Azərbaycanda əlillər hər cür dövlət qayğısı ilə əhatə olunublar
Masallı, 3 dekabr, Bağır Əliyev, AZƏRTAC
Azərbaycanda əlillər hər cür dövlət qayğısı ilə əhatə olunublar.
AZƏRTAC xəbər verir ki, bu fikir Beynəlxalq Əlillər Günü münasibətilə Masallıda keçirilmiş tədbirdə səsləndirilib.
Toplantıda çıxış edən Masallı Rayon İcra Hakimiyyəti başçısının müavini Aybəniz Qafarova bildirib ki, ümummilli lider Heydər Əliyevin Azərbaycanda yenidən hakimiyyətə qayıtması ilə əlillərin sosial müdafiəsi, onların həyatına, sağlamlığına dövlət dəstəyi sosial siyasətdə öncül məsələyə çevrilib. Prezident İlham Əliyev əlillərin ehtiyaclarına və problemlərinə, onların cəmiyyətə tam qovuşması üçün maksimum əlverişli şəraitin yaradılmasına daim diqqət yetirir.
Tədbirdə Əmək və Əhalinin Sosial Müdafiəsi Nazirliyinin Dövlət Sosial Müdafiə Fondunun Masallı rayon şöbəsinin müdiri Arzuman Hüseynov, Əlil Qadınlar Cəmiyyəti Masallı rayon şöbəsinin sədri Əminə Abıyeva, Qarabağ Müharibəsi Əlilləri, Veteranları və Şəhid Ailələri Cəmiyyətinin sədri Nahid Rəhimov, "Güvən" xeyriyyə və dostluq cəmiyyətinin rəhbəri Nigar Bayramlı və başqaları çıxış edərək ölkəmizdə hər il bu kateqoriyadan olan vətəndaşların pensiya və müavinətlərinin artırılması, onların sosial-məişət və mənzil şəraitinin yaxşılaşdırılması məqsədilə ardıcıl tədbirlərin həyata keçirildiyini vurğulayıblar.
Çıxışlarda qeyd olunub ki, Masallı rayonunda Qarabağ müharibəsi əlilləri və şəhid ailələri üçün 76 mənzilli üç yaşayış binası tikilərək istifadəyə verilib, 5 nəfər üçün fərdi evlər inşa olunub. Rayonun altı yaşayış məntəqəsində əlillər üçün inşa edilən fərdi yaşayış evlərinin tikintisi tamamlanmaq üzrədir.
Əlil anaları Anaxanım Ağayeva və Nazilə Hüseynova ölkəmizdə əlillərə göstərilən diqqət və qayğıya görə Prezident İlham Əliyevə minnətdarlıqlarını bildiriblər.
Mərasim rayonun incəsənət ustalarının ifasında konsert proqramı ilə davam edib.
Bölmənin digər xəbərləri
