SİYASƏT


Azərbaycan ilə Türkmənistan arasında diplomatik münasibətlər yaradılmasından 25 il keçir

Bakı, 9 iyun, AZƏRTAC

Azərbaycan ilə Türkmənistan arasında diplomatik münasibətlər yaradılmasının 25 illiyi münasibətilə iyunun 9-da ADA Universitetində bu hadisəyə həsr edilmiş tədbir keçirilib.

AZƏRTAC xəbər verir ki, Türkmənistanın Azərbaycandakı səfirliyi ilə birgə təşkil olunmuş tədbirdə Milli Məclisin deputatları, ali məktəblərin rəhbərləri və ölkəmizdə akkreditə edilmiş diplomatik korpusun nümayəndələri, hər iki ölkənin tələbələri iştirak ediblər.

Əvvəlcə Azərbaycanın və Türkmənistanın dövlət himnləri səslənib.

ADA Universitetinin prorektoru Fariz İsmayılzadə qeyd edib ki, bugünkü tədbirin məhz bu universitetdə keçirilməsi təsadüfi deyil. ADA Universiteti ilə Türkmənistanın ali məktəbləri arasında yaxşı əlaqələr yaranıb. Universitetdə türkmənistanlı spikerlərin, ekspertlərin, müəllimlərin iştirakı ilə tez-tez konfranslar və treninqlər keçirilir. Prorektor qeyd edib ki, bir qrup magistr Aşqabada səfər edib, onlar geniş proqram üzrə Türkmənistanın iqtisadi və siyasi potensialını öyrəniblər.

Türkmənistanın ölkəmizdəki səfiri Batır Rəcəbov deyib ki, Azərbaycanla Türkmənistanı çoxəsrlik dostluq telləri bağlayır. Bu iki ölkə arasında səmərəli dialoq və ortaq mənəvi-mədəni ənənələr Türkmənistanın xarici siyasətinin strateji vektorlarından biridir. Səfir qeyd edib ki, Avropa ilə Asiyanın qovuşuğunda əlverişli coğrafi mövqedə yerləşən Türkmənistan və Azərbaycan iqtisadi, humanitar və sosial sahələrdə, habelə beynəlxalq təşkilatlar çərçivəsində səmərəli əməkdaşlıq edirlər.

B.Rəcəbov vurğulayıb ki, Türkmənistan və Azərbaycan liderləri arasında qarşılıqlı etimada əsaslanan dialoq pozitiv əməkdaşlığın mühüm amili olaraq tərəfdaşlığın daha da möhkəmlənməsinə kömək edir.

Milli Məclisin deputatı, Azərbaycan-Türkmənistan Parlamentlərarası Qrupunun rəhbəri Astan Şahverdiyev deyib ki, Azərbaycan öz dövlət müstəqilliyini bərpa edəndən sonra Türkmənistanla diplomatik münasibətlər qurulması sayəsində iki ölkə arasında münasibətlərdə yeni perspektivlər yaranıb. Deputat vurğulayıb ki, Sovet İttifaqı dövründə azərbaycanlı mütəxəssislər Türkmənistanda neft sənayesinin təşəkkülündə böyük rol oynayıblar və bu ənənə hələ də davam edir. Bu gün Azərbaycan Dövlət Neft və Sənaye Universitetində Türkmənistandan olan xeyli tələbə təhsil alır.

Deputat Azərbaycan ilə Türkmənistan arasında diplomatik münasibətlərin inkişaf tarixi barədə geniş məlumat verərək qeyd edib ki, Azərbaycan BMT, İslam Əməkdaşlıq Təşkilatı və Türkdilli Ölkələr Birliyi kimi təşkilatlar çərçivəsində Türkmənistanla səmərəli əməkdaşlıq edir.

Milli Məclisin deputatı Rövşən Rzayev, Azərbaycan Xarici İşlər Nazirliyinin nümayəndəsi Ayxan Süleymanlı, Azərbaycan Dövlət Neft və Sənaye Universitetinin rektoru Mustafa Babanlı tədbirdə çıxış edərək Azərbaycan ilə Türkmənistan arasında dostluq münasibətləri, tarixi ənənələr, din birliyi, ortaq mədəni dəyərlər və başqa məsələlər barədə danışıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.