SİYASƏT
Azərbaycan dövləti multikulturalizmə alternativi olmayan mütərəqqi bir siyasət kimi yanaşır
Bakı, 7 oktyabr, AZƏRTAC
Xəbər verdiyimiz kimi, bu günlərdə Varşavada insan ölçüsü üzrə öhdəliklərin yerinə yetirilməsi ilə əlaqədar ATƏT-in müşavirəsi keçirilib. Müşavirənin 29 sentyabr-1 oktyabr tarixlərində keçirilən sessiyalarında Azərbaycan Respublikasının millətlərarası, multikulturalizm və dini məsələlər üzrə Dövlət müşavirliyi xidmətinin baş məsləhətçisi Etibar Nəcəfov da iştirak edib. O, AZƏRTAC-a müsahibəsində müşavirədə müzakirə olunan məsələlər barədə ətraflı məlumat verib.
Dövlət müşavirliyi xidmətinin baş məsləhətçisi müşavirə çərçivəsində iştirak etdiyi bütün sessiyalarda çıxış etdiyini bildirib. “Nifrət zəminində törədilmiş cinayətlərə qarşı mübarizə və ayrı-seçkiliyə qarşı səmərəli müdafiənin təmin edilməsi” adlı sessiyadakı çıxışında Azərbaycan Respublikasının multikulturalizm siyasətindən danışdığını diqqətə çatdırıb. O deyib ki, miqrasiya böhranının kulminasiya həddini aşdığı müasir dövrdə etnik-mədəni müxtəlifliyin tənzimlənməsinə yönəlmiş multikulturalizm siyasəti ciddi problemlərlə üzləşir. Dünyanın, o cümlədən Qərbi Avropanın bir çox dövlətləri hazırkı dövrdə multikulturalizm siyasətinin fiaskoya uğradığını bəyan edərək bu siyasətin cəmiyyətdə sosial-iqtisadi məsələlərin yaranmasına səbəb olduğunu qeyd edirlər. Baş məsləhətçi çıxışında Azərbaycan Respublikasının belə bir çətin dövrdə multikulturalizmə özünün dövlət siyasəti kimi yanaşması və bu sahədə əldə etdiyi böyük nailiyyətləri müşavirə iştirakçılarının diqqətinə çatdırdığını bildirib. Qeyd edib ki, Azərbaycan dövləti multikulturalizmə alternativi olmayan mütərəqqi bir siyasət kimi yanaşır. O, konkret olaraq Azərbaycan Respublikasının Prezidenti İlham Əliyevin təşəbbüsü ilə yaradılmış Azərbaycan Respublikasının millətlərarası, multikulturalizm və dini məsələlər üzrə Dövlət müşavirliyi xidmətinin Bakı Beynəlxalq Multikulturalizm Mərkəzi ilə multikulturalizm siyasətinin həyata keçirilməsi sahəsində reallaşdırdığı mühüm layihələr haqqında danışıb. Bildirib ki, belə layihələrdən biri olan “Xarici ölkə universitetlərində “Azərbaycan multikulturalizmi” fənninin tədris olunması” ölkəmizin multikulturalizm sahəsində əldə etdiyi böyük təcrübəyə marağın göstəricisidir. “Azərbaycan multikulturalizmi” fənnini tədris etməyə razılıq verən universitetlər ölkəmizin bu sahədə faydalı təcrübəsini elmi cəhətdən öyrənmək və tətbiq etmək istəyirlər.
Digər sessiyada çıxışında Dövlət müşavirliyinin nümayəndəsi yəhudilərin Azərbaycanda əmin-amanlıq şəraitində yaşamalarından bəhs edib. O, yəhudi xalqının ölkəmizdə qədim dövrdən bəri yaşadıqları, burada heç vaxt antisemitizm hallarının olmadığı, yəhudilərin ölkəmizin ictimai-siyasi, iqtisadi və mədəni həyatında fəal iştirak etdikləri, onların Azərbaycan torpaqlarının erməni işğalçılarından müdafiə olunmasında qəhrəmancasına vuruşduqları haqqında danışıb. Bildirib ki, son dövrdə dünyanın, o cümlədən Avropanın bir sıra aparıcı dövlətlərində antisemitizm dalğasının qalxması Azərbaycanın bu sahədəki təcrübəsinin yəhudi xalqına münasibətdə apardığı siyasətin əhəmiyyətini artırır. Buna görə heç də təsadüfi deyil ki, məruzədə əks olunan məlumat müşavirə iştirakçıları, xüsusilə də müasir dövrdə ATƏT regionu ölkələrində yəhudi xalqının hüquqlarının müdafiə olunması məsələsini qaldıran qeyri-hökumət təşkilatlarının nümayəndələri tərəfindən maraqla qarşılandı.
Daha bir sessiyada milli azlıqlara mənsub olan şəxslərin hüquqları müzakirə olunarkən E.Nəcəfov çıxışında ölkəmizdə yaşayan udilərin din azadlığı hüquqlarının müdafiə olunması çərçivəsində Alban Apostol aftokefal kilsəsinin bərpası istiqamətində Azərbaycan hökumətinin gördüyü işlər haqqında məlumat verib. Bildirib ki, ölkəmizdə yaşayan bütün xalqların və etnik qrupların din azadlığı hüquqlarının müdafiə olunmasına dövlətimiz xüsusi fikir verir. Bu məsələ Azərbaycan Respublikasının millətlərarası münasibətlər siyasətinin əsas məqsədlərindən biridir.
Baş məsləhətçi deyib ki, müasir dövrdə cəmiyyətdəki etnik-mədəni müxtəlifliklərin tənzimlənməsini təşkil edə bilməyən, sosial-iqtisadi problemlərin artmasının əsas səbəbi kimi qələmə verilən və buna görə də aparıcı Qərb dövlətləri tərəfindən təkzib olunan multikulturalizmi onun Azərbaycan Respublikasının dövlət siyasəti qismində təqdim etməsi iştirakçılarda böyük maraq doğurub. Yaxud dünyanın bir sıra dövlətlərində antisemitizmin baş qaldırdığı bir dövrdə Azərbaycanda yəhudilərin tarixən əmin-amanlıq şəraitində yaşamaları, ölkəmizin inkişafında fəal iştirak etmələri bizə qərəzsiz münasibət bəsləyən heç bir iştirakçını maraqlandırmaya bilməzdi. Ölkəmizdə yaşayan udilərin istəyi ilə Alban Apostol aftokefal kilsəsinin bərpası istiqamətində Azərbaycan hökumətinin gördüyü işlər haqqında məlumatı da tədbir iştirakçıları diqqətlə dinlədilər.
Dövlət müşavirliyinin rəsmisi deyib ki, tədbirdə həmişə olduğu kimi, Ermənistan nümayəndə heyəti bu dəfə də Azərbaycanın sülhsevər, multikultural, tolerant, demokratik, sürətlə inkişaf edən bir ölkə olduğunu ifadə edən mühüm məqamlara qısqanclıqla yanaşaraq böhtan dolu, həqiqətə uyğun olmayan iddialarla çıxış etdi. Ermənistan rəsmisi ölkəsinin insan hüquqları, demokratiya, multikulturalizm, etnik və dini azadlıqların qorunması sahəsində heç bir müsbət göstəricisi olmadığını ört-basdır etmək məqsədilə çalışırdı ki, bu faktları təkzib etsin, onlara öz etirazını bildirsin.
Baş məsləhətçi qeyd edib ki, Varşavada 57 ölkənin, bir sıra beynəlxalq təşkilatların, QHT-lərin iştirakı ilə keçirilən bu iclasda ATƏT-ə üzv olan ölkələr insan ölçüsünə dair konsensus yolu ilə qəbul etdikləri öhdəliklərin yerinə yetirilməsinə dair hesabat verirlər. Burada müxtəlif ölkələrdə insan hüquqları və demokratiyaya dair məsələlər müzakirə edilir, bu sahədə mövcud problemlərin aradan qaldırılmasına dair təkliflər irəli sürülür, mütərəqqi təcrübəni müzakirə edirlər. Bu cür tədbirlərdə iştirak etməklə ölkəmiz ilk növbədə etnik, dini və mədəni müxtəlifliyin qorunması sahəsində əldə etdiyi böyük uğurlarını dünya ictimaiyyətinə çatdırmaq imkanını əldə edir. Azərbaycana dost olmayan qüvvələr bu cür tədbirlərdə ölkəmizə qarşı qərəzli fikirlər səsləndirirlər. Ona görə də belə tədbirlərdə Azərbaycan nümayəndə heyətinin iştirakı olduqca vacibdir.
Sessiyaların birində Almaniyadan olan bir erməni əsilli QHT təmsilçisi çıxışında deyib ki, guya I Avropa Oyunları zamanı Ermənistandan olan idmançılar Azərbaycanda ayrı-seçkiliyə məruz qalmışdılar. Erməniyə cavab verən E.Nəcəfov onun dediklərini bir ritorik sualla təkzib edib: “Əgər Ermənistan idmançıları I Avropa Oyunları zamanı Azərbaycanda belə problemlərlə üzləşmişdilərsə, onda onlar niyə bu yaxınlarda şahmat turnirində iştirak etmək üçün yenidən Azərbaycana gəldilər?”