MƏDƏNİYYƏT
Azərbaycan Yazıçılar Birliyi sərhəd mühafizəsinin 96-cı ildönümü münasibətilə müsabiqə keçirir
Bakı, 6 may, Zərəngiz Mansurova, AZƏRTAC
Azərbaycan Yazıçılar Birliyi (AYB) sərhəd mühafizəsinin 96-cı ildönümü münasibətilə müsabiqə keçirir.
AYB-nin mətbuat xidmətindən AZƏRTAC-a bildirilib ki, müsabiqə gənc nəslin vətənə və dövlətə sədaqət ruhunda tərbiyə edilməsi, Dövlət Sərhəd Xidmətinin əldə etdiyi nailiyyətlərin, onun cəmiyyətdəki rolunun və əhəmiyyətinin ictimaiyyətə çatdırılması, müstəqil dövlətçiliyimizin əsas atributlarından biri olan sərhədlərimizin müqəddəsliyi, onun mühafizəsi sahəsində əcdadlarımızdan miras qalmış milli mənəvi dəyərlərin, ənənələrin yaşadılması məqsədini daşıyır.
Müsabiqə dörd nominasiya - bədii ədəbiyyat (şeir, hekayə), təsviri sənət (rəngkarlıq), televiziya verilişi və qəzet məqaləsi üzrə keçirilir.
Bədii ədəbiyyat nominasiyasında şeir üçün I yerin sahibinə 400 manat, II və III yerlərə müvafiq olaraq 300 və 200 manat pul mükafatı, eləcə də diplomlar veriləcək. Həmçinin hər birinə 100 manat və fəxri fərman olmaqla üç həvəsləndirici mükafat da nəzərdə tutulur.
Hekayə üçün I yerin sahibinə 500 manat, II və III yerlərə müvafiq olaraq 400 və 300 manat pul mükafatı, eləcə də diplomlar veriləcək. Həmçinin hər birinə 200 manat və fəxri fərman olmaqla üç həvəsləndirici mükafat da nəzərdə tutulur.
Yaşından asılı olmayaraq, bütün yaradıcı şəxslər müsabiqədə iştirak edə bilərlər. Təqdim olunan əsərlərin üzərində müəllif barədə məlumatlar göstərilmir. Həmin məlumatlar anketdə əks etdirilir və zərfə qoyulur. Həm əsərin arxasında, həm də zərfin üzərində şərti ad qeyd olunur. Müsabiqəyə Azərbaycanın sərhəd mühafizəsi tərənnüm edilən, indiyədək dərc olunmayan əsərlər təqdim edilməlidir.
Müsabiqənin nəticələri Azərbaycan Sərhəd Mühafizəsinin yaranmasının 96-cı ildönümü ərəfəsində elan olunacaq.