CƏMİYYƏT


Azərbaycanda 2013-cü ildən malyariyaya yerli yoluxma halları qeydə alınmayıb VİDEO

A+ A

Bakı, 17 avqust, AZƏRTAC

Ölkəmizdə 2010-2016-cı illər ərzində 35 rayon mərkəzinin su təchizatı və kanalizasiya sistemlərinin layihələrinin ekspertizası aparılıb, 9 rayon mərkəzində isə həmin sistemlərin istismara verilməsinə müsbət rəylər verilib.

AZƏRTAC xəbər verir ki, bu fikirlər Səhiyyə Nazirliyinin Respublika Gigiyena və Epidemiologiya Mərkəzinin fəaliyyətinə həsr edilmiş “dəyirmi masa”da səsləndirilib.

Mərkəzin direktor əvəzi Vaqif Abdullayev qeyd edib ki, Kür və Ceyranbatan sutəmizləyici qurğularından ayda bir dəfə, mərkəzi su anbarları və nasos stansiyalarından həftədə bir dəfə su nümunələri götürülərək Respublika Gigiyena və Epidemiologiya Mərkəzinin laboratoriyasında müayinə olunur. Bundan əlavə, 52 rayonun 2683 kəndində 3647 su mənbəyindən laboratoriya müayinələri təşkil edilib, 2835 su mənbəyinin vəziyyəti mütəxəssislər tərəfindən yerində araşdırılıb, 39 rayonda vəziyyət haqqında rayonların icra hakimiyyətlərinə təkliflər verilib. Çimərlik ərazilərində dəniz suyunun keyfiyyət göstəricilərinə hər il laborator tədqiqat üsullarının tətbiqi ilə nəzarət olunur. Səbail rayonun Şıx və Qaradağ rayonunun Sahil çimərliklərinin sanitariya mühafizə zolaqlarında dəniz suyunun intensiv çirklənmə hallarının davam etməsini nəzərə alaraq həmin ərazilərdə çimərliklərin istifadəsinin müvəqqəti olaraq qadağan edilməsi barəsində Respublika Gigiyena və Epidemiologiya Mərkəzi tərəfindən qəbul edilmiş qərar qüvvədə saxlanılıb.

“Yoluxucu xəstəliklərin qarşısının alınması işində uşaqların peyvənd olunması xüsusi əhəmiyyət kəsb edir. Azərbaycanda uşaqların inkişaf etmiş Avropa ölkələrində olduğu kimi, 11 xəstəliyə qarşı peyvənd edilməsi təmin edilib. Nazirlər Kabineti tərəfindən qəbul olunmuş “2016-2020-ci illər üçün yoluxucu xəstəliklərin immunoprofilaktikasına dair Tədbirlər Proqramı”na əsasən 2016-cı ilin aprel ayında respublikanın bütün şəhər və rayonlarında üçvalentli OPV vaksinin istifadəsi dayandırılıb, ikivalentli OPV vaksinin istifadəsinə başlanılıb”. Bunu isə Respublika Gigiyena və Epidemiologiya Mərkəzi direktorunun epidemiologiya məsələləri üzrə müavini Afaq Əliyeva deyib. Onun sözlərinə görə, Dünya Səhiyyə Təşkilatı tərəfindən qızılca və məxmərək xəstəliklərinə qarşı Azərbaycanda aparılan tədbirlər yüksək qiymətləndirilib. Qızılca və məxmərəyin ləğvi üzrə DST-nin Avropa regional komissiyasının 2015-ci ilin oktyabr ayında keçirilən iclasında Azərbaycanda qızılca və məxmərək xəstəliklərinin eliminasiyası elan edilib. Malyariya əleyhinə aparılmış məqsədyönlü kompleks əksepidemik tədbirlər nəticəsində 2013-cü ildən etibarən bu xəstəliyə yerli yoluxma halları qeydə alınmayıb. Bununla da, ölkə ərazisində malyariyanın tam ləğvinə nail olunub. Beynəlxalq təşkilatlarla sıx əməkdaşlıq şəraitində aparılmış səmərəli profilaktik və əksepidemik tədbirlərin həyata keçirilməsi, profilaktik peyvənd işlərinin ən müasir tələblər səviyyəsində təkmilləşdirilməsi nəticəsində idarəolunan xəstəliklərdən 1995-ci ildən poliomielit, 2008-ci ildən məxmərək, 2010-cu ildən difteriya, 2014-cü ildən qızılca və göyöskürək xəstəlikləri baş verməyib, epidemik parotit xəstəliyinin minimum səviyyəsi müşahidə edilib.

Tədbirdə qeyd olunub ki, Respublika Gigiyena və Epidemiologiya Mərkəzi tabeliyində olan 74 gigiyena və epidemiologiya mərkəzi, 6 dezinfeksiya stansiyası və 45 profilaktik dezinfeksiya şöbəsinin fəaliyyətinə təşkilati-metodik rəhbərliyi təmin etməklə genişmiqyaslı tədbirlərin həyata keçirilməsini təşkil edir. Son beş il ərzində gigiyena, epidemiologiya və laboratoriya ixtisasları üzrə 1110 həkim və 2 minə yaxın orta tibb işçisi təkmilləşmə və ixtisasartırma kursları keçməklə, test imtahanlarını verərək sertifikat alıblar. Dövlətimizin başçısının uğurla apardığı sosial və iqtisadi siyasətin nəticəsi olaraq əldə edilmiş güclü tərəqqi səhiyyənin profilaktik istiqamətinin aparıcı qüvvəsi olan sanitariya-epidemioloji xidmətin fəaliyyətinin səmərəliliyinə öz müsbət təsirini göstərib. Yoluxucu xəstəliklərlə mübarizə və profilaktika sahəsində aparılan tədbirlər nəticəsində ölkəmizdə epidemioloji sabitlik təmin edilib.

Respublika Gigiyena və Epidemiologiya Mərkəzinin şöbə müdiri Ziyəddin Kazımov isə bu ilin birinci rübündə Bakıda su ilə dolu 238 zirzəminın aşkarlandığını diqqətə çatdıraraq deyib ki, həmin zirzəmilərdən götürülən su nümunələri analiz olunduqdan sonra nəticələri barədə müvafiq icra hakimiyyəti orqanlarına təkliflər göndərilir.

“Dəyirmi masa”da qida zəhərlənmələrinin və qida vasitəsilə baş verən yoluxucu xəstəliklərin profilaktikası sahəsində görülən tədbirlərdən də danışılıb. Diqqətə çatdırılıb ki, yeyinti məhsullarının təhlükəsizliyinə mikrobioloji və toksikoloji laboratoriya nəzarəti müasir beynəlxalq tələblər səviyyəsinədək yüksəldilmiş, həmin laboratoriyalar ən müasir avadanlıqlarla və tam hazırlıqlı kadrlarla təmin olunub. Bununla yanaşı, vurğulanıb ki, əhali arasında hələ də kütləvi qida zəhərlənmələri, hətta ölümlə nəticələnən botulizm hadisələri baş verdiyi üçün bu sahədə maarifləndirmə işlərinin davam etdirilməsi çox vacibdir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.