Bakı, 26 may, AZƏRTAC

28 May - Respublika Günü münasibətilə Dövlət Miqrasiya Xidmətində (DMX) tədbir keçirilib.

DMX-dən AZƏRTAC-a bildiriblər ki, dövlət himninin ifası ilə başlayan tədbirdə DMX rəisinin birinci müavini Vəli Nağıyev Azərbaycan Xalq Cümhuriyyətinin yaranmasından, ölkəmizin dövlət müstəqilliyinin tarixindən danışıb. O, Şərqdə ilk demokratik respublikanın Azərbaycanda qurulmasının tarixi əhəmiyyətindən, Azərbaycan Xalq Cümhuriyyətinin qısa müddətdə gördüyü mühüm işlərdən bəhs edib.

Bildirilib ki, Azərbaycan Prezidenti İlham Əliyevin Azərbaycan Xalq Cümhuriyyətinin 100 illik yubileyinin keçirilməsi haqqında imzaladığı Sərəncamda əksini tapdığı kimi, qədim və zəngin dövlətçilik ənənələrinə malik Azərbaycan xalqı keçmişinin müəyyən dövrlərində tarixin hökmü ilə böyük imperiyalar tərkibinə qatılmaq məcburiyyətində qalıb. Xalq Cümhuriyyəti məhz dünyanın siyasi nizamının yenidən qurulduğu bir vaxtda - XIX əsrin sonu və XX əsrin əvvəllərində Azərbaycanın yaşadığı parlaq mədəni yüksəliş mərhələsinin məntiqi yekunu kimi meydana çıxıb. İstiqlal Bəyannaməsinin elan olunduğu gün isə Azərbaycan tarixinə parlaq bir səhifə kimi qızıl hərflərlə yazılıb.

Qeyd edilib ki, XX əsrin sonunda dövlət müstəqilliyini bərpa edən Azərbaycan Ermənistanın hərbi təcavüzü, ciddi iqtisadi böhran və daxili hərc-mərclik ilə üzləşib. Yalnız ümummilli lider Heydər Əliyevin Azərbaycanda siyasi hakimiyyətə qayıdışı ilə ölkənin üzərini alan təhlükələrin qarşısı alınıb, qısa müddətdə Azərbaycan düzgün müəyyənləşdirilmiş strategiya əsasında siyasi və iqtisadi inkişaf mərhələsinə qədəm qoyub. Hazırda bu strateji xətt Prezident İlham Əliyevin rəhbərliyi ilə uğurla davam etdirilir. Azərbaycan həm qonşu dövlətlər, həm də region ölkələri üçün etibarlı tərəfdaşa və təhlükəsizlik təminatçısına çevrilib. Son illər Prezident İlham Əliyevin uğurlu siyasəti nəticəsində ölkəmiz çox böyük nailiyyətlər əldə edib, bu gün ölkəmizin iştirakı ilə regional və beynəlxalq səviyyədə əhəmiyyətli layihələr həyata keçirilməkdədir.

Vurğulanıb ki, Cümhuriyyətin 99-cu ildönümünü Avropa və Şərq dəyərlərini özündə birləşdirən müasir müstəqil Vətənimizin bir sıra uğurlara imza atdığı tarixi bir dövrdə qeyd edirik. Bakı böyük təntənə ilə IV İslam Həmrəyliyi Oyunlarına ev sahibliyi edib. Dövlətimizin diqqət və qayğısı ilə yetişmiş güclü Azərbaycan gəncliyi bu yarışların mükafatlarına sahib olmaqla ilk dəfə 1918-ci ildə yüksələn üç rəngli, ay-ulduzlu bayrağımızı dəfələrlə göylərə yüksəldiblər. Həm Azərbaycanın iqtisadi inkişafı, həm turizm potensialı, həm də belə qlobal miqyaslı tədbirlər ilə bağlı Azərbaycana səfər edən xarici qonaqların və Dövlət Miqrasiya Xidmətinə müraciət edənlərin də sayının artdığına toxunulub. Dövlətimizin başçısının diqqət və qayğısı ilə əhatə olunmuş DMX-nin ölkəmizə təşrif buyuran əcnəbilərə və vətəndaşlığı olmayan şəxslərə yüksək keyfiyyətlə, operativ xidmət göstərməsi üçün hər cür şərait yaradıldığı bildirilib.

Tədbir sənədli filmin nümayişi ilə başa çatıb.