Kiyev, 17 dekabr, AZƏRTAC

Dekabrın 17-də ölkəmizin Xarkovdakı fəxri konsulluğunun binasında keçirilən mətbuat konfransı Azərbaycan-Ukrayna ikitərəfli regionlararası əməkdaşlığının daha da inkişaf etdirilməsi və dərinləşdirilməsi, Xarkov vilayəti sənayeçilərinin və sahibkarlarının bir qrupunun Bakıya səfəri məsələlərinə həsr olunub.

Azərbaycanın Xarkovdakı fəxri konsulu Əfqan Salmanov qeyd edib ki, bugünkü mətbuat konfransı rəmzi xarakter daşıyır. Belə ki, o, Dünya Azərbaycanlılarının Həmrəyliyi Günü ilə əlaqədar bu gün N.Lısenko adına Xarkov Milli Akademik Opera və Balet Teatrında keçiriləcək gecə ərəfəsində təşkil olunub. Ə.Salmanov Xarkov vilayəti sənayeçilərinin və sahibkarlarının bir qrupunun Bakıya səfərə hazırlaşmasından, habelə onların azərbaycanlı həmkarlarının və tərəfdaşlarının Xarkov vilayətinə səfərinin təşkili layihəsindən danışıb.

Azərbaycanın Ukraynadakı səfiri Eynulla Mədətli çıxış edərək bildirib ki, Xarkovda ölkəmizin fəxri konsulluğunun açılması ilə Azərbaycan-Ukrayna strateji tərəfdaşlığının mühüm tərkib hissəsi kimi regionlararası əməkdaşlığın inkişafına böyük təkan verilib. Səfir əmin edib ki, bütün kreativ layihələrində Əfqan Salmanovu hər vasitə ilə dəstəkləyəcək və ona kömək göstərəcəkdir. Diplomat həmçinin Ukrayna Ali Radasının (AR) xalq deputatı Oleq Medunitsanı Ukrayna AR-nin Azərbaycan Milli Məclisi ilə Dostluq Qrupunun rəhbəri seçilməsi münasibətilə təbrik edib.

Oleq Medunitsa da öz növbəsində qeyd edib ki, bu, yeni seçilmiş Ukrayna parlamentində yaradılan ilk parlamentlərarası dostluq qrupudur. Bu qrupda xalq deputatlarının siyasi iradəsi və parlamentlərarası əməkdaşlığı genişləndirmək əzmi güclüdür.

Xarkov Vilayət Şurasının sədri Sergey Çernov, Türkiyənin Xarkovdakı fəxri konsulu Vladimir Belıy, Azərbaycan xalqının ulu öndəri Heydər Əliyev və Prezident İlham Əliyev ilə tanış olmaq şərəfinə nail olmuş Ukraynanın keçmiş xalq deputatı Vladimir Zaplatinski bütün sahələrdə Azərbaycanın tərəqqisindən, Azərbaycan ilə Ukraynanın dostluq münasibətlərindən, regionlararası əməkdaşlığı daha yüksək səviyyəyə qaldırmaq istəyindən danışıb, Azərbaycanın Xarkovdakı fəxri konsulunun fəaliyyətini yüksək qiymətləndiriblər.

Xarkov Vilayət Dövlət Administrasiyasının İqtisadiyyat və beynəlxalq münasibətlər departamentinin direktoru Viktor Kovalenko isə yaxın günlərdə vilayət sahibkarlarının böyük bir qrupunun Bakıya işgüzar səfərə yollanmağa hazır olmasından, Xarkov vilayətindəki ən böyük müəssisələrin iqtisadi əlaqələrə, xüsusən Sumqayıt ilə əlaqələrə maraq göstərməsindən söhbət açıb, vilayətin ali məktəblərində təqribən üç min azərbaycanlı tələbənin təhsil aldığını, ali məktəblərarası mübadiləni genişləndirmək arzusunda olduğunu bildirib.

Mətbuat konfransının sonunda iştirakçılar jurnalistlərin çoxsaylı suallarına cavab veriblər.

Zeynal Ağazadə

AZƏRTAC-ın xüsusi müxbiri

Kiyev