London, 12 fevral, AZƏRTAC

Londonda Azərbaycan və Böyük Britaniya Xarici İşlər nazirlikləri arasında siyasi məsləhətləşmələr keçirilib.

Siyasi məsləhətləşmələrdə iştirak edən Azərbaycan nümayəndə heyətinə xarici işlər nazirinin müavini Xələf Xələfov, Böyük Britaniya nümayəndə heyətinə isə Avropa məsələləri üzrə dövlət naziri Devid Lidinqton başçılıq edib.

Tədbirdə Azərbaycan və Böyük Britaniya arasında siyasi dialoqun yüksək səviyyədə olduğu vurğulanıb. Azərbaycan-Böyük Britaniya hökumətlərarası komissiyasının Londonda keçirilmiş ilk iclasının ölkələrimiz arasında qeyri-enerji sahələri başda olmaqla, iqtisadi əməkdaşlığın genişləndirilməsinə töhfə verəcəyinə əminlik ifadə olunub.

Xələf Xələfov ilk dəfə bu formatda keçirilən siyasi məsləhətləşmələrin bundan sonra da davam etdiriləcəyinə ümidvar olduğunu və bu formatın ikitərəfli münasibətlərin müxtəlif aspektləri ətrafında fikir mübadiləsinə imkan yaratdığını nəzərə çatdırıb. O, iki ölkə arasında yüksək səviyyəli siyasi təmasların, xüsusilə də Böyük Britaniyadan Azərbaycana yüksək səviyyəli səfərlərin həyata keçirilməsinin ikitərəfli əməkdaşlığı dərinləşdirmək baxımından vacibliyini diqqətə çatdırıb.

Nazir müavini humanitar və mədəni sahələrdə əməkdaşlığın mövcud səviyyəsinin qənaətbəxş olduğunu və bu sahələrdə əməkdaşlığı dərinləşdirmək istiqamətində geniş potensialın olduğunu bildirib.

Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində aparılan danışıqların cari vəziyyətinə toxunan X.Xələfov Böyük Britaniyanın Azərbaycanın ərazi bütövlüyü və suverenliyi ilə əlaqədar mövqeyini yüksək qiymətləndirib. O, Azərbaycanın işğal olunmuş ərazilərinə qeyri-qanuni səfərlərin qarşısının alınması istiqamətində Böyük Britaniya tərəfindən müvafiq addımların atılmasının zəruriliyini vurğulayıb.

Dövlət naziri Devid Lidinqton Azərbaycanla Böyük Britaniya arasında strateji tərəfdaşlıq münasibətlərinə toxunaraq, ölkəsinin Azərbaycanla əməkdaşlığa xüsusi əhəmiyyət verdiyini qeyd edib. O, dinamik inkişaf edən ikitərəfli əməkdaşlığın daha da genişləndirilməsi baxımından geniş potensialın olduğunu nəzərə çatdırıb. Böyük Britaniyanın Azərbaycanın Dağlıq Qarabağ bölgəsi də daxil olmaqla, ərazi bütövlüyünə dəstəyinin bundan sonra da qətiyyətli şəkildə davam edəcəyini vurğulayan D.Lidinqton ölkəsinin qondarma separatçı rejimi tanımadığını və bu rejimlə rəsmi səviyyədə hər hansı təmasının olmadığını deyib.

Dövlət naziri, həmçinin Azərbaycanın beynəlxalq terrorçuluğa qarşı mübarizəyə verdiyi töhfəni, eləcə də beynəlxalq təşkilatlar çərçivəsində, xüsusilə də Azərbaycanın 2012-2013-cü illərdə BMT Təhlükəsizlik Şurasının qeyri-daimi üzvü kimi müsbət fəaliyyətini yüksək qiymətləndirib və Azərbaycan tərəfinə təşəkkürünü bildirib.

Siyasi məsləhətləşmələr çərçivəsində, həmçinin Cənubi Qafqaz, Xəzər hövzəsi və Mərkəzi Asiya regionunda cərəyan edən geosiyasi proseslər, Yaxın Şərq, xüsusilə də Suriyada baş verən proseslər ətrafında fikir mübadiləsi aparılıb.

Orxan İsmayılov

AZƏRTAC-ın xüsusi müxbiri

London