SİYASƏT


Azərbaycan Xalq Cümhuriyyətinin yaradılmasının 99-cu ildönümü Kişineuda da qeyd olunub

Bakı, 31 may, AZƏRTAC

Kişineu şəhərində 28 May - Respublika Gününə və Azərbaycan ilə Moldova arasında diplomatik münasibətlərin qurulmasının 25 illiyinə həsr olunan qəbul keçirilib.

Tədbirdə Moldovanın yüksək rütbəli dövlət rəsmiləri, o cümlədən bu ölkənin hakim partiyasının sədri Vlad Plaxotnyuk, iqtisadiyyat, ədliyyə, səhiyyə, mədəniyyət, əmək və sosial müdafiə nazirləri, Moldova parlamentinin birinci vitse-spikeri və deputatları, Kişineuda akkreditə olunan səfirliklərin və beynəlxalq təşkilatların rəhbərləri və əməkdaşları, tanınmış siyasi və ictimai xadimlər, yerli media strukturlarının rəhbərləri, Azərbaycan diasporunun üzvləri, ölkənin aparıcı iş adamları və digər qonaqlar iştirak ediblər.

Səfirlikdən AZƏRTAC-a bildirilib ki, əvvəlcə Azərbaycanın və Moldovanın dövlət himnləri səsləndirilib. Azərbaycanın tarixi-mədəni abidələrini, təbii mənzərələrini, adət-ənənələrini, ölkəmizin müxtəlif sahələrdə əldə olunmuş nailiyyətlərini əks etdirən film göstərilib.

Azərbaycanın Moldovadakı səfiri Qüdsi Osmanov tədbirdə çıxış edərək müasir Azərbaycanın beynəlxalq arenada qazandığı nailiyyətlərdən söz açıb. O, həmçinin Azərbaycanın regionun aparıcı dövlətinə çevrilməsi, ölkədə hərtərəfli inkişafın, stabilliyin bərqərar olmasının ulu öndər Heydər Əliyevin və onun layiqli davamçısı Prezident İlham Əliyevin uğurlu, uzaqgörən siyasəti nəticəsində əldə olunması barədə danışıb. Eyni zamanda, Azərbaycan-Moldova əməkdaşlığına toxunan səfir Moldova ilə Azərbaycan arasında güclü dostluq və əməkdaşlıq münasibətlərinin olduğunu vurğulayıb. Diplomat Moldova dövlətinin və xalqının Dağlıq Qarabağ münaqişəsinin həllində beynəlxalq hüququn norma və prinsiplərinə əsaslanaraq Azərbaycanı dəstəklədiyinə görə təşəkkürünü bildirib. Bununla yanaşı, səfir son üç il ərzində Moldovada bütün sahələrdə aparılan islahatlar nəticəsində əldə olunan nailiyyətləri qeyd edərək, Azərbaycanın dost ölkənin uğurlarına sevindiyini bildirib.

Moldova xarici işlər və Avropaya inteqrasiya nazirinin müavini Lilian Dariy Azərbaycan ilə Moldovanı ölkələrin müstəqilliyi yolunda eyni uğurlar və eyni çətinliklərin birləşdirdiyini qeyd edib. O, hər iki ölkənin mövcud münaqişələrin yaxın zamanda ərazi bütövlüyü və suverenliyi çərçivəsində beynəlxalq hüququn normalarına uyğun sülh yolu ilə həllinə ümidvar olduğunu bildirib. Həmçinin nazir müavini Moldova ilə Azərbaycanın beynəlxalq təşkilatlar, o cümlədən BMT, Avropa Şurası, GUAM, Qara Dəniz İqtisadi Əməkdaşlıq Təşkilatı çərçivəsində uğurlu əməkdaşlığını vurğulayıb.

Sonra bir çox beynəlxalq müsabiqələrin laureatı Vitali Maçunski Azərbaycanın görkəmli mədəniyyət xadimi, Azərbaycan musiqi mədəniyyətində silinməz iz buraxmış Müslüm Maqomayevin repertuarından mahnılar ifa edib. Tədbirdə, həmçinin milli və klassik musiqilərimiz səsləndirilib, qonaqlara ziyafət verilib.

Tədbir Moldovanın yerli KİV-lərində geniş işıqlandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.