CƏMİYYƏT


Azərbaycanda əcnəbilərin hüquq və azadlıqları tam təmin olunur

Bakı, 25 may, AZƏRTAC

Dövlət Miqrasiya Xidmətinin (DMX) rəisi Firudin Nəbiyev Beynəlxalq Qızıl Xaç Komitəsinin (BQXK) müdafiə işləri üzrə əlaqələndiricisi Byorn Ram və qurumun Azərbaycandakı nümayəndəliyinin rəhbəri Elena Ajmone Sessera ilə görüşüb.

DMX-dən AZƏRTAC-a bildiriblər ki, görüşdə BQXK ilə Xidmət arasındakı qarşılıqlı əməkdaşlıq əlaqələrindən danışılıb, bu qurumun həyata keçirdiyi layihələr, onların icra mexanizmi və digər məsələlərlə bağlı fikir mübadiləsi aparılıb.

F.Nəbiyev bildirib ki, son 14 ildə Prezident İlham Əliyevin rəhbərliyi ilə Azərbaycan sürətlə inkişaf edib və dünyanın nüfuzlu ölkələrindən birinə çevrilib. Azərbaycan iqtisadiyyatı dünyada ən sürətlə inkişaf edən iqtisadiyyatlardan biridir. Müxtəlif millətlərin və dinlərin nümayəndələrinin mehriban şəraitdə yaşadığı Azərbaycandakı mövcud tolerantlıq mühiti dünyaya nümunə göstərilir. İndiyədək Azərbaycanda dini, milli, irqi zəmində heç bir hadisə qeydə alınmayıb. Ötən əsrin 90-cı illərinin əvvəllərində Azərbaycandan başqa dövlətlərə gedənlər belə indi ölkəyə qayıdırlar.

Xidmət rəisi Ermənistan-Azərbaycan, Dağlıq Qarabağ münaqişəsi, problemin tarixi, ölkəmizdəki qaçqın və məcburi köçkünlərin vəziyyəti haqqında da qonaqlara geniş məlumat verib. Ermənistanın qeyri-konstruktiv mövqeyi ucbatından münaqişənin həlli istiqamətində indiyədək heç bir irəliləyişə nail olunmadığına diqqət çəkib. Bir milyon 200 min soydaşımızın hələ də qaçqın və məcburi köçkün həyatı yaşadığını bildirib.

Qarşılıqlı dialoq şəraitində keçən görüşdə Ermənistan silahlı birləşmələri tərəfindən işğal edilmiş Kəlbəcər rayonunda öz doğma yurdlarını və yaxınlarının məzarını ziyarət edərkən ermənilər tərəfindən girov götürülmüş, sonra isə separatçı rejim tərəfindən barələrində “hökm” çıxarılmış azərbaycanlı mülki şəxslər Dilqəm Əsgərov və Şahbaz Quliyevlə bağlı məsələyə toxunulub.

Xidmət rəisi BMT Təhlükəsizlik Şurasının Azərbaycanın işğal olunmuş ərazilərinin azad edilməsi, qaçqınların və məcburi köçkünlərin doğma yurdlarına qaytarılması ilə bağlı qəbul etdiyi dörd qətnamənin icra edilmədiyini xatırladıb.

F.Nəbiyev qaçqınların və məcburi köçkünlərin sosial, mənzil-məişət şəraitinin yaxşılaşdırılması istiqamətində Prezident İlham Əliyev tərəfindən görülmüş işlərdən danışıb. Qaçqın və məcburi köçkünlərin problemlərinin həlli ilə bağlı ölkəmizin çox böyük təcrübəsi olduğunu xatırladıb.

Görüşdə dünyada baş verən qlobal miqrasiya böhranı, bu böhranın həllində beynəlxalq əməkdaşlığın önəmi vurğulanıb. Həssas qrupa aid olan şəxslərin problemlərinin həlli istiqamətində beynəlxalq təşkilatlarla əlaqələr və həyata keçirilən birgə tədbirlər barədə danışan Xidmət rəisi bildirib ki, ötən müddətdə ölkəmizdə sığınacaq sistemlərinin keyfiyyətinin artırılması ilə bağlı əsaslı işlər görülüb. Əcnəbi və vətəndaşlığı olmayan şəxslərə hüquq və azadlıqlarını sərbəst həyata keçirmələri üçün lazımi şərait yaradılıb. Bununla belə, əcnəbilərin və vətəndaşlığı olmayan şəxslərin uşaqlarının məktəbəqədər və ya ümumi təhsil müəssisələrində təhsil almalarına, lazımi tibbi və hüquqi yardım almalarına aidiyyəti dövlət orqanları ilə birgə kömək göstərilir.

Azərbaycanın miqrasiya qanunvericiliyndən bəhs edən F.Nəbiyev Miqrasiya Məcəlləsinə əsasən əcnəbilər və vətəndaşlığı olmayan şəxslərin ölkədə olma və yaşaması, iş icazəsinin verilməsi ilə bağlı prosedurların sadələşdirildiyini konkret faktlarla diqqətə çatdırıb. Məcəlləyə uyğun olaraq, qaçqın statusunun verilməsi üçün vəsatət verən, qaçqın statusu almış şəxslərə haqqı ödənilən əmək fəaliyyəti ilə məşğul olmaq üçün iş icazəsinin alınması tələb olunmur. Bununla belə, qaçqın statusu verilməsi barədə vəsatətlə müraciət edən və qaçqın statusu alan şəxslər Xidmətin müasir standartlara cavab verən qanunsuz miqrantların saxlanılması mərkəzlərinə könüllü yerləşdirilirlər. Bütün bunlar Azərbaycan dövlətinin humanist mahiyyətinin əyani nümunəsidir. Mərkəzlərin qapısı oradakı şəraitlə tanış olmaq üçün bütün beynəlxalq təşkilatların və diplomatik nümayəndəliklərin üzünə açıqdır.

DMX-nin BQXK və Azərbaycan Qızıl Aypara Cəmiyyəti ilə əməkdaşlıqdan məmnunluğunu ifadə edən Xidmət rəisi əlaqələrin genişləndirilməsi ilə bağlı addımların atılmasının önəmini vurğulayıb. F.Nəbiyev Azərbaycan Qızıl Aypara Cəmiyyəti ilə 2013-cü ildə imzalanmış razılaşmanı qeyd edib.

Qonaqlar BQXK və qurumun Azərbaycandakı fəaliyyəti haqqında məlumat verib, əsirlərlə, itkin düşmüş şəxslərlə bağlı görülmüş işlər, cəbhəyanı bölgələrdə yaşayan əhaliyə verilən dəstək barədə söhbət açıblar. Söhbət zamanı Azərbaycan hökumətinin qaçqın və məcburi köçkünlərlə bağlı gördüyü işlər yüksək qiymətləndirilib, ölkəmizdə baş verən inkişaf və tərəqqinin göz qabağında olduğu diqqətə çatdırılıb.

Görüşdə qarşılıqlı maraq doğuran digər məsələlərə dair fikir mübadiləsi aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.