Bakı, 4 iyul, AZƏRTAC

Milli Məclisin ailə, qadın və uşaq məsələləri komitəsi, Nizami Rayon İcra Hakimiyyəti və YAP Nizami rayon təşkilatı birlikdə Bakının Bilgəh qəsəbəsində müharibə və əmək əlilləri üçün pansionatda müqəddəs Ramazan bayramı münasibətilə bayram tədbiri keçirib.

Əvvəlcə pansionat sakinləri qonaqları özlərinin əl işləri ilə tanış ediblər.

Sonra çıxış edən pansionatın direktoru, Əməkdar Müəllim Qətibə Əsədova yaradılan şəraitlə bağlı məlumat verib.

Milli Məclisin ailə, qadın və uşaq məsələləri komitəsinin sədri Aqiyə Naxçıvanlı ahılları Ramazan bayramı münasibətilə təbrik edib. Bildirib ki, ümummilli lider Heydər Əliyevin sosial siyasət kursunda ölkəmizdə ahıl insanların dövlət qayğısı ilə təminatı, onların maddi və mənəvi tələbatlarının ödənilməsi mühüm yer tutub. Prezident İlham Əliyev tərəfindən uğurla davam etdirilən bu siyasət nəticəsində ahıl vətəndaşların sosial müdafiəsi daha da gücləndirilib. Dövlətimizin başçısının bununla bağlı imzaladığı fərman və sərəncamlar, 2006-cı il 17 aprel tarixli Sərəncamla təsdiqlənmiş “Ahıl vətəndaşların sosial müdafiəsinin gücləndirilməsi üzrə Dövlət Proqramı” və bir sıra digər dövlət proqramlarına uyğun olaraq, ahılların hərtərəfli sosial müdafiəsi sahəsində mühüm addımlar atılıb.

“Bu gün tədbir keçirdiyimiz bu müasir pansionat da məhz Prezident İlham Əliyevin göstərişi ilə əsaslı şəkildə təmir edilib”, - deyən YAP Nizami rayon təşkilatının sədri, Milli Məclisin deputatı Sədaqət Vəliyeva qeyd edib ki, burada yaradılan şərait bir daha ahıl insanların dövlətin diqqət və qayğısı ilə əhatə olunduğunu nümayiş etdirir. Azərbaycan dövləti xüsusi qayğıya ehtiyacı olan şəxslərə hər zaman diqqətlə yanaşır, onların rahat yaşamaları, ehtiyaclarının ödənilməsi üçün bütün lazımi işləri görür.

Vurğulanıb ki, Yeni Azərbaycan Partiyası əhalinin müxtəlif təbəqələrinin nümayəndələri, o cümlədən ahıl insanlar, qocalar evinin sakinləri ilə mütəmadi görüşlər təşkil edir, onların problemləri ilə maraqlanır, imkan daxilində kömək etməyə çalışır.

Pansionat sakinləri onlara göstərilən diqqət və qayğıya görə Prezident İlham Əliyevə və xanımı Mehriban Əliyevaya minnətdarlıqlarını ifadə ediblər. Bildiriblər ki, bu gün ölkəmizdə aparılan geniş quruculuq işləri onları da sevindirir, fərəhləndirir.

Sonra bayram süfrəsi açılıb.

Tədbir Nizami rayon Uşaq və Gənclər Yaradıcılıq Mərkəzinin üzvlərinin pansionat sakinləri üçün oxuduqları mahnılarla və şeirlərlə davam etdirilib.