SİYASƏT
Azərbaycan nümayəndə heyəti Sofiyada keçirilən “Qara Dəniz-Fars Körfəzi” layihəsi üzrə ekspertlər görüşündə iştirak edib
Sofiya, 15 iyul, AZƏRTAC
Bolqarıstanda “Qara Dəniz-Fars Körfəzi” beynəlxalq nəqliyyat dəhlizinin yaradılması məqsədilə çoxtərəfli saziş layihəsinin müzakirəsinə dair ikinci ekspertlər görüşü keçirilib. Görüşdə Azərbaycan nümayəndə heyəti də iştirak edib.
AZƏRTAC xəbər verir ki, Azərbaycanın Bolqarıstandakı səfiri Nərgiz Qurbanova ölkəmizin “Şərq-Qərb” və “Şimal-Cənub” nəqliyyat dəhlizlərinin vacib iştirakçısı olmaqda davam edəcəyini bildirib. O, ölkə daxilində, eləcə də regionda müasir infrastrukturun yaradılmasında əldə etdiyi nailiyyətlər, hər iki dəhlizin kəsişməsində əlverişli coğrafi mövqeyi, eləcə də Qara, Aralıq dənizlərinin və Fars Körfəzinin dərin su limanlarına yaxınlığı, maliyyə dayanıqlığından irəli gələrək böyük həcmdə sərmayə qoymaq imkanı, trans-regional layihələrin həyata keçirilməsində çoxtərəfli əməkdaşlıq təcrübəsi kimi amillərin Azərbaycanı bu coğrafiyadakı bütün tranzit layihələrin əvəzolunmaz iştirakçısı kimi təsbit etdiyini bildirib.
Son illər ərzində Azərbaycanda fiziki infrastrukturun modernizasiyası və inşasına böyük miqdarda sərmayə yatırıldığını vurğulayan səfir Bakı-Tbilisi-Qars dəmiryolu layihəsi barədə danışıb. Bildirib ki, gələn il fəaliyyətə başlayacaq, ildə 1 milyon sərnişin və 20 milyon ton həcmində yük daşımaq qabiliyyəti olan dəmiryolu Avropa-Asiya dəmir yolu nəqliyyatında olan boşluğu aradan qaldıracaq.
Bakı Beynəlxalq Dəniz Ticarət Limanı və logistika mərkəzi olan Ələt limanının birinci mərhələsinin fəaliyyətə başladığını diqqətə çatdıran N.Qurbanova inşası tamamlandıqdan sonra limanın yükdaşıma qabiliyyətinin 25 milyon ton yük və 1 milyon TEU konteyner olacağını qeyd edib. Bildirib ki, cari il Azərbaycanın qonşu dövlətlərlə nəqliyyat əlaqələrinin irəlilədilməsi baxımından əhəmiyyətli il olub. Belə ki, Azərbaycan Prezidenti İlham Əliyevin fevralın 23-də İrana rəsmi səfərindən sonra Astara (Azərbaycan) və Astara (İran) dəmir yolunun inşasının sürətləndirilməsi ilə bağlı müvafiq sərəncam imzalayıb, Astara dəmir yolu körpüsünün inşasının cari ilin sonunadək başa çatması nəzərdə tutulur, o cümlədən Qəzvin-Rəşt-Astara dəmir yolu layihəsi də uğurla davam edir.
N.Qurbanova gələn ay Bakıda Azərbaycan, İran və Rusiya prezidentlərinin üçtərəfli görüşünün keçiriləcəyini də diqqətə çatdırıb. Çindən Azərbaycan, Gürcüstan və Ukrayna istiqamətində və əksinə ilk konteyner qatarları yürüşünün uğurlu olduğunu vurğulayan səfir bu üç ölkənin dəmiryol rəhbərlərinin Transxəzər nəqliyyat marşrutu çərçivəsində rəqabətqabiliyyətli nəqliyyat tarifləri barədə razılığa gəldiyini əlavə edib. O, Azərbaycan tərəfinin Trans-Avropa Nəqliyyat Şəbəkəsini (TEN) Asiya ilə birləşdirən TRACECA dəhlizinin potensialından tam istifadə edilməsinə böyük əhəmiyyət verdiyini bildirib.
Nəqliyyat sahəsində beynəlxalq əməkdaşlığın gücləndirilməsində mövcud çətinliklərə toxunan N.Qurbanova Cənubi Qafqazda həlli uzadılmış silahlı münaqişələrin regionda hərtərəfli əməkdaşlığa, o cümlədən nəqliyyat sahəsində əməkdaşlığa ciddi maneə yaratdığını deyib. Səfir bu münaqişələrin tezliklə həllinin regionda iqtisadi artım və bütün sahələrdə əməkdaşlıq üçün əlverişli şərait yaradacağını qeyd edib.
O, “Qara Dəniz-Fars Körfəzi” dəhlizi ilə bağlı aparılacaq bütün müzakirələrdə mövcud və ya tikilməkdə olan infrastrukturdan istifadə etməklə iqtisadi cəhətdən səmərəli və kommersiya baxımından əlverişli nəqliyyat layihələrinə üstünlük verilməsinin zəruri olduğunu vurğuladı və bu kontekstdə Azərbaycanın müvafiq infrastruktura malik olduğunu diqqətə çatdırıb.
Müzakirələrdə Nəqliyyat Nazirliyinin və “Azərbaycan Dəmir Yolları” Qapalı Səhmdar Cəmiyyətinin nümayəndələri də iştirak ediblər.
İqbal Hacıyev
AZƏRTAC-ın xüsusi müxbiri
Sofiya