CƏMİYYƏT


Azərbaycan ilə BMT-nin İnkişaf Proqramı arasında əməkdaşlığın genişləndirilməsinin perspektivləri müzakirə edilib

A+ A

Bakı, 11 oktyabr, Əziz Məmmədov, AZƏRTAC

Ailə, Qadın və Uşaq Problemləri üzrə Dövlət Komitəsində (AQUPDK) BMT-nin İnkişaf Proqramının (BMTİP) İstanbul Regional Mərkəzinin Dayanıqlı İnkişaf üzrə Qrupunun rəhbəri Corc Buma ilə görüş keçirilib.

AZƏRTAC xəbər verir ki, görüşdə AQUPDK-nin sədri Hicran Hüseynova ailə, qadın və uşaq problemlərinin həllinin Azərbaycanın dövlət siyasətinin prioritetlərindən biri olduğunu qeyd edib. Diqqətə çatdırıb ki, son illərdə ölkəmizdə dövlət qadın siyasətinin həyata keçirilməsi, gender bərabərliyinin təmin edilməsi və qadınların imkanlarının genişləndirilməsi istiqamətində mühüm addımlar atılıb. Hazırda Azərbaycan qadınları ölkəmizdə həyata keçirilən bütün möhtəşəm layihələrdə və ictimai həyatın bütün sahələrində fəal iştirak edirlər.

Hicran Hüseynova xatırladıb ki, digər üzv dövlətlər kimi, Azərbaycan da Minilliyin İnkişaf Məqsədlərini əks etdirən və 2030-cu ilədək olan dövrdə insanların həyatında müsbət dəyişikliklərin yaradılmasında mühüm rol oynayan 17 məqsəddən ibarət Minilliyin Bəyannaməsini qəbul edib. Bundan əlavə, Prezident İlham Əliyevin Sərəncamı ilə Dayanıqlı İnkişaf üzrə Milli Əlaqələndirmə Şurası yaradılıb. Şuranın yaradılmasından əsas məqsəd 2030-cu ilədək olan dövrdə Azərbaycan üçün əhəmiyyət kəsb edən, qlobal məsələ və məqsədlərə müvafiq milli prioritetləri müəyyən etmək, habelə sosial-iqtisadi sahələri əhatə edən dövlət proqramlarının və strategiyalarının BMT-nin Dayanıqlı İnkişaf Məqsədlərinə uyğunluğunu təmin etməkdir.

Dövlət Komitəsinin sədri Azərbaycan hökumətinin BMT-nin İnkişaf Proqramı ilə uzun illər əməkdaşlıq etdiyini də vurğulayaraq bildirib ki, bu əməkdaşlıq ölkəmizdə mühüm layihələrin həyata keçirilməsinə, eləcə də təcrübə mübadiləsinə təkan verir.

Corc Buma ölkəmizin sosial-iqtisadi inkişafında əldə edilən nailiyyətlərdə Azərbaycan rəhbərliyinin rolunu yüksək qiymətləndirib. O, həmçinin qlobal səviyyədə və beynəlxalq forumlarda qadın haqlarının genişləndirilməsi, onların səhiyyə və sosial xidmətlərdən istifadə imkanlarının yaxşılaşdırılması, gender zorakılığının qarşısının alınması məsələlərində Azərbaycan rəhbərliyinin dəstəyinin vacib olduğunu qeyd edib.

Görüşdə tərəflər məişət zorakılığının qarşısının alınması üçün tədbirləri, beynəlxalq təcrübənin, o cümlədən ailə siyasəti, qadın və uşaq hüquqlarının müdafiəsi sahəsində BMT təcrübənin öyrənilməsi məsələlərini, habelə gələcək əməkdaşlığın perspektivlərini müzakirə ediblər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.