İDMAN
Azərbaycan boksçusu Teymur Məmmədov finala vəsiqə qazanıb [YENİLƏNİB] VİDEO
Yarımfinal mərhələsinin digər görüşündə Avropa çempionu, Olimpiya Oyunlarının bürünc mükafatçısı Teymur Məmmədov (81 kq) rusiyalı Pavel Silyagini 3:0 hesabı ilə məğlub edərək finala yüksələn ilk boksçumuz olub.
Heydər Əliyev Fondunun vitse-prezidenti Leyla Əliyeva və Arzu Əliyeva arenada boksçularımızın çıxışlarını izləyiblər.
19:52
Avropa çempionatının gümüş mükafatçısı Tayfur Əliyev (56 kq) finala gedən yolda Rusiya boksçusu Baxtovar Nazirov ilə qarşılaşıb. Görüşdən 1:2 hesablı məğlubiyyətlə ayrılan boksçumuz mübarizəni yarımfinalda dayandırıb.
19:24
Qadınlar arasında boks yarışlarında 48-51 və 69-75 kiloqram çəki dərəcələrində finalçılar məlum olub. 48-51 kiloqram çəki dərəcəsində final qarşılaşmasında yarımfinalda türkiyəli Elif Coşkunu məğlub edən Böyük Britaniya boksçusu Nikola Adams ilə rusiyalı Sayan Saqatayeva üzərində qələbə qazanan polşalı Sandra Drabik üz-üzə gələcək.
Digər final görüşündə isə niderlandlı Nuşka Fontiyn və isveçli Anna Laurel Naş qarşılaşacaqlar.
18:26
“Baku Crystal Hall”da keçirilən boks yarışlarının doqquzuncu gününün ikinci yarısına 48-51 kiloqram çəki dərəcəsində çıxış edən türkiyəli qadın boksçu Elif Coşkun və Böyük Britaniya idmançısı Nikola Adams arasında baş tutan görüşə start verilib.
Axşam saatlarında Azərbaycanın daha iki boksçusu rinqə çıxacaq. Əvvəlcə, Avropa çempionatının gümüş mükafatçısı Tayfur Əliyev (56 kq) mübarizəyə qoşulacaq. Onun rəqibi Rusiya boksçusu Baxtovar Nazirov olacaq. Digər idmançımız - Avropa çempionu, Olimpiya Oyunlarının bürünc mükafatçısı Teymur Məmmədovun (81 kq) yarımfinaldakı rəqibi Rusiya boksçusu Pavel Silyaqin olacaq.
Axşam seansında yarımfinal mərhələsi çərçivəsində beş çəki dərəcəsində ümumilikdə 10 görüş keçiriləcək.
Kişi boksçularımızdan biri Avropa Oyunlarında iştirakını dayandırıb.
Azərbaycan Boks Federasiyasından AZƏRTAC-a bildiriblər ki, Avropa və ikiqat dünya çempionu, Olimpiya Oyunlarının bürünc mükafatçısı Məhəmmədrəsul Məcidov (91 kq-dan yuxarı) üz nahiyəsindən aldığı ciddi zədə səbəbindən yarımfinal görüşünə çıxmayacaq. Boksçumuzun bir müddət yarışlardan kənarda qalacağı bildirilir. Belə olan halda onun rəqibi Qasan Qimbatov birbaşa olaraq finalda iştirak etmək hüququ qazanıb.
M.Rəsulov yarımfinala adlamaqla bürünc medalı təmin edib.
15:09
“Baku Crystal Hall”da boks yarışlarının doqquzuncu gününün ilk yarısının qarşılaşmaları başa çatıb.
Rinqə Azərbaycanın iki idmançısı çıxıb. Əvvəlcə, günün ilk qarşılaşmasında 57-60 kiloqram çəki dərəcəsində boksçumuz Yana Alekseyevna dörddəbir finalda Rusiya təmsilçisi Zinaida Dobrininanı 3:0 hesabı ilə məğlub edərək yarımfinala vəsiqə qazanıb. O, bu mərhələdə Olimpiya çempionu, dünya və Avropa çempionatlarının dəfələrlə qalibi irlandiyalı Keti Teylor ilə qarşılaşacaq.
Kişi boksçularımızdan ilk olaraq mübarizəyə qoşulan Xaybula Musalov (75kq) azarkeşləri sevindirməyi bacarıb. Dörddəbir finalda boksçumuz Kazan universiadasının qalibi belaruslu Vitali Bandarenkadan üstün olub -3:0. Onun yarımfinaldakı rəqibi macarıstanlı Zoltan Harcsa olacaq.
Səhər seansının yaddaqalan görüşlərindən biri 57-60 kiloqramda isveçli İda Lundblad və “Bakı-2015”in idman elçisi, irlandiyalı Keti Teylor arasında baş tutub. İrlandiyalı Olimpiya çempionu rəqibinə heç bir şans verməyib – 3:0.
Digər qarşılaşmalarda isə Rusiya, İrlandiya, Macarıstan və Ukrayna və Xorvatiya idmançıları qalib gələrək medallar uğrunda mübarizələrini davam etdirmək imkanı əldə ediblər.
14:32
İyunun 24-də “Baku Crystal Hall”da keçirilən boks yarışlarının doqquzuncu gününün ilk yarısında keçirilən görüşlərdən sonra Azərbaycan boksçularının yarımfinallardakı rəqiblərin adlarına aydınlıq gəlib.
Qadın boksçularımızdan Anna Əlimərdanova (51-54 kq) rusiyalı Yelena Saveleva, Yana Alekseyevna (57-60kq) isə Olimpiya çempionu, dünya və Avropa çempionatlarının dəfələrlə qalibi irlandiyalı Keti Teylor ilə görüşəcək.
Kişi boksçularımıza gəlincə, 52 kiloqramda çıxış edən Avropa çempionatının bürünc medalçısı Elvin Məmişzadə yarımfinalda almaniyalı Hamza Touba ilə qarşılaşacaq. Avropa çempionatının gümüş mükafatçısı Tayfur Əliyevin rəqibi Rusiya boksçusu Baxtovar Nazirov olacaq. Altımış kiloqram çəki dərəcəsində mübarizə aparan Albert Səlimov finala gedən yolda irlandiyalı Sin Makkomb ilə üz-üzə gələcək. İkiqat Azərbaycan çempionu Kollazo Sotomayor (64 kq) isə ukraynalı Viktor Petrov ilə münasibətlərinə aydınlıq gətirəcək. Gənclər arasında Avropa çempionu Pərviz Bağırov (69 kq) final yolunda Böyük Britaniya boksçusu Yoş Kellini məğlub etməlidir. Digər boksçumuz Xaybula Musalov (75 kq) bu mərhələdə macarıstanlı Zoltan Harcsanı sınağa çəkəcək. Avropa çempionu, Olimpiya Oyunlarının bürünc mükafatçısı Teymur Məmmədovun (81 kq) yarımfinaldakı rəqibi rusiyalı Pavel Silyaqin olacaq.
Ağır çəki dərəcələrində çıxış edən boksçularımız - Abdulqadir Abdullayev (91 kq) və Avropa və ikiqat dünya çempionu, Olimpiya Oyunlarının bürünc mükafatçısı Məhəmmədrəsul Məcidov (91 kq-dan yuxarı) yarımfinaldakı rəqibləri Rusiya idmançıları olacaqlar. Dəri əlcək ustalarımız müvafiq olaraq Sadam Maqomedov və Qasan Qimbatov ilə görüşəcəklər.
13:54
Kişi boksçularımızdan ilk olaraq mübarizəyə qoşulan Xaybula Musalov (75 kq) azarkeşlərimizi sevindirib. Boksçumuz dörddəbir finalda Kazan universiadasının qalibi belaruslu Vitali Bondarenkadan üstün olub -3:0. Onun yarımfinaldakı rəqibi polşalı Kamil Qardzielik - macarıstanlı Zoltan Harcsa görüşünün qalibi olacaq.
Azərbaycan Boks Federasiyasının prezidenti Kəmaləddin Heydərov və digər rəsmi şəxslər arenada görüşü izləyiblər.
13:19
Bakı, 24 iyun, A.Yadigarov, S. Allahverdiyeva, AZƏRTAC
İyunun 24-də “Baku Crystal Hall”da keçirilən boks yarışlarının doqquzuncu günü Azərbaycan idmançılarının qələbəsi ilə başlayıb.
Günün ilk qarşılaşmasında 57-60 kiloqram çəki dərəcəsi üzrə dörddəbir finalda boksçumuz Yana Alekseyevna Rusiya təmsilçisi Zinaida Dobrininanı 3:0 hesabı ilə məğlub edərək yarımfinala vəsiqə qazanıb. O, qızıl medal uğrunda döyüşdə Olimpiya çempionu, dünya və Avropa çempionatlarının dəfələrlə qalibi irlandiyalı Keti Teylor ilə qarşılaşacaq.
Bu gün 48-51, 57-60, 69-75 kiloqram çəki dərəcələrində qadın, 46-49, 56, 75, 81 və 91 çəki dərəcələrində isə kişi boksçular rinqə çıxacaqlar.
Kişi boksçularımızdan Tayfur Əliyev (56 kq), Xaybulla Musalov (75 kq) və Teymur Əliyev rinqə çıxacaqlar.
Gün ərzində ümumilikdə 18 görüş keçiriləcək.