Düşənbə, 25 may, AZƏRTAC

Azərbaycanın Tacikistandakı səfiri Abbasəli Həsənovun bu ölkənin Ali Məclisi Nümayəndələr Palatasının üzvü, Tacikistan-Azərbaycan parlamentlərarası dostluq qrupunun sədri Hilolbi Kurbonzoda və qrupun üzvləri Camşed Murtazakulov, Tolibxon Azimzoda və Bahrom Abdualimov ilə görüşündə ölkələrimiz arasında siyasi, iqtisadi, mədəni-humanitar sahələrdə əməkdaşlığın genişləndiyi qeyd edilib.

Görüşdə xalqlarımız arasında tarixi dostluq əlaqələrinin olduğu, ikitərəfli əməkdaşlığın ulu öndər Heydər Əliyev və Tacikistan Prezidenti Emoməli Rəhmon tərəfindən qoyulduğu vurğulanıb. Bu siyasətin hazırda Prezident İlham Əliyev və Prezident Emoməli Rəhmon tərəfindən uğurla davam etdirildiyi vurğulanıb.

Səfir Ermənistan-Azərbaycan, Dağlıq Qarabağ münaqişəsi, Ermənistanın təxribatları haqqında da məlumat verib. Bildirib ki, Azərbaycan dost Tacikistandan bu münaqişədə neytral mövqe tutmasını deyil, dəstək nümayiş etdirməsini gözləyir.

Hilolbi Kurbonzoda Azərbaycanın beynəlxalq miqyasda artan nüfuzundan danışıb, dost ölkənin həyata keçirdiyi humanitar layihələrin dünyada sülhün və sabitliyin inkişafında mühüm amil olduğunu bildirib. O, bu il Bakıda keçiriləcək Beynəlxalq Humanitar Forumda iştirak edəcəyini vurğulayıb.

Səfir bütün sahələrdə olduğu kimi, parlamentlərarası əməkdaşlığın da inkişaf etdiyini bildirib.

Görüşdə gömrük sahəsində Azərbaycandan gətirilən mallara tətbiq olunan rüsumların Çin, İran, Birləşmiş Ərəb Əmirlikləri, Türkiyə, Belarus, Qazaxıstan kimi ölkələrlə eyni qrupa daxil edilməsi qərara alınıb. Bakı ilə Düşənbə arasında birbaşa hava reysinin açılmasının əlaqələrin daha da inkişafına töhfə verə biləcəyi diqqətə çatdırılıb.

Qulu Kəngərli

AZƏRTAC-ın xüsusi müxbiri

Düşənbə