SİYASƏT
Azərbaycan və İordaniya beynəlxalq təşkilatlar çərçivəsində qarşılıqlı faydalı əməkdaşlıq edirlər
Bakı, 28 aprel, AZƏRTAC
Azərbaycanın İordaniyadakı səfiri Sabir Ağabəyov aprelin 27-də bu ölkənin xarici işlər və diaspora məsələləri naziri Ayman əs-Safadı ilə görüşüb.
Səfirlikdən AZƏRTAC-a verilən məlumata görə, görüşdə səfir S.Ağabəyov ölkələrimiz arasında uğurlu dostluq və əməkdaşlıq əlaqələrindən danışıb. Prezident İlham Əliyev ilə Kral II Abdullah arasındakı şəxsi dostluq münasibətlərinin iki ölkə arasındakı əlaqələrə müsbət təsirindən bəhs edib, bu əməkdaşlığın daha da gücləndiriləcəyinə əminliyini bildirib.
Görüşdə beynəlxalq təşkilatlar çərçivəsində ölkələrimiz arasındakı qarşılıqlı faydalı əməkdaşlıqdan, iqtisadi sahədə əlaqələrin inkişaf etdirilməsi üçün həyata keçirilən qarşılıqlı cəhdlərdən, müxtəlif sahələrdə münasibətlərin daha da genişləndirilməsinə xidmət edən səfərlərdən ətraflı bəhs edilib. Səfir bir neçə gün əvvəl İordaniya Senatının sədri F.əl-Fayezin Bakıya uğurlu səfəri, habelə cari ilin mayın 5-6-da IV Ümumdünya Mədəniyyətlərarası Dialoq Forumunda iştirak etmək məqsədilə Şahzadə xanım Dana Firasın və Böyük Əmman Bələdiyyə Komitəsinin sədri Yusif əş-Şəvaribənin başçılığı ilə İordaniya nümayəndə heyətinin, mayın 9-dan 13-dək İordaniya Parlamenti Nümayəndələr Palatasının sədri A.ət-Taraunehin başçılığı ilə parlament nümayəndə heyətinin və mayın 12-dən 22-dək IV İslam Həmrəyliyi Oyunlarında iştirak etmək üçün İordaniyanın 107 nəfərdən ibarət idman nümayəndə heyətinin Bakıya nəzərdə tutulan səfərləri haqqında qarşı tərəfə məlumat verib.
Nazir A.əs-Safadi iki ölkə arasında əməkdaşlıq münasibətlərinin daha da inkişaf etdirilməsi üçün dövlət başçılarında möhkəm siyasi iradənin olduğunu bildirib.
İordaniyalı nazir 2008-ci ildə Kral II Abdullah Azərbaycana səfər edərkən nümayəndə heyəti tərkibində ölkəmizdə olduğunu deyib və 2009-cu ildə Prezident İlham Əliyevin İordaniyaya səfərini məmnunluqla xatırlayıb və iki ölkə arasında əməkdaşlıq əlaqələrinin daha da inkişaf etdirilməsi üçün səylərin gücləndirilməsinin zəruriliyini vurğulayıb. O, iqtisadi əlaqələrin inkişaf səviyyəsinin siyasi münasibətlər səviyyəsinə yüksəldilməsinin vacibliyini diqqətə çatdırıb.
Görüşdə Ermənistan-Azərbaycan, Dağlıq Qarabağ münaqişəsinin tarixi kökləri, Ermənistanın həyata keçirdiyi təcavüzkar və etnik təmizləmə siyasəti, Azərbaycan xalqına qarşı törədilmiş soyqırımları, Azərbaycan ərazisinin 20 faizinin işğal olunması, işğal nəticəsində 1 milyondan çox vətəndaşımızın qaçqın və köçkün vəziyyətinə düşməsi, münaqişənin həlli ilə bağlı Azərbaycanın mövqeyi, uğurlu aprel döyüşləri və həmin döyüşlər nəticəsində düşməndən azad edilmiş ərazilərdə aparılan yenidənqurma işləri barədə qarşı tərəfə ətraflı məlumat verilib. Münaqişə ilə bağlı İordaniyanın ədalətli və sadiq mövqeyinə görə təşəkkür ifadə edilib.
Sonda səfir S.Ağabəyov İordaniyanın nazirinə Azərbaycan və Bakı şəhəri haqqında, Dağlıq-Qarabağ münaqişəsi və Xocalı soyqırımı barədə nəfis tərtibatda nəşr olunmuş kitablar və disklər təqdim edib.
Görüşdə səfirliyin müşaviri İ.Əliyev iştirak edib.