Bakı, 4 iyul, AZƏRTAC

Əmək və əhalinin sosial müdafiəsi nazinin müavini İdris İsayev və nazirlik yanında Dövlət Sosial Müdafiə Fondunun direktoru Zakir Babayev Beynəlxalq Sosial Təminat Assosiasiyasının (BSTA) İsveçrənin Cenevrə şəhərində keçirilən 115-ci Büro iclasında, BSTA-nın 90 illiyinə həsr olunmuş simpoziumda və təşkilatın 10 Avropa ölkəsinin, o cümlədən Azərbaycanın üzv olduğu Avropa Rəhbər Komitəsinin iclasında iştirak ediblər.

AZƏRTAC xəbər verir ki, BSTA-nın Büro iclasında dünyada sosial təminat sahəsində inkişaf meylləri, habelə mövcud problemlərə dair müzakirələr aparılıb. Sosial sığorta sisteminin tətbiqində nailiyyətlər əldə edən ölkələrin bu sahədə uğurlu iş təcrübələri təqdir edilib, BSTA-ya yeni üzvlərin cəlb olunması barədə təkliflər irəli sürülüb. Həmçinin ötən ay Azərbaycanın da rəhbər orqanına üzv seçildiyi Beynəlxalq Əmək Təşkilatı (BƏT) ilə BSTA-nın əməkdaşlığına xüsusi əhəmiyyət verildiyi qeyd edilib.

İclasda BSTA-nın Üzvlük Haqları Komitəsinə üzvlərin seçkisi keçirilib. Ölkəmizi təmsil edən İ.İsayevin komitənin üzvü seçilməsi BSTA ilə Azərbaycanın uğurlu əməkdaşlığına göstərilən diqqətin əyani göstəricisidir.

BSTA-nın yaradılmasının 90 illiyi çərçivəsində keçirilən simpozium “Rəqəmli iqtisadiyyatda sosial müdafiə” mövzusuna həsr olunub. Simpoziumda iqtisadiyyatda sosial təminatın roluna dair bir sıra məruzələr dinlənilib.

BSTA-nın Avropa Rəhbər Komitəsinin iclasında məruzə ilə çıxış edən İ.İsayev Azərbaycanda əmək və sosial müdafiə sahələrində müasir və operativ, səmərəli idarəetmənin formalaşdırılması, xidmət sahələrinin şəffaflaşdırılması və “bir pəncərə” prinsipi üzərində qurulması üçün aparılan islahatlardan danışıb, yaradılan avtomatlaşdırılmış sistemlər, o cümlədən Əmək Müqaviləsi Bildirişi üzrə Elektron İnformasiya Sistemi barədə ətraflı məlumatlar verib. O, ötən ay BMT-nin ixtisaslaşdırılmış qurumu olan Beynəlxalq Telekommunikasiya İttifaqının “Çempion layihə” mükafatına layiq görülən bu sistemin əmək bazarına nəzarətin operativ və səmərəli təşkili, həmin sahə ilə əlaqədar dəqiq uçotun aparılması, vətəndaşların əmək və sosial hüquqlarının təminatına zəmin yaratması və s. baxımından üstünlüklərini qeyd edib.

1927-ci ildə BƏT-in himayəsi altında yaradılan BSTA indi dünyanın 159 ölkəsindən 322 sosial sığorta və sosial müdafiə təşkilatını özündə birləşdirən, dünyada sosial təminata hərtərəfli dəstək üzrə qlobal kampaniyaya rəhbərlik edən beynəlxalq təşkilatdır. Təşkilat rəhbərlik sahəsində peşəkar sənədlərin hazırlanması, mütəxəssis rəylərinin yayılması, xidmətlərin təqdim olunması və dinamik sosial təminat sistemlərinin, sosial siyasətin formalaşması sahələrində dünyanın müxtəlif ölkələrində olan üzv təşkilatlarına yardım gəstərməklə sosial təminatın idarə olunması standartlarının yüksəldilməsinə şərait yaradır. O, həmçinin hər bir sosial müdafiə, sosial təminat təşkilatına eksklüziv cəmiyyətin üzvü olmaq imkanı yaradır, forumların keçirilməsi və mütəxəssis şəbəkələrinin yaradılması yolu ilə əməkdaşlığa və təcrübə mübadiləsinə yardım göstərir.

BSTA-ya üzv təşkilatların maliyyə vəsaitlərinin həcmi 6 trilyon ABŞ dollarından çoxdur. Öz ətrafında dünya üzrə 3 milyondan çox işçini birləşdirən təşkilatlar dünyada 3 milyard nəfərə xidmət göstərirlər.

Xatırladaq ki, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu 2004-cü ildə BSTA-nın Pekində keçirilən Dünya Sosial Təminat Forumunda ilk dəfə, 2016-cı ilin noyabrında Panamada keçirilən Forumda isə yenidən təşkilatın büro üzvü seçilib.