REGİONLAR


Azərbaycan polisinin yaranmasının 98-ci ildönümü bölgələrdə qeyd edilib

A+ A

Ağcabədi, 2 iyul, AZƏRTAC

Azərbaycan polisinin yaranmasının 98-ci ildönümü və polis işçilərinin peşə bayramı bölgələrdə müxtəlif tədbirlərlə qeyd edilib.

AZƏRTAC xəbər verir ki, Ağcabədi rayonunun polis işçiləri ümummilli lider Heydər Əliyevin Ağcabədi şəhərinin mərkəzi meydanındakı abidəsini ziyarət edərək önünə gül-çiçək düzüb, xatirəsinə hörmət və ehtiramlarını bildiriblər.

Tədbirdə çıxış edənlər polis işçilərini peşə bayramları münasibətilə təbrik edib, ölkəmizdə sabitliyin və əmin-amanlığın qorunmasında polisin xidmətlərindən, dövlətin hüquq mühafizə orqanları işçilərinə göstərdiyi diqqət və qayğıdan söz açıb, Azərbaycan polisinin həmişə dövlətə, cəmiyyətə şərəflə xidmət etdiyini vurğulayıblar.

Sonra bir qrup polis əməkdaşına yeni rütbələr təqdim edilib. Xidmətdə fərqlənən polislərə fəxri fərmanlar, 2 nəfərə isə həyətyanı torpaq sahəsi verilib.

Polis işçiləri Heydər Əliyev Mərkəzini ziyarət edib, Ulu Öndərin zəngin həyat və fəaliyyətini əks etdirən eksponatlarla tanış olublar.

X X X

Polis işçilərinin peşə bayramı cəbhə bölgəsində yerləşən Tərtər şəhərində də qeyd edilib. Rayonun polis işçiləri ulu öndər Heydər Əliyevin şəhərin mərkəzi meydanda ucaldılmış abidəsi önünə tər gül-çiçək dəstələri düzüb, dahi rəhbərin xatirəsinə ehtiramlarını bildiriblər.

Gənclər Mərkəzində davam edən tədbirdə rayon polis şöbəsinin rəisi Rauf Məcidov məruzə ilə çıxış edərək, Azərbaycan polisinin keçdiyi tarixi yola nəzər salıb. Bildirib ki, 98 illik tarixə malik Azərbaycan polisi şərəfli bir yol keçib, Vətənə, xalqa sədaqətlə və ləyaqətlə xidmət edib, dövlətçiliyin əsas sütunlarından birinə çevrilib.

Tərtər Rayon İcra Hakimiyyətinin başçısı Müstəqim Məmmədov peşə bayramı münasibətilə polis işçilərini təbrik edib, onlara çətin və şərəfli işlərində uğurlar arzulayıb.

Bildirib ki, 1993-cü ildə ulu öndər Heydər Əliyevin xalqın təkidli tələbi ilə hakimiyyətə qayıdışından sonra həyata keçirilən zəruri tədbirlər ölkənin ictimai-siyasi həyatında hərtərəfli islahatların gerçəkləşməsi ilə nəticələnib. Müsbət dəyişikliklər fonunda hüquq mühafizə orqanlarının, o cümlədən polisin fəaliyyətinin gücləndirilməsi, xalqa, dövlətə sədaqətli şəxsi heyətin formalaşdırılması və qanunun aliliyini əsas prinsip kimi qiymətləndirən əməkdaşların peşə xidmətinə cəlb edilməsi kimi önəmli addımlar atılıb. Ulu öndər Heydər Əliyevin rəhbərliyi altında həyata keçirilən islahatlar çərçivəsində daxili işlər orqanlarının fəaliyyətini, habelə insan hüquq və azadlıqlarının təmin edilməsi mexanizmlərini tənzimləyən qanunvericilik bazası yaradılıb, ölkədə mütəşəkkil cinayətkarlığa, sabitliyə təhdid yaradan təhlükələrə qarşı uğurlu mübarizəyə nail olunub, vətəndaşların dinc, əmin-amanlıq içərisində yaşamaları üçün lazımi şərait yaradılıb.

Sonda xidmətdə fərqlənən bir qrup polis işçisinə fəxri fərman, qiymətli hədiyyələr və pul mükafatı təqdim edilib.

X X X

Polis işçilərinin peşə bayramı münasibətilə Quzanlı qəsəbəsindəki Ağdam Dövlət Dram Teatrında keçirilən tədbirdə çıxış edənlər Azərbaycan polisinin keçdiyi yoldan, ölkədə ictimai-siyasi sabitliyin, əmin-amanlığın, dincliyin təmin edilməsində polisin fəaliyyətindən danışıblar. Bildirilib ki, 1918-ci il iyulun 2-də Azərbaycan Xalq Cümhuriyyəti hökumətinin qərarı ilə əsası qoyulan milli polis ötən dövr ərzində çətin və şərəfli bir yol keçib.

Diqqətə çatıdılırıb ki, vətəndaşların hüquq və azadlıqlarının keşiyində ayıq-sayıq dayanan polis əməkdaşları vətənimizin ərazi bütövlüyü uğrunda gedən mübarizədə də fəal iştirak ediblər. Azərbaycanın ərazi bütövlüyü uğrunda döyüşlərdə Ağdam rayon polis şöbəsinin əməkdaşlarıından 37 nəfər şəhid olub, 112 nəfər yaralanıb, 4 nəfər Azərbaycanın Milli Qəhrəmanı adına layiq görülüb.

Tədbirdə xidmətdə fərqlənən bir qrup polis əməkdaşına fəxri fərman və hədiyyələr, şəhid ailələrinə pul mükafatı verilib.

X X X

Füzuli rayonunun polis işçiləri iyulun 2-də ümummilli lider Heydər Əliyevin Horadiz şəhərindəki abidəsi önünə tər gül-çiçək dəstələri qoyaraq, dahi rəhbərin xatirəsinə ehtiramlarını bildiriblər.

Füzuli Dövlət Dram Teatrında keçirilən tədbir Azərbaycanın Dövlət Himninin səsləndirilməsi ilə başlanıb.

Rayon polis şöbəsinin rəisi Xəqani Məmmədovun Azərbaycan polisinin keçdiyi şərəfli yoldan bəhs edən məruzəsi dinlənilib.

Füzuli Rayon İcra Hakimiyyətinin başçısı Alı Alıyev polis işçilərini peşə bayramları münasibətilə təbrik edib, ölkəmizdə sabitliyin və əmin-amanlığın qorunmasında polis işçilərinin xidmətlərindən, dövlətin hüquq mühafizə orqanları işçilərinə göstərdiyi diqqət və qayğısından söz açıb. Bildirib ki, Azərbaycanın ərazi bütövlüyü uğrunda gedən döyüşlərdə rayon polis şöbəsinin 16 əməkdaşı şəhid olub. Onlardan iki nəfəri Azərbaycan Respublikasının Milli Qəhrəmanı adına layiq görülüb.

Sonra xidmətdə fərqlənən polis əməkdaşlarına fəxri fərmanlar və qiymətli hədiyyələr təqdim olunub.

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.