Bakı, 26 noyabr, AZƏRTAC

Hazırda “Azərbaycan Respublikası Hökuməti və Pakistan Respublikası Hökuməti arasında enerji sahəsində əməkdaşlıq haqqında Anlaşma Memorandumu”nun imzalanması ilə əlaqədar işlər görülür və işçi qruplar səviyyəsində danışıqlar aparılır. Azərbaycan dost və müttəfiq ölkə kimi Pakistanla enerji sahəsində əməkdaşlığın inkişafına dəstək verməyə hazırdır.

Energetika Nazirliyindən AZƏRTAC-a bildirilib ki, bu barədə Azərbaycanın energetika naziri Natiq Əliyevin Pakistan Dövlət Neft Şirkətinin icraçı direktoru Şeyx İmran-ül-Həqqin başçılıq etdiyi nümayəndə heyəti ilə keçirdiyi görüşdə məlumat verilib.

Görüşdə Pakistana neft məhsullarının, maye qazın (LNG) uzunmüddətli nəqli və idxalı üçün infrastrukturun yaradılması perspektivi ətrafında fikir mübadiləsi aparılıb.

İki ölkə arasında bütün sahələrdə qarşılıqlı etimad və dəstəyə əsaslanan münasibətlərin formalaşdığını deyən energetika naziri N.Əliyev iqtisadi əlaqələrin inkişafına təkan verəcək enerji əməkdaşlığı üçün geniş imkanların olduğunu diqqətə çatdırıb. Pakistanla enerji əməkdaşlığından bəhs edilərkən bildirilib ki, elektrik enerjisinin digər dövlətlərə, o cümlədən də Pakistana ötürülməsi üçün qonşu ölkələrin energetika sistemləri ilə elektrik əlaqələri gücləndirilib. Bu məqsədlə İranla il ərzində 4,0 milyard kilovat/saat həcmində elektrik enerjisi ötürməyə imkan yaradan 230 kilovoltluq “I Parsabad” və 330 kilovoltluq “II Parsabat” hava elektrik verilişi xətləri çəkilib.

N.Əliyev həmçinin bildirib ki, neftin bütün dünyada sənaye üsulu ilə ilk dəfə olaraq məhz Azərbaycanda çıxarılması faktından ötən 167 illik tarixi dövr ərzində ölkəmizdə emal sənayesi də böyük inkişaf yolu keçib. Emal kompleksində həyata keçirilən işlər ölkənin neft məhsullarına olan tələbatını ödəməklə yanaşı, texnoloji qurğuların modernləşməsini də əhatə edib. Odur ki, Azərbaycanın bu sahədə əldə etdiyi təcrübədən Pakistan da yararlana bilər.

Bundan başqa, qonaqlar Azərbaycan Respublikası Dövlət Neft Şirkətinin (SOCAR) Türkiyə, İsveçrə, Gürcüstan, Ukrayna, Rumıniya və başqa ölkələrdəki uğurlu fəaliyyəti, “SOCAR Trading”in həm Azərbaycanda, həm də dünyanın bir çox ölkələrinin neft emalı zavodlarında istehsal olunan məhsulların satışını həyata keçirməsi, maye qazın 2013-ci ildən dünya bazarına çıxarılması barədə ətraflı məlumatlandırılıblar.

Pakistan Dövlət Neft Şirkətinin icraçı direktoru Şeyx İmran-ül-Həqqin ölkəsinin maraqlarını ifadə etməklə yanaşı, nəzərdə tutulan layihələrin reallaşması üçün mühüm əhəmiyyət kəsb edən sazişin imzalanmasının vacibliyini də vurğulayıb.