İQTİSADİYYAT


Azərbaycan Respublikası Maliyyə Nazirliyində geniş kollegiya iclası keçirilib

Bakı, 19 iyul, AZƏRTAC

İyulun 19-da Azərbaycan Respublikası Maliyyə Nazirliyində Nazirlər Kabinetinin 2017-ci ilin birinci yarısının sosial-iqtisadi yekunlarına və qarşıda duran vəzifələrə həsr olunmuş iclasında Azərbaycan Respublikasının Prezidenti İlham Əliyevin verdiyi tapşırıqlara, 2017-ci ilin birinci yarısında dövlət büdcəsinin icrasının gedişi və 2018-ci il dövlət və icmal büdcə layihələrinin və sonrakı üç il üçün icmal büdcə göstəricilərinin müzakirəsinə və qarşıda duran digər vəzifələrə həsr olunmuş geniş kollegiya iclası keçirilib.

Maliyyə Nazirliyinin mətbuat xidmətindən AZƏRTAC-a bildirilib ki, nazirliyin struktur bölmələrinin və tabeliyindəki qurumların rəhbərlərinin iştirakı ilə keçirilən kollegiya iclasında maliyyə naziri, kollegiyanın sədri Samir Şərifov 2017-ci ilin ilk altı ayının sosial-iqtisadi yekunlarından bəhs edib, ötən dövr ərzində aparılmış makroiqtisadi siyasətin nəticəsi olaraq ölkədə məzənnə sabitliyinin bərpa olunduğunu, qeyri-neft ixracı, habelə strateji valyuta aktivlərinin artdığını, eyni zamanda, ümumi daxili məhsulun azalma templərinin səngidiyini qeyd edib.

Qeyd olunub ki, Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında dövlət başçısı hökumətin gələcək fəaliyyətində prioritet istiqamətin dəyişmədiyini vurğulayıb, qeyri-neft sektorunun, xüsusilə də sənaye və kənd təsərrüfatının aparıcı sahələrinin inkişafı, iqtisadiyyatın səmərəliliyi və dayanıqlılığının təmin edilməsi, bölgələrə investisiyaların cəlb edilməsinə dair mərkəzi və yerli icra orqanları qarşısında mühüm vəzifələr qoyub.

2017-ci ilin ilk 6 ayında dövlət büdcəsinin vəsaiti hesabına əsas dövlət vəzifələrinin yerinə yetirildiyini, əməkhaqqı, müavinət, pensiya və digər sosial xərclərin, həmçinin dövlət borcu üzrə öhdəliklər və digər zəruri xərclərin tam və vaxtında maliyyələşdirildiyini qeyd edən S.Şərifov ilin ikinci yarısında da sosial müavinətlər, maaş, pensiya, təqaüd və digər bütün sosial ödənişlərin vaxtı-vaxtında maliyyələşdirilməsinin təmin olunacağını vurğulayıb.

İclasda bildirilib ki, ilin ilk 6 ayında bütün dövlət proqramlarının və layihələrin uğurla icrasına, investisiya proqramında elm, təhsil, səhiyyə, sosial təminat obyektlərini özündə birləşdirən sosial layihələrin, elektrik enerjisi və təbii qaz təchizatı, içməli su və kanalizasiya sistemlərinin yaradılması, magistral yolların çəkilişi, kənd yollarının yenidən qurulması və yeni yolların inşası, meliorasiya və irriqasiya tədbirlərinin genişləndirilməsi işlərinin ahəngdar maliyyələşdirilməsinə nail olunub.

İlin birinci yarısında dövlət büdcəsinin icrası vəziyyəti ilə əlaqədar qeyd edilib ki, bütövlükdə 6 ayda icmal büdcənin gəlirləri 11,6 milyard manat və ya 2016-cı ilin eyni dövrü ilə müqayisədə 25,3 faiz, xərcləri isə 11,5 milyard manat və ya 2016-cı ilin eyni dövrü ilə müqayisədə 25,9 faiz çox icra edilib. Dövlət büdcəsinin mədaxili isə 7,7 milyard manat və ya 102,3 faiz, xərcləri isə 8,2 milyard manat və ya 100 faiz icra edilib.

2017-ci ildə Maliyyə Nazirliyinin qarşısında duran vəzifələr arasında 2018-ci il dövlət və icmal büdcə layihələrinin və sonrakı üç il üçün icmal büdcə göstəricilərinin vaxtında və keyfiyyətlə hazırlanması və “Büdcə sistemi haqqında” Azərbaycan Respublikasının Qanununda qoyulmuş tarixlərə uyğun olaraq aidiyyəti üzrə təqdim edilməsi ilə bağlı işlərin təşkilinin vacibliyi xüsusilə vurğulanıb.

Təsdiq edilmiş Tədbirlər Planına uyğun olaraq təşkilatlar üzrə sifarişlərin və gəlirlər üzrə proqnozların Nazirliyə daxil olduğunu nəzərə alaraq aidiyyəti struktur bölmələrə, dövlət xidmət və agentliklərə 2018-ci il dövlət və icmal büdcə layihələri və sonrakı üç il üçün icmal büdcə göstəricilərinin tərtibi işlərinin sürətləndirilməsi ilə bağlı müvafiq tapşırıqlar verilib.

2018-ci il dövlət büdcəsinin gəlirlərinin təmin olunması ilə bağlı qarşıda duran vəzifələr kimi qeyri-neft gəlirlərinin qeyri-neft ümumi daxili məhsulda və büdcə gəlirlərində xüsusi çəkisinin və vergi daxilolmalarının yığım əmsalının artırılması, vergi borclarının ləğv edilməsi və vergidən yayınmaların qarşısının alınması istiqamətində tədbirlərin gücləndirilməsi, respublikanın şəhər və rayonlarının yerli gəlir və xərclərinin tarazlaşdırılması istiqamətində işlərin davam etdirilməsi, dövlət büdcəsi layihəsinin tərtibi prosesinin və xərclərinin strukturunun təkmilləşdirilməsi, səmərəliliyinin və ünvanlılığının təmin edilməsi, xərcləri optimallaşdırmaqla orta və uzunmüddətli dövrləri əhatə edən proqramlar əsasında büdcə tərtibinin daha da genişləndirilməsi qeyd edilib.

Kollegiya iclasında Azərbaycan Respublikasında 2018-ci il və sonrakı üç il üçün makro-fiskal çərçivə və “Azərbaycan Respublikasının 2017-ci il dövlət büdcəsi haqqında” Azərbaycan Respublikası Qanununun tətbiqi barədə Azərbaycan Respublikası Prezidentinin 27 dekabr 2016-cı il 1180 nömrəli Fərmanına müvafiq olaraq Maliyyə Nazirliyinə tapşırılmış fiskal dayanıqlılığın gücləndirilməsi məqsədilə yeni büdcə qaydasının, dövlət borc siyasəti strategiyasının və ortamüddətli xərclər çərçivəsi və nəticəəsaslı büdcə tərtibi mexanizmi ilə bağlı təkliflərin hazırlanması barədə maliyyə nazirinin müavini Emin Hüseynovun məruzəsi dinlənilib.

Bildirilib ki, Maliyyə Nazirliyi qarşısında qoyulmuş tapşırıqlara uyğun olaraq beynəlxalq təcrübə və milli iqtisadiyyatın xüsusiyyətləri nəzərə alınmaqla büdcə qaydalarının tətbiqi ilə bağlı normativ-hüquqi aktların və dövlət borcunun idarəedilməsi üzrə orta və uzunmüddətli strategiya sənədinin layihələri, habelə ortamüddətli xərclər çərçivəsi və nəticəəsaslı büdcə mexanizminin formalaşdırılmasına dair təkliflər hazırlanmışdır. Kollegiya iclasında hazırlanmış sənədlərin nəzərə alınması və qısa müddət ərzində Azərbaycan Respublikasının Maliyyə Sabitliyi Şurası və Nazirlər Kabinetinə təqdim edilməsi barədə qərar qəbul edilib.

İclasda, həmçinin “2017-ci ilin birinci yarısında dövlət büdcəsinin icrasının gedişi haqqında” və “Dövlət gəlirlərinin proqnozlaşdırılması və modelləşdirilməsi metodologiyası”nda dəyişikliklər edilməsi haqqında” məruzələr dinlənilib, müzakirələrdən sonra müvafiq qərarlar qəbul edilib.

Sonra Azərbaycan Respublikasında uzun müddət dövlət qulluğunda səmərəli fəaliyyət göstərdiklərinə görə Azərbaycan Respublikası Prezidentinin Sərəncamı ilə “Dövlət qulluğunda fərqlənməyə görə” medalı ilə təltif olunmuş Maliyyə Nazirliyinin 8 nəfər əməkdaşına medallar təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.