Bakı, 21 dekabr (AZƏRTAC). Azərbaycan jurnalistlərindən ibarət nümayəndə heyəti Koreya Beynəlxalq Əməkdaşlıq Agentliyinin (KOİCA) təşkilatçılığı ilə bu ölkədə “Koreyanın inkişaf təcrübəsinin azərbaycanlı jurnalistlər tərəfindən öyrənilməsi” mövzusunda təlim proqramında iştirak etmişdir.

AZƏRTAC xəbər verir ki, təlim proqramının əsas məqsədi azərbaycanlı jurnalistləri Koreya Respublikasının tarixi, iqtisadi inkişafı, mədəniyyəti ilə yaxından tanış etmək idi.

Səfərin ilk günü jurnalistlər təlim proqramının rəhbəri xanım Na Yanq Kim ilə görüşmüşlər. Proqram barədə ətraflı məlumat verən Na Yanq Kim təmsil etdiyi agentlik ilə Azərbaycan hökuməti arasında sıx əlaqələrin olduğunu vurğulamış və mövcud əməkdaşlığın gələcəkdə daha da genişlənəcəyinə əminliyini qeyd etmişdir. O bildirmişdir ki, hazırda dünyanın 45 ölkəsində fəaliyyət göstərən KOİCA bu il Azərbaycanda artıq 4 layihə həyata keçirmişdir. Xanım Na Yang Kim, həmçinin agentliyin Azərbaycan Texniki Universiteti və Naxçıvan Dövlət Universiteti ilə əməkdaşlıq əlaqələrindən söhbət açmışdır. Bildirilmişdir ki, hazırda KOİCA Azərbaycan hökuməti ilə 2014-cü il üçün əməkdaşlıq proqramını müzakirə edir.

Azərbaycan nümayəndə heyəti Koreya Universitetinin professoru Yoo Seok-hoon ilə də görüşmüşdür. Ölkəsinin tarixi, mədəniyyəti və iqtisadi inkişafı barədə ətraflı danışan professor bildirmişdir ki, əlverişli coğrafi mövqeyə malik olduğundan Koreya Respublikası da Azərbaycan Respublikası kimi daim hücumlara məruz qalmışdır. Ölkəmizin tarixinə, mədəniyyətinə yaxşı bələd olduğunu qeyd edən Yoo Seok-hoon Azərbaycanın son illər əldə etdiyi hərtərəfli inkişafı yüksək qiymətləndirmişdir.

Səfər çərçivəsində azərbaycanlı jurnalistlər Koreyanın nüfuzlu “Asia Business Daily” qəzetinin baş redaktoru Park Jong İn, redaktoru Jae Hyun və digər rəhbər şəxsləri ilə görüşmüşlər. Qəzetin baş redaktoru Park Jong İn ölkələrimiz arasında sıx əməkdaşlıq əlaqələrindən danışmış, Azərbaycanın hərtərəfli inkişafını yüksək qiymətləndirmiş və rəhbəri olduğu qəzetin Azərbaycana olan marağını xüsusi qeyd etmişdir.

Qəzetin fəaliyyəti barədə məlumat verən redaktor Jae Hyun medianın Koreyanın inkişafında oynadığı mühüm roldan danışmışdır.

Azərbaycan Respublikası Nazirlər Kabineti mətbuat xidmətinin əməkdaşı Aygün Abbas “Asia Business Daily” qəzetinin rəhbərliyinə səmimi qəbula görə minnətdarlığını bildirmişdir.

Nazirlər Kabinetinin mətbuat xidmətinin fəaliyyəti barədə koreyalı jurnalistlərə ətraflı məlumat verən A.Abbas bildirmişdir ki, mətbuat xidmətinin əsas vəzifələrinə Baş nazirin və müavinlərin görüşləri barədə xəbərlərin, qəbul edilmiş qərarların dərc edilməsi, o cümlədən hökumət ilə ictimaiyyət arasında körpü yaratmaqdan ibarətdir.

Azərbaycanda kütləvi informasiya vasitələrinə dövlət dəstəyindən danışan A.Abbas ölkədə söz və məlumat azadlığının təmin edilməsinin, kütləvi informasiya vasitələrinin sərbəst fəaliyyətinə zəruri şərait yaradılmasının prioritet vəzifə kimi müəyyənləşdirildiyini bildirmişdir. O demişdir: “2009-cu ildə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması bu istiqamətdə atılmış mütərəqqi addımdır”.

Sonra nümayəndə heyətinin üzvləri təmsil etdikləri mətbuat orqanları barədə təqdimatlarla çıxış etmişlər.

Azərbaycan Dövlət Teleqraf Agentliyinin (AZƏRTAC) əməkdaşı Vüqar Əliyev agentliyin tarixi, fəaliyyəti, beynəlxalq əlaqələri və həyata keçirdiyi layihələr barədə koreyalı jurnalistlərə slaydlar əsasında ətraflı məlumat vermişdir. Prezident İlham Əliyevin ölkənin kütləvi informasiya vasitələrinin inkişafına verdiyi dəstəkdən, dövlətimizin başçısının 2008-ci il 31 iyul tarixli Sərəncamı ilə təsdiq edilmiş “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nın mətbuat-dövlət münasibətlərinin tənzimlənməsində oynadığı mühüm roldan danışan V.Əliyev demişdir: “Azərbaycan mətbuatı müasir informasiya cəmiyyəti quruculuğunda, sosial ədalətin və şəffaflığın təmin edilməsində, milli həmrəyliyin və tolerantlığın möhkəmləndirilməsində, demokratik özünüdərkin, siyasi mədəniyyətin inkişafında, milli mənəvi və ümumbəşəri dəyərlərin qorunub saxlanması və təbliğində mühüm rol oynayır”.

Səfərin sonuncu günü nümayəndə heyətinin üzvləri KOİCA-nın prezidenti Young Mok Kim, vitse-prezidenti Han Çoong və digər rəhbər şəxsləri ilə görüşmüşlər. Azərbaycanlı jurnalistləri səmimi salamlayan KOİCA-nın prezidenti rəhbərlik etdiyi agentliyin fəaliyyəti, beynəlxalq əlaqələri barədə ətraflı məlumat vermiş, agentlik ilə Azərbaycan arasında mövcud əlaqələri yüksək qiymətləndirmiş, bu əməkdaşlığın gələcəkdə daha da genişlənəcəyinə əminliyini bildirmişdir. O, Azərbaycanın son illərdə sürətli inkişafını yüksək dəyərləndirmişdir.

Koreya Respublikasına səfər çərçivəsində azərbaycanlı jurnalistlər Seul, Ulsan, Suvon və Sonnam şəhərlərində olmuş, “Hyundai” şirkətinin gəmiqayırma zavodunu və muzeyini, “SK Energy” şirkətini, “KBS Suwon” İncəsənət mərkəzini, “Seul qülləsi”ni, Milli Müasir Tarix Muzeyini, “SK T.um” şirkətini, “KBS Global” radio və televiziya şirkətini, “Gyeongbokgung” imperator sarayını, “Yoo ailəsi”ni ziyarət etmiş, məşhur “NANTA” teatrında tamaşaya baxmışlar.

Təlimin sonunda azərbaycanlı jurnalistlərə sertifikatlar təqdim edilmişdir.