpək yolları. Ləzzətli səyahət, Həştərxan-2017” forum-festivalı keçiriləcək.

AZƏRTAC Rusiyanın “Qlas naroda” internet qəzetinə istinadla xəbər verir ki, festivalda DTT-nin “İpək Yolu” proqramının iştirakçısı olan ölkələrdən və regionlardan, o cümlədən Azərbaycan, Yunanıstan, İran, İspaniya, Qazaxıstan, Çin, Rusiya, Özbəkistan və digər ölkələrdən turizm biznesinin nümayəndələri, restoran və otel işçiləri, baş aşpazlar, ərzaq məhsulları və içki istehsalçıları, elm və mədəniyyət xadimləri, marketinq və reklam sahəsində mütəxəssislər, Rusiya və digər ölkələrin KİV-ləri iştirak edəcəklər.

Forum-festival çərçivəsində Rusiyadan və digər ölkələrdən tanınmış baş aşpazlar iyulun 4-dən başlayaraq Həştərxan restoranlarında ustad dərsləri keçəcəklər. Forumun işgüzar proqramına Rusiya və digər ölkələrdən məruzəçilərin çıxış edəcəkləri plenar iclaslar, “dəyirmi masa”lar, Rusiya regionlarının və “İpək Yolu” proqramının iştirakçı ölkələrinin qastronomik turizm marşrutlarının sərgisi, xüsusi qastronomik nahar və şam yeməkləri və s. daxildir. Tədbir “Balıqçı günü” festivalı ilə başa çatacaq.

Forum-festival DTT-nin “İpək Yolu” proqramının və onun enoqastronomik tərkib hissəsinin inkişafında marağı olan bütün iştirakçılar arasında birbaşa əlaqələrin qurulması üçün rahat platforma olacaq.

1994-cü ildən DTT Böyük İpək Yolu marşrutlarında - Şərqi Asiya ilə Aralıq dənizini birləşdirən ən qədim karvan yolunda turizmi inkişaf etdirməyə başlayıb. On doqquz ölkə “dünyada mədəni baxımdan ən cəlbedici turizm istiqamətlərindən biri kimi bu əfsanəvi yolların dinc vasitələrlə və səmərəli dirçəldilməsi” üçün DTT-nin təşəbbüsünə qoşulub. Zaman keçdikcə, “İpək Yolu” proqramının iştirakçılarının sayı Asiya, Afrika və Avropadan ölkələr olmaqla 33-ə çatıb.

2016-2017-ci illərdə proqramın reallaşdırılması üzrə fəaliyyət çərçivəsində “Qastronomik Böyük İpək yolları” beynəlxalq layihəsinə başlamaq barədə qərar qəbul edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.