SİYASƏT


Azərbaycan və Anqola arasında münasibətlərin inkişaf perspektivləri müzakirə olunub

A+ A

Bakı, 20 oktyabr, AZƏRTAC

Azərbaycanın Cənubi Afrika Respublikasındakı səfiri Elxan Poluxov Anqola Respublikasına səfəri çərçivəsində bu ölkənin iqtisadiyyat, ali təhsil və gənclər və idman nazirləri ilə görüşüb.

Səfirlikdən AZƏRTAC-a bildiriblər ki, Anqolanın gənclər və idman naziri Qonsalvis Muandumba ilə görüşdə səfir E.Poluxov Azərbaycan hökuməti tərəfindən idman sahəsinə göstərilən xüsusi diqqət və qayğının nəticəsində ölkəmizin genişmiqyaslı idman oyunlarının yüksək səviyyədə təşkil edildiyi bir məkana çevrildiyini bildirib. Azərbaycanın birinci Avropa Oyunları, “Formula-1”, Ümumdünya Şahmat Olimpiadası kimi mötəbər idman tədbirlərinə ev sahibliyi etdiyini vurğulayıb. Həmçinin səfir ölkədə tikilən Olimpiya idman mərkəzlərinin gənc nəslin sağlam formalaşmasında oynadığı mühüm roldan danışıb.

İqtisadiyyat naziri Abraho Piu dos Santos Qurjellə görüşdə səfir əsası ümummilli lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən iqtisadi inkişaf strategiyası barədə danışıb. Həmçinin həyata keçirilən və gündəlikdə duran qlobal və regional əhəmiyyətli enerji və infrastruktur layihələrini qeyd edib. Azərbaycan hökuməti tərəfindən qeyri-neft sektorunun inkişafına xüsusi önəm verildiyini bildirən səfir bu xüsusda kosmik sənayenin yaradılması istiqamətində görülən işlərdən və ölkəmizin Afrika regionunu da əhatə edən ilk milli peyki “Azerspace-1” barədə məlumat verib. Həmçinin “Made in Azerbaijan” brendinin təbliğinin iqtisadi siyasətin prioritet istiqamətlərindən biri olduğunu vurğulayaraq, qida məhsullarının ixraci sahəsində əməkdaşlıq üçün geniş imkanların olduğunu deyib.

Ali təhsil naziri Ado do Nasimentu ilə görüş zamanı səfir E.Poluxov Azərbaycanın təhsil ocaqları barəsində söz açaraq, tələbə-müəllim mübadiləsi, təqaüd proqramları barədə məlumat verib. Azərbaycan və Anqola arasında təhsil sahəsində əməkdaşlığın dərin köklərə malik olduğunu bildirən səfir hazırda Anqola hökumətində təmsil olunan bir sıra nazirlərin, ö cümlədən Prezident Joze Eduardo dos Santosun Azərbaycan Neft Akademiyasının məzunu olduğunu əlavə edib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.