Azərbaycan Standartlaşdırma İnstitutu rəsmi loqotipinin hazırlanması ilə bağlı müsabiqə elan edib
Bakı, 21 dekabr, AZƏRTAC
“Azərbaycan Standartlaşdırma İnstitutu” publik hüquqi şəxs korporativ loqotipin hazırlanması ilə əlaqədar müsabiqə elan edib.
Standartlaşdırma, Metrologiya və Patent üzrə Dövlət Komitəsinin mətbuat xidmətindən AZƏRTAC-a bildirilib ki, korporativ loqonun dizaynı özündə institutun fəaliyyəti, strategiya və missiyasına dair elementləri əks etdirməli, loqo rəngli və konseptual görünüşlü olmalıdır.
Məlumata əsasən, institut Azərbaycan Respublikasının milli standartlaşdırma qurumudur və onun əsas fəaliyyət istiqamətləri milli standartların hazırlanması, tətbiqi, bu sahədə beynəlxalq təşkilatlarda təmsilçilik, habelə standartların tətbiqi ilə bağlı əlaqəli xidmətlərin həyata keçirilməsindən ibarətdir. İnstitut, həmçinin texniki tənzimləmə, standartlaşdırma və uyğunluğun qiymətləndirilməsi sahəsi üzrə vahid dövlət siyasətinin formalaşdırılması, həyata keçirilməsi və sahənin inkişafının təmin edilməsi üçün təkliflər verir.
Müsabiqədə yalnız indiyə qədər istifadə edilməyən və hər hansı digər loqotiplərin elementlərini təkrarlamayan həllər iştirak edə bilər. Loqo dizaynlarına müvafiq komissiya tərəfindən baxıldıqdan sonra qalib elan olunacaq.
Layihə təklifləri 2018-ci il yanvarın 22-dək [email protected] elektron poçtuna və ya institutun inzibati binasına göndərilə bilər.
Bölmənin digər xəbərləri
