Xaçmaz, 19 sentyabr (AZƏRTAC, Elxan Yusifli). Sentyabrın 19-da Dövlət Sosial Müdafiə Fondu (DSMF) Xaçmazda “Sosial sığorta ödənişi gələcəyinizin təminatıdır” mövzusunda regional təqdimat keçirib.

AZƏRTAC xəbər verir ki, tədbirdə Xaçmaz, Qusar, Quba, Xızı, Şabran və Siyəzən rayonlarından olan sığorta ödəyiciləri və pensiyaçılar iştirak ediblər.

Təqdimat mərasimində DSMF-nin şöbə müdiri Famil Qədimov bildirib ki, Azərbaycan Respublikasının Prezidenti İlham Əliyevin həyata keçirdiyi sosialyönümlü iqtisadi siyasət və çevik islahatlar nəticəsində əldə olunan nailiyyətlər ölkəmizdə sosial dövlət modelinin uğurla reallaşdırılmasının fundamental əsaslarını formalaşdırıb. Azərbaycanda sosial müdafiə sistemi beynəlxalq standartlar əsasında keyfiyyətcə yenidən qurulub və iqtisadi artımla sosial xərclərin artımının balanslaşdırılmasının daim diqqət mərkəzində saxlanılması vətəndaşların yaşayış səviyyəsinin müasir mexanizmlər əsasında yüksəldilməsini təmin etməkdədir.

Diqqətə çatdırılıb ki, dünya iqtisadiyyatında mürəkkəb və çətin proqnozlaşdırılan dəyişikliklərin baş verdiyi, əksər ölkələrin pensiya sistemlərinin göstəricilərinin aşağı düşdüyü bir dövrdə Dövlət Sosial Müdafiə Fondunun gəlir və xərclərinin sürətli artımı ölkəmizdəki iqtisadi-sosial inkişafın birbaşa göstəricisidir. Bunu sığorta-pensiya sisteminin göstəriciləri özündə adekvat əks etdirir. DSMF ölkə əhalisinin 43 faizindən çoxunu əhatə edən kateqoriyanın - 1 milyon 285 min nəfər pensiyaçının, 2 milyon 865 min nəfərdən çox sığortaolunanın sığorta-pensiya sistemində iştirakının müəyyən edilməsində mühüm rola malikdir.

Bildirilib ki, sentyabrın 1-nə olan statistikaya əsasən, ilin əvvəli ilə müqayisədə DSMF-nin fərdi uçot sistemində qeydiyyatda olan sığortaolunanların sayı 6,5 faiz artıb. 2014-cü ilin yanvar-avqust aylarında DSMF tərəfindən əlavə olaraq 174 min 134 sığortaolunana fərdi şəxsi hesab açılıb. Nəticədə Azərbaycanda fərdi şəxsi hesabı olan sığortaolunanların sayı 2 milyon 865 min 491 nəfərə yüksəlib.

DSMF-nin genişləndirilmiş informasiya-kommunikasiya şəbəkəsi vasitəsilə hər bir sığortaolunana fərdi hesabında əks olunan pensiya kapitalı, iş yerləri üzrə məcburi dövlət sosial sığorta haqqı barədə məlumatları maneəsiz əldə etmək imkanı yaradılıb. Bütün bunlar işləyənlərin öz işəgötürənləri üzərində ictimai nəzarətinin daha da güclənməsinə istiqamətlənib. Sığorta-pensiya sistemində ödənilmiş məcburi dövlət sosial sığorta haqlarının əsas meyar olduğunu nəzərə alaraq, vətəndaşlar öz fərdi hesablarında məlumatların tam əks etdirilməsində xüsusi maraqlı olmalıdırlar. Onlar ölkəmizdə fərdi uçot sisteminin tətbiqindən əvvəlki dövrə, yəni 2006-cı ilin 1 yanvarınadək olan iş stajlarının qeydiyyata alınmasında fəallıq göstərməlidirlər. Çünki avtomatlaşdırılmış pensiya təyinatı yalnız sistemdə qeydiyyata düşmüş elektron göstəricilər əsasında aparılır və təbii ki, əgər müvafiq məlumatlar sistemdə vaxtında öz əksini tapmayıbsa, hesablamalarda onların nəzərə alınması texniki baxımdan imkan xaricindədir. İstənilən vətəndaş fondun internet səhifəsində yaradılmış müştəri xidmətləri sisteminə daxil olaraq öz fərdi hesabı barədə məlumat ala, eləcə də pensiya kalkulyatoru vasitəsilə öz pensiyasını hesablaya bilir.

Tədbirdə təqdimatla çıxış edən DSMF-nin maliyyə-büdcə şöbəsinin sektor müdiri Rüfət Oruclu bildirib ki, qarşıda duran vəzifələr vətəndaşlara göstərilən xidmətlərin daha da genişləndirilməsi və təkmilləşdirilməsindən ibarətdir. Bu istiqamətdə tədbirlərin həyata keçirilməsi Dövlət Proqramı ilə müəyyən olunmuş vəzifələrin icrası baxımından mühüm əhəmiyyət daşımaqla yanaşı, ölkəmizin sığorta-pensiya sisteminin uzunmüddətli dövrdə perspektiv inkişafı strategiyasının hərtərəfli təyin olunmasına xidmət edir.

Regional təqdimatda tədbir iştirakçıların mövzu ilə bağlı sualları cavablandırılıb, təklifləri müzakirə edilib.