Bakı, 6 may, P.İmanova, AZƏRTAC

Mayın 6-da Bakı Xoreoqrafiya Akademiyasında ümummilli lider Heydər Əliyevin anadan olmasının 93-cü ildönümünə həsr edilən “Heydər Əliyev və Azərbaycan incəsənəti” mövzusunda birinci respublika elmi-nəzəri konfransı keçirilib.

AZƏRTAC xəbər verir ki, əvvəlcə konfrans iştirakçıları Heydər Əliyev Sarayının qarşısındakı parkda Ulu Öndərin abidəsini ziyarət edib, önünə əklil və gül dəstələri qoyublar.

Konfransda Bakı Xoreoqrafiya Akademiyasının rektoru, Əməkdar Elm Xadimi, professor Timuçin Əfəndiyev çıxış edərək ölkəmizdə Ulu Öndərin xatirəsinə həsr olunan tədbirlərin keçirildiyini söyləyib. Rektor Ümummilli Liderin xalqımız və dövlətimiz qarşısındakı tarixi xidmətlərindən, Azərbaycan təhsilinin, elminin, incəsənətinin inkişafındakı zəngin fəaliyyətindən söz açıb. Bildirilib ki, ulu öndər Heydər Əliyevin Azərbaycan rəhbərliyinə qayıdışı ilə əsasını müstəqillik, azərbaycançılıq, dövlətçilik, demokratiya, milli tərəqqi, dünyəvilik kimi ümumbəşəri dəyərlər təşkil edən yeni bir ideologiyanın bünövrəsi qoyulub. Ümummilli Liderin ölkəmizə rəhbərlik etdiyi hər iki dövrdə aparılan ardıcıl və məqsədyönlü siyasət nəticəsində bütün sahələrdə xüsusilə iqtisadiyyat, sənaye və istehsalda yaranmış geriləmə proseslərinin qarşısı alınıb, Azərbaycanın iqtisadi inkişafının yeni mərhələsinin təməli qoyulub. Görkəmli dövlət xadimi öz şəxsi nüfuzu və əməli fəaliyyəti ilə ölkəmizi dünyada tanıdıb. Müstəqil Azərbaycan dövlətinin hər bir atributu bu görkəmli dövlət xadiminin adı, onun yorulmaz fəaliyyəti ilə bağlıdır.

Rektor bildirib ki, keçən əsrin 70-ci illərində Ulu Öndərin rəhbərliyi və qayğısı ilə Azərbaycan ədəbiyyatı, elmi və incəsənəti inkişaf yoluna qədəm qoyub və dünyaya birbaşa inteqrasiya olunmaq imkanı qazanıb. Mədəniyyətin, ədəbiyyatın və incəsənətin inkişafına böyük önəm verən Ümummilli Lider ölkəmizdə və xaricdə görkəmli klassiklərimizin, elm və incəsənət xadimlərimizin yubiley tədbirlərində şəxsən iştirak edib, hər zaman sənət adamlarına diqqət və qayğı ilə yanaşıb. Hələ keçmiş sovet dövründə Azərbaycanın bir sıra görkəmli ziyalıları, elm xadimləri onun himayəsi və təşəbbüsü ilə müxtəlif dövlət mükafatlarına və yüksək fəxri adlara layıq görülüblər. Ümummilli lider Heydər Əliyevin diqqət və qayğısı sayəsində sovet dövründə Azərbaycanda 16 dövlət teatrı fəaliyyət göstərib və bu sahənin maddi-texniki bazasının gücləndirilməsi istiqamətində mühüm addımlar atılıb.

Vurğulanıb ki, hələ ötən əsrin 70-80-ci illərində müdrik rəhbər Heydər Əliyevin uzaqgörən siyasəti və təşəbbüsü ilə çoxlu azərbaycanlı gənc keçmiş SSRİ-nin ən nüfuzlu ali məktəblərinə göndərilib. Hazırda bu kadrların əksəriyyəti Azərbaycanda müxtəlif dövlət qurumlarında çalışır və xaricdə ölkəmizi uğurla təmsil edirlər.

Mədəniyyət və turizm nazirinin müavini Ədalət Vəliyev ulu öndər Heydər Əliyevin Azərbaycan mədəniyyətinin, ədəbiyyatının inkişafındakı zəngin fəaliyyətindən, milli mənəvi dəyərlərimizin beynəlxalq aləmdə tanıdılması istiqamətində misilsiz xidmətlərindən danışıb.

Bildirilib ki, görkəmli dövlət xadiminin hakimiyyətə yenidən qayıdışı Azərbaycan mədəniyyətinin də tərəqqisinə yeni təkan verib, yeni bir dövrün əsası qoyulub. Ümummilli Lider həmişə mədəniyyət xadimlərinə, incəsənət və teatr işçilərinə xüsusi diqqət və qayğı ilə yanaşıb. Onların əməyini yüksək qiymətləndirib, hər zaman bu sahənin adamları ilə görüşlər keçirib, onların problemləri ilə maraqlanıb.

Professorlar Nizaməddin Şəmsizadə, Nailə Rəhimbəyli, Əməkdar İncəsənət Xadimi Aydın Kazımzadə “Heydər Əliyev və Azərbaycan ədəbiyyatı”, “Heydər Əliyev və musiqi sənəti”, “Heydər Əliyev və musiqi sənəti” mövzularında məruzələrlə çıxış ediblər. Məruzələrdə Ulu Öndərin ölkə mədəniyyətinin, ədəbiyyatının inkişafındakı misilsiz xidmətlərindən söz açılıb.

Mədəniyyət və incəsənət xadimləri Ulu Öndərlə bağlı xatirələrini bölüşüblər.

Sonra konfrans işini bölmə iclasları ilə davam etdirib. İclaslarda görkəmli dövlət xadimi Heydər Əliyevin çoxcəhətli fəaliyyətinə həsr olunan məruzələr dinlənilib.

Tədbir çərçivəsində Ulu Öndərin zəngin irsini əks etdirən kitab sərgisi təşkil olunub.