ELM VƏ TƏHSİL
Azərbaycanda gənclər siyasətinin formalaşdırılması ulu öndər Heydər Əliyevin adı ilə bağlıdır
Bakı, 28 aprel, P.İmanova, AZƏRTAC
Aprelin 28-də Bakı Slavyan Universitetində (BSU) ümummilli lider Heydər Əliyevin və akademik Zərifə xanım Əliyevanın xatirəsinə həsr olunan, “Heydər Əliyev və Azərbaycan gəncliyi” mövzusunda magistrant, doktorant və gənc tədqiqatçıların respublika elmi konfransı keçirilib.
Mərasimdən əvvəl BSU-nun kollektivi Fəxri xiyabana gələrək müasir müstəqil dövlətimizin memarı və qurucusu, xalqımızın ümummilli lideri Heydər Əliyevin xatirəsini ehtiramla yad edib, məzarı önünə gül dəstələri qoyublar.
Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.
AZƏRTAC xəbər verir ki, BSU-nun və Yeni Azərbaycan Partiyası (YAP) Gənclər Birliyinin birgə təşkilatçılığı ilə reallaşdırılan tədbirdə əvvəlcə dövlət himni səsləndirilib.
BSU-nun rektoru, professor Nurlana Əliyeva Azərbaycan xalqınin daim özünün istedadlı şəxsiyyətləri, elm və mədəniyyət adamları, siyasi xadimləri ilə qürur duyduqlarını söyləyib, konfransın ümummilli lider Heydər Əliyevin və görkəmli oftalmoloq alim Zərifə xanım Əliyevanın xatirəsinə həsr olunduğunu bildirib.
Professor N.Əliyeva iki böyük şəxsiyyətin dövlətimiz qarşısındakı misilsiz xidmətlərindən söz açıb, onların xatirəsinin hər zaman xalqımızın qəlbində əbədi yaşayacağına əminliyini bildirib. Qeyd edilib ki, Ulu Öndərin və Zərifə xanım Əliyevanın olduqca mənalı və zəngin həyat yolu, çoxcəhətli fəaliyyətləri, xalqımızın, dövlətimizin tərəqqisi uğrunda fədakarlıqları nəinki bugünkü, həm də gələcək nəsillər üçün örnəkdir.
Rektor bildirib ki, ulu öndər Heydər Əliyevin çoxcəhətli fəaliyyətinin əsas istiqamətlərindən biri gənc nəslə diqqət və qayğının artırılması, respublikamızın ictimai-siyasi həyatında onların fəal iştirakının təmin edilməsi, yeni nəslin gələcəyin layiqli vətəndaşları kimi formalaşması üçün münbit şəraitin yaradılması olub.
Təhsilə və elmə yiyələnməyin vacibliyini vurğulayan N.Əliyeva gənclərin mənəvi tərbiyəsinin qarşıda duran əsas vəzifələrdən biri olduğunu qeyd edib. Milli dəyərlərimizi, ənənələrimizi, dilimizi, tariximizi yaxşı bilməyən gəncin əsl vətənpərvər ola bilməyəcəyini deyən rektor bu konfransın məhz belə bir məqsədə xidmət etdiyini vurğulayıb.
YAP Gənclər Birliyinin sədri Seymur Orucov hazırda ölkəmizdə gənclər siyasətinin uğurla həyata keçirildiyini deyib, dövlətimizin başçısının bütün sahələrdə gənclərə xüsusi önəm verdiyini qeyd edib. Bildirilib ki, ulu öndər Heydər Əliyevin müəyyənləşdirdiyi gənclər siyasəti bu gün Prezident İlham Əliyev tərəfindən uğurla davam etdirilir.
Dövlət İmtahan Mərkəzinin Direktorlar Şurasının sədri Məleykə Abbaszadə ümummilli lider Heydər Əliyevin ölkəmizə rəhbərlik etdiyi hər iki dövrdə daim gənclərin təhsilinə diqqət yetirdiyini bildirib, Ulu Öndər tərəfindən Azərbaycan gənclərinin keçmiş SSRİ-nin ozamankı nüfuzlu ali məktəblərinə göndərildiyini xatırladıb.
M.Abbaszadə həmin kadrların əksəriyyətinin bu gün ölkəmizin müxtəlif dövlət strukturlarında fəaliyyətlərini uğurla davam etdirdiklərini söyləyib. Qeyd edilib ki, ikinci dəfə hakimiyyətə qayıtdıqdan sonra da Ümummilli Lider daim tələbələrlə, gənclərlə görüşüb, onlara öz tövsiyələrini verib.
Nəsimi Rayon İcra Hakimiyyətinin başçısı Asif Əsgərov, gənclər və idman nazirinin müavini İntiqam Babayev, Türkiyənin Azərbaycandakı səfiri Erkan Özoral, BSU-nun tələbəsi Ələkbər Mirzəyev və digər çıxış edənlər ölkəmizdə əsası ümummilli lider Heydər Əliyev tərəfindən qoyulan gənclər siyasətindən, bu sahədə görkəmli dövlət xadiminin misilsiz xidmətlərindən söz açıblar. Bildirilib ki, Azərbaycanda gənclər siyasətinin formalaşdırılması Ulu Öndərin adı ilə bağlıdır. Ümummilli Lider hər zaman gənclərin imkan və bacarıqlarını yüksək qiymətləndirib, onların problemlərinin həlli istiqamətində həyata keçirilən tədbirlərə xüsusi önəm verib, bu siyasəti müstəqil Azərbaycan dövlətinin fəaliyyətinin ən mühüm istiqamətlərindən biri kimi dəyərləndirib.
Ulu Öndərin gənclərə qayğısından bəhs edən videoçarx nümayiş olunub.
Konfrans işini dörd bölmədə davam etdirib.
Bağlanış mərasimində bölmə iclaslarının moderatorlarının hesabatları dinlənilib, iştirakçılara sertifikat və diplomlar təqdim edilib.