Kiyev, 2 iyul, AZƏRTAC

Ukraynanın elektron və mətbu KİV-ləri, informasiya agentlikləri Azərbaycan-Ukrayna iqtisadi əməkdaşlıq məsələləri üzrə Birgə Hökumətlərarası Komissiyanın Bakıda keçirilən XI iclasının işi barədə ölkə ictimaiyyətini geniş məlumatlandırır.

Ukrayna Hökumətinin portalı “Gennadi Zubko: Ukrayna Azərbaycan neftinin idxalında və onun ölkə ərazisi vasitəsilə Avropaya tranzitində maraqlıdır” sərlövhəli məqaləsində yazır ki, Ukrayna ilə Azərbaycan Ukraynanın neft emalı zavodlarına Azərbaycan neftinin çatdırılması və ölkə ərazisi ilə onun tranzitinin təşkil olunması perspektivlərini müzakirə ediblər. Bu fikri Ukrayna Baş nazirinin müavini, regional inkişaf, tikinti və mənzil-kommunal təsərrüfatı naziri, eyni zamanda Birgə Komissiyanın Ukrayna tərəfindən həmsədri Gennadi Zubko səsləndirib. O deyib: “Ukrayna Azərbaycan neftinin Ukraynanın neft emalı zavodlarına göndərilməsində və onun ölkə ərazisi ilə Avropa ölkələrinə tranzitində maraqlıdır. Hazırda bunun üçün lazım olan bütün texniki imkanlarımız var. Bundan əlavə, biz Azərbaycanın Ukraynanın neft-qaz sahəsinə sərmayə yatırmaq imkanlarını müzakirə etdik”.

Gennadi Zubkonun sözlərinə görə, tərəflər Çexiya, Slovakiya və Macarıstanın neft emalı zavodları istiqamətində olan “Dostluq” neft kəmərinin cənub qolundan istifadə etməklə, yüngül neft sortları ilə təchizatın təşkilinin perspektivlərini müzakirə ediblər. Tərəflər bu istiqamətdə işin tezliklə həyata keçirilməsində maraqlı olduqlarını təsdiqləyiblər.

Elə həmin informasiya resursu “Gennadi Zubko: Ukrayna Azərbaycanda Ukrayna təyyarələrinin inşasına dair ilkin proqram təqdim edəcək” sərlövhəli digər materialında məlumat verir ki, Ukrayna özünün AN-178 tipli təyyarələrinin yığılması üzrə müəssisənin Azərbaycan ərazisində inşasına və fəaliyyətinin təmin edilməsinə dair ilkin proqram təqdim edəcək.

Ukrayna Baş nazirinin müavini bildirib ki, bu qərar “Azərbaycan Hava Yolları” Qapalı Səhmdar Cəmiyyəti və “Antonov” Dövlət Müəssisəsi arasında daha əvvəl əldə olunmuş Ukraynanın AN-178 tipli təyyarələrinin Azərbaycanda istehsalı haqqında 2016-cı il 7 iyun tarixli razılaşmanı inkişaf etdirmək üçün qəbul edilib. G.Zubkonun sözlərinə görə, müəssisənin layihə gücü ildə 12-15 təyyarə olacaq.

Ukrinform “İpək Yolu” Ukraynanı daha bir nəqliyyat dəhlizinə ruhlandırıb” sərlövhəli informasiyasında qeyd edir ki, Ukrayna “Baltik dənizi-Qara dəniz-Xəzər dənizi” beynəlxalq nəqliyyat dəhlizinin yaradılması haqqında sazişin layihəsini Azərbaycan tərəfinə təqdim edib. G.Zubko vurğulayıb: “Bir neçə marşrutu sinxronlaşdıracaq bu iri nəqliyyat dəhlizi ticari-iqtisadi əlaqələrin möhkəmlənməsində böyük əhəmiyyət kəsb edəcək. Regionda yükdaşımaların kompleks inkişaf strategiyasını hazırlamaq üçün dəhliz çərçivəsində vahid idarəetmə orqanı yaratmaq da nəzərdə tutulur”. Ukrayna ilə Azərbaycan arasında “İpək yolu” marşrutu çərçivəsində nəqliyyat sahəsində əməkdaşlığın davam etdiyini vurğulayan Baş nazirin müavini deyib: “Ukrayna-Gürcüstan-Azərbaycan-Qazaxıstan-Çin marşrutu üzrə konteyner qatarının sınaq reysinin nəticələri belə daşımaların texniki və texnoloji imkanlarını sübuta yetirdi”.

“Gazeta.ua” portalı da “Ukrayna “Baltik dənizi-Qara dəniz-Xəzər dənizi” kimi iri nəqliyyat dəhlizi yaratmağı təklif edir” sərlövhəli informasiyasında eyni mövzuya toxunur: “Bu, bir neçə marşrutu sinxronlaşdıran iri nəqliyyat dəhlizi ticari-iqtisadi əlaqələrin möhkəmlənməsində böyük əhəmiyyət kəsb edəcək. Bundan əlavə, regionda yükdaşımaların kompleks inkişaf strategiyasını işləyib hazırlamaq üçün vahid idarəetmə orqanının yaradılması nəzərdə tutulur.

Ukrayna Baş nazirinin müavini vurğulayıb ki, Ukrayna ilə Azərbaycan arasında “İpək Yolu” marşrutu çərçivəsində nəqliyyat sahəsində əməkdaşlıq davam edir”.

Zeynal Ağazadə

AZƏRTAC-ın xüsusi müxbiri

Kiyev