CƏMİYYƏT


Azərbaycan nümayəndə heyəti “7-ci Sosial Biznes Günləri” beynəlxalq konfransında iştirak edir

Bakı, 28 iyul, AZƏRTAC

İyulun 28-də Banqladeşin paytaxtı Dəkkədə Nobel sülh mükafatı laureatı Məhəmməd Yunusun təşəbbüsü ilə “7-ci Sosial Biznes Günləri” beynəlxalq konfransı işə başlayıb.

Beynəlxalq Avrasiya Mətbuat Fondundan (BAMF) AZƏRTAC-a bildiriblər ki, tədbirdə Azərbaycan Respublikası əmək və əhalinin sosial müdafiəsi nazirinin müavini Mətin Kərimli, Dövlət Məşğulluq Xidmətinin rəis müavini Səbuhi Hüseynov, BAMF-ın prezidenti Umud Mirzəyev və təşkilatın vitse-prezidenti Ramil Əzizovdan ibarət nümayəndə heyəti iştirak edir.

İyulun 29-dək davam edəcək konfransda səmərəli müzakirələr aparılır.

“Sosial Biznes Günləri” konfransı Nobel Sülh Mükafatı laureatı, Yunus Sosial Biznes Mərkəzinin qurucusu Məhəmməd Yunusun qlobal çağırışı əsasında, dünyada kasıblığın aradan qaldırılması üçün sosial biznesin inkişafı, korporativ sosial məsuliyyətin beynəlxalq miqyasda təşviqi məqsədilə təşkil olunur. Builki tədbir dünyada maddi sərvətlərin konsentrasiyanın qarşısını almaqla yoxsulluğun aradan qaldırılması, iqtisadi azadlıqların təmin olunması, sosial proqramların və islahatların aparılması, eləcə də ətraf mühitin qorunması kimi mövzulara həsr edilib.

Tədbir çərçivəsində Azərbaycan nümayəndə heyəti Beynəlxalq Yunus Mərkəzini ziyarət edərək professor Məhəmməd Yunusla görüş keçirib. Görüşdə əmək və əhalinin sosial müdafiəsi nazirinin müavini Mətin Kərimli Azərbaycan Respublikasının Prezidenti İlham Əliyevin rəhbərliyi ilə aparılan sosial-iqtisadi islahatlar, son illərdə ölkə iqtisadiyyatında həyata keçirilən uğurlu iqtisadi şaxələndirmə siyasəti sayəsində əldə olunmuş sabit iqtisadi artım barədə məlumat verib.

Məhəmməd Yunus öz növbəsində 2016-cı ildə Beynəlxalq Avrasiya Mətbuat Fondunun dəvəti ilə Azərbaycana səfərini, ölkə prezidenti İlham Əliyev tərəfindən qəbul edilməsini və apardığı səmərəli müzakirələri, aidiyyəti dövlət qurumlarının, o cümlədən Əmək və Əhalinin Sosial Müdafiəsi Nazirliyinin rəhbərliyi ilə keçirdiyi görüşləri, ADA Universitetində müəllim və tələbə heyəti ilə görüşünü xatırladıb. Professor Azərbaycanın sosial inkişaf strategiyası modelinin əhəmiyyətini qeyd edib, ölkənin Birinci vitse-prezidenti Mehriban xanım Əliyevanın bu sahəyə diqqət və qayğısını yüksək dəyərləndirib. O, Azərbaycanın bu sahədə regionda aparıcı rola malik olduğunu və regionun sosial biznes mərkəzi olmaq potensialını qeyd edərək, Azərbaycan nümayəndə heyətini bu ilin noyabr ayında keçiriləcək Qlobal Sosial Biznes Sammitinə dəvət edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.