İQTİSADİYYAT


Azərbaycan və BMT arasında iki İnkişafa Yardım Çərçivə Sənədi icra edilib

A+ A

Bakı, 1 oktyabr, AZƏRTAC

Minilliyin İnkişaf Məqsədlərinə nail olunması məqsədilə indiyədək Azərbaycan və BMT arasında iki İnkişafa Yardım Çərçivə Sənədi icra edilib.

İqtisadiyyat Nazirliyinin mətbuat xidmətindən AZƏRTAC-a bildiriblər ki, bu barədə iqtisadiyyat naziri Şahin Mustafayev V Bakı Beynəlxalq Humanitar Forumunda iştirak etmək məqsədilə ölkəmizdə səfərdə olan BMT-nin baş katibinin müavini, BMT İnkişaf Proqramı rəhbərinin müavini, Avropa və MDB üzrə Regional Büronun direktoru xanım Cihan Sultanoğlu ilə görüşündə bildirib.

Görüşdə Azərbaycanın BMT-nin bir sıra proqram və ixtisaslaşmış qurumları - İnkişaf Proqramı (UNDP), Sənaye İnkişaf Təşkilatı (UNİDO), Mərkəzi Asiya Ölkələri İqtisadiyyatları üçün Xüsusi Proqramı (SPECA), Ticarət və İnkişaf üzrə Konfransı (UNCTAD) və digərləri çərçivəsində mövcud əlaqələr və əməkdaşlıq perspektivləri müzakirə olunub.

Nazir Şahin Mustafayev ölkəmizin BMT ilə əlaqələrinin yüksək səviyyədə olduğunu, Azərbaycanın BMT-nin bir çox təşəbbüs və proqramlarına, Minilliyin İnkişaf Məqsədlərinə, həmçinin yeni Davamlı İnkişaf Məqsədlərinə (DİM) qoşulduğunu xatırladıb. Qeyd olunub ki, Minilliyin İnkişaf Məqsədlərinə nail olunması məqsədilə indiyədək Azərbaycan və BMT arasında iki İnkişafa Yardım Çərçivə Sənədi icra edilib. BMT ilə Azərbaycan arasında 2016-2020-ci illərdə əməkdaşlığı əhatə edən tərəfdaşlıq çərçivə sənədi - UNAPF bu il imzalanıb.

Azərbaycanın BMT-nin bir sıra qurumları ilə fəal əməkdaşlıq etdiyini, ölkəmizin 2012-2013-cü illərdə BMT Təhlükəsizlik Şurasının qeyr-daimi üzvü olduğunu vurğulayan Şahin Mustafayev Bakıda BMT-nin bir sıra tədbirlərinin keçirildiyini, bu il Azərbaycanın SPECA-ya həmsədrlik etdiyini diqqətə çatdırıb, əməkdaşlığın inkişaf perspektivlərinə dair fikirlərini bölüşüb.

Şahin Mustafayev Ermənistan-Azərbaycan, Dağlıq Qarabağ münaqişəsinə dair ölkəmizin ədalətli mövqeyini bir daha diqqətə çatdırıb, Ermənistanın hələ də münaqişəyə dair BMT-nin 4 qətnaməsinə əməl etmədiyini, münaqişənin region üçün ciddi təhlükə yaratdığını vurğulayıb.

Xanım Cihan Sultanoğlu Azərbaycanın qısa müddətdə iqtisadi və sosial sahələrdə böyük uğurlar qazandığını, ölkəmizin BMT-nin fəal üzvlərindən olduğunu qeyd edib. Azərbaycan və BMT arasında həyata keçirilən proqramlar və əməkdaşlıq istiqamətlərindən danışan xanım Cihan Sultanoğlu BMT-nin təşəbbüslərinin Azərbaycanda həyata keçirilən müxtəlif proqramlarda öz əksini tapmasının əhəmiyyətini qeyd edib, qurumun yerli nümayəndəliyi ilə işgüzar əlaqələrdən məmnunluğunu bildirib, BMT-nin DİM və UNAPF üzrə icra mexanizmlərinin müəyyənləşdirilməsi üzrə əməkdaşlığın davam etdiriləcəyini vurğulayıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.