Bakı, 26 may, Zərəngiz Mansurova, AZƏRTAC

Azərbaycan Yazıçılar Birliyi (AYB) və Türkiyədə fəaliyyət göstərən Avrasiya Sənət, Mədəniyyət və Ədəbiyyat Federasiyasının (ASKEF) birgə təşkilatçılığı ilə Şəkidə yazıçı, şair, musiqiçi və KİV nümayəndələrinin görüşü keçirilib.

AZƏRTAC xəbər verir ki, görüş iştirakçıları əvvəlcə şəhərin mərkəzində ucaldılmış türk dünyasının böyük şairi və Azərbaycanın Xalq Şairi Bəxtiyar Vahabzadənin abidəsi önünə gələrək, tər çiçək dəstələri düzüblər.

Türkiyəli qonaqlar Şəkinin küçələrində əlində iki qardaş ölkənin - Türkiyə və Azərbaycanın bayraqlarını tutmuş izdihamla birgə irəliləyiblər. Özlərini doğma torpaqlarındakı kimi hiss edən sənət adamları fikirlərini paylaşıb, yerli əhali ilə ünsiyyət qurublar.

Sonra “Şəki-Palas” otelinin konfrans zalında davam edən görüş iki ölkənin Dövlət himninin səslənməsi ilə başlayıb.

AYB-nin katibi İlqar Fəhmi qonaqları salamlayaraq, TÜRKSOY-un mədəniyyət nazirlərinin Daimi Şurası tərəfindən Şəkinin 2016-cı il “Türk dünyasının mədəniyyət paytaxtı” elan olunmasını iftixar hissi ilə xatırladıb. Bildirib ki, füsunkar təbiəti, nadir tarixi-memarlıq abidələri, inkişaf etmiş sənətkarlığı, zəngin mədəni irsi ilə diqqət çəkən Şəkinin bu şərəfə layiq görülməsi unikal mədəniyyətimizin təşviqində əhəmiyyətli rol oynayacaq.

ASKEF-in sədri Savaş Ünal Azərbaycanda, qədim Şəki torpağında qonaq olmalarından məmnunluğunu bildirib, tarixən qardaş olan xalqlarımızın ədəbiyyatlarının da, mənəviyyatlarının da yaxınlığını vurğulayıb. Savaş Ünal ulu öndər Heydər Əliyevin və böyük Atatürkün müqəddəs yolunun davamçıları olan Prezident İlham Əliyev və Rəcəb Tayyib Ərdoğan tərəfindən bu qardaşlığın davam etdirildiyini, “Bir millət-iki dövlət” olaraq mehriban münasibətlərin sənət adamları qarşısında daha geniş imkanlar açdığını deyib. Qeyd edib ki, belə tədbirlərin keçirilməsində əsas məqsəd Türkiyə və Azərbaycanın ədəbiyyat, incəsənət xadimləri və müasir KİV-lər arasında əlaqələri genişləndirməkdir. Hər kəsin bu təşəbbüsə ürəkdən qoşulması xalqlarımızın biri-birinə böyük sevgi və ehtiyacından xəbər verir.

Tədbirdə İraq-Türkmən Ədəbiyyatçılar Birliyinin təmsilçisi Esed Erbil, Şimali Kipr Ağdəniz Universitetinin professoru İbrahim Baktır, Bakı Dövlət Universitetinin jurnalistika fakültəsinin müəllimi, filologiya üzrə fəlsəfə doktoru Natəvan Dəmirçioğlu və başqaları tədbir iştirakçılarının sənəti, qələmi və sözləri ilə ortaq türk düşüncəsini bölüşmək üçün bir araya gəldiyini bildiriblər.

Mərasimdə Xocalı soyqırımı və Çanaqqala savaşını əks etdirən videoçarx nümayiş olunub, “Qarabağ şikəstəsi” səslənib, Bosniya-Hersoqovina, Kərkük, Suriya hadisələrinə həsr olunmuş şeirlər oxunub. Sonda incəsənət ustaları konsert proqramı təqdim ediblər.

Türkiyəli qonaqlar Bakıda - AYB-də, Azərbaycan Dillər Universitetində, Atatürk Mərkəzində də görüşlər keçirəcək, şəhərin tarixi məkanları ilə tanış olacaqlar.