REGİONLAR
Azərbaycan və Fransa aqrar sahədə əməkdaşlığı genişləndirmək niyyətindədirlər
Bakı, 23 fevral, AZƏRTAC
Azərbaycanın kənd təsərrüfatı naziri Heydər Əsədovun rəhbərlik etdiyi nümayəndə heyəti Fransada səfərdə olub.
Nazirliyin mətbuat xidmətindən AZƏRTAC-a bildiriblər ki, səfər zamanı nazir Heydər Əsədov “İqlim dəyişiklikləri şəraitində kənd təsərrüfatı” mövzusunda keçirilən konfransda iştirak edib. Konfransda iqlim dəyişikliklərinin mənfi təsirlərinin kənd təsərrüfatı sahəsi üçün yaratdığı təhdidlər və iqlim dəyişikliklərinə kənd təsərrüfatı sahəsinin adaptasiya olunması məsələləri müzakirə olunub. Həmçinin iqlim dəyişikliklərinin təsirlərinə adaptasiya məqsədilə müvafiq texnologiyaların kiçik təsərrüfatlar və ailə-kəndli təsərrüfatları tərəfindən istifadəsinin hökumətlər tərəfindən təşviqi, bu sahəyə investisiyaların artırılması məsələləri barədə fikir mübadiləsi aparılıb.
Tədbirdə Fransa Prezidenti Fransua Olland da çıxış edib və iqlim dəyişikliklərinin mənfi təsirləri ilə mübarizə aparmağın yalnız birgə səylər nəticəsində mümkün olduğunu bildirib.
Səfər çərçivəsində kənd təsərrüfatı naziri Heydər Əsədov Fransanın kənd təsərrüfatı, qida və meşəçilik naziri Stefan le Foll ilə də görüşüb. Görüşdə Fransa Prezidentinin 2014-cü ilin may ayında ölkəmizə səfəri zamanı imzalanmış Anlaşma Memorandumunun əməkdaşlıq üçün hüquqi baza yaratdığı qeyd olunub, əməkdaşlığın davam etdirilməsi məqsədilə işçi qrupun yaradılmasının vacibliyi vurğulanıb. Görüşdə, həmçinin Fransa iş adamları tərəfindən ölkəmizin kənd təsərrüfatı sahəsinə investisiya qoyuluşu ilə bağlı məsələlər, südçülük, üzümçülük, cins heyvandarlıq, süni mayalanma və digər sahələrdə əməkdaşlıq imkanları müzakirə olunub.
Nazir Heydər Əsədov bu sahələrdə investisiya qoyuluşu üçün ölkəmizdə mövcud olan imkanları diqqətə çatdırıb.
Fransalı nazir ölkəmizin investisiya imkanları ilə yaxından tanış olmaq məqsədilə Azərbaycana Fransanın kənd təsərrüfatı və ərzaq sənayesi sahəsini təmsil edən iş adamlarının, habelə təcrübə mübadiləsi məqsədilə nümayəndə heyətinin göndərilməsi məsələsini nəzərdən keçirəcəyini bildirib. Nazir Heydər Əsədov həmkarını 2015-ci ilin noyabr ayında keçiriləcək Gəncə Şərab Festivalına dəvət edib.
Səfər zamanı kənd təsərrüfatı naziri Heydər Əsədov Paris şəhərində keçirilən 52-ci Beynəlxalq kənd təsərrüfatı sərgisinin açılış mərasimində iştirak edib. Nazir sərgi ilə tanış olub, Fransanın baytarlıq avadanlıqları istehsal edən və kənd təsərrüfatı heyvanlarının süni mayalanması üzrə ixtisaslaşan təşkilatlarının nümayəndələri ilə görüşərək danışıqlar aparıb.
Heydər Əsədov sərgidə BMT-nin Ərzaq və Kənd Təsərrüfatı Təşkilatının (FAO) baş direktoru Joze Qratsiano da Silva ilə görüşüb. Görüş zamanı FAO ilə ölkəmiz arasında əməkdaşlığın cari vəziyyəti və perspektivləri, habelə FAO-nun Azərbaycanda Əlaqələndirmə və Tərəfdaşlıq Ofisinin açılması ilə bağlı məsələlər müzakirə olunub.
Avropa Bitki Mühafizəsi Təşkilatının baş direktoru Martin Vard ilə görüşdə Azərbaycanda fitosanitariya və bitki mühafizəsi sahəsində milli standartların hazırlanmasına və laboratoriyaların akkreditasiyasına təşkilat tərəfindən dəstəyin göstərilməsi ilə bağlı fikir mübadiləsi aparılıb.
Dünya Heyvan Sağlamlığı Təşkilatının baş katibi Bernard Valla ilə keçirilən görüşdə isə təşkilatla ölkəmiz arasında əməkdaşlığın mövcud vəziyyəti, o cümlədən Azərbaycanda baytarlıq sahəsinin inkişafı strategiyasının hazırlanmasına yardım göstərilməsi, ümumilikdə heyvan xəstəliklərinə qarşı birgə mübarizə tədbirləri kimi məsələlər müzakirə edilib.