SİYASƏT


Azərbaycan ilə Avstraliya arasında əlaqələrin inkişafı müzakirə edilib

A+ A

Bakı, 28 sentyabr, AZƏRTAC

Sentyabrın 27-də xarici işlər nazirinin müavini Xələf Xələfov ölkəmizdə səfərdə olan Avstraliya-Azərbaycan Parlamentlərarası dostluq qrupunun sədri, senator Kristof Conun rəhbərlik etdiyi nümayəndə heyəti ilə görüşüb.

Xarici İşlər Nazirliyinin mətbuat xidmətindən AZƏRTAC-a bildirilib ki, görüşdə Xələf Xələfov Azərbaycan ilə Avstraliya arasında siyasi və diplomatik münasibətlərin mövcudluğunu, əlaqələrin uğurla inkişaf etdiyini və əməkdaşlığın daha da genişləndirilməsi üçün böyük potensialın olduğunu diqqətə çatdırıb. X.Xələfov siyasi dialoqun, eləcə də iqtisadi və humanitar sahələrdə əməkdaşlığın inkişaf etdirilməsinin vacibliyini bildirib. O, Avstraliyanın xarici işlər nazirinin Azərbaycana səfər etməsini, ölkələrimiz arasında konkret layihələrin nəzərdən keçirilməsinin və ticarət dövriyyəsinin artırılmasının məqbul sayıldığını diqqətə çatdırıb və parlamentlərarası əlaqələrin hazırkı səviyyəsindən məmnunluğunu ifadə edib.

X.Xələfov Azərbaycanda son illər həyata keçirilən islahatlar barədə geniş məlumat verərək, Avstraliya şirkətlərinin ölkəmizdəki fəaliyyətindən danışıb. Nazir müavini Azərbaycan iqtisadiyyatının müxtəlif istiqamətlərində, o cümlədən energetika, nəqliyyat, kənd təsərrüfatı və turizm sahələrində Avstraliya şirkətlərinin fəaliyyətinin arzu edilən olduğunu qeyd edib. Nazir müavini Azərbaycan ilə Avstraliya arasında hüquq-müqavilə bazasının genişləndirilməsi, eləcə də investisiyaların təşviqi və ikiqat vergidən azad olunmaya dair sazişlərin imzalanmasının hər iki ölkənin şirkətlərini daha da həvəsləndirəcəyini bildirib. X. Xələfov beynəlxalq təşkilatlar və qlobal forumlar çərçivəsində beynəlxalq terrorizm və mütəşəkkil cinayətkarlığa qarşı mübarizə sahəsində əməkdaşlığın genişləndirilməsi üçün imkanlardan söz açıb, bir çox beynəlxalq məsələlərdə ölkələrimizin maraqlarının üst-üstə düşdüyünü qeyd edib.

Ölkəmizin ən böyük problemi olan Ermənistan-Azərbaycan münaqişəsinin həlli istiqamətində son danışıqlar barədə məlumat verən X.Xələfov münaqişənin regionda sülh və təhlükəsizliyə ciddi təhdid olduğunu vurğulayıb. Nazir müavini münaqişənin həll olunmamasının əsas səbəbi kimi Ermənistanın işğalçı siyasətindən əl çəkməməsini və öz hərbi qüvvələrini işğal olunmuş Azərbaycan ərazilərindən çıxarmamasını göstərib. O, Ermənistanın aparılmış danışıqlar nəticəsində əldə olunan razılaşmalara əməl etmədiyini, beynəlxalq ictimaiyyətin mövqeyinə məhəl qoymadığını deyib.

Senator Kristof Con ölkələrimiz arasında əməkdaşlığın inkişaf etdirilməsi üçün bir çox sahələrdə geniş potensialın olduğunu, kənd təsərrüfatı, xüsusən meyvəçilik və tərəvəzçilik sahəsində əməkdaşlıq imkanlarını vurğulayıb. O, Azərbaycan ilə təhsil sahəsində əməkdaşlıqda maraqlı olduqlarını bildirib. Kristof Con Azərbaycanın turizm imkanlarını yüksək qiymətləndirib və bu sahədə əlaqələrin genişləndirilməsini təqdir edib.

Ermənistan-Azərbaycan münaqişəsinə dair ətraflı məlumata görə təşəkkürünü bildirən nümayəndə heyətinin rəhbəri Azərbaycanın münaqişənin sülh yolu ilə həllində səylərinin Avstraliya tərəfindən dəstəkləndiyini bəyan edib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.