Bakı, 23 may, AZƏRTAC

Təhsil, Rabitə və Yüksək Texnologiyalar nazirliklərinin, Yüksək Texnologiyalar Parkının dəstəyi, “Microsoft Azerbaijan” şirkətinin və “Nar” rabitə operatorunun təşkilatçılığı ilə Azərbaycanda ilk dəfə keçirilən “Microsoft Imagine Cup” innovasiya müsabiqəsinin qalibləri müəyyənləşdirilib və 20 komanda milli finala vəsiqə qazanıb.

“Microsoft Azerbaijan” şirkətindən AZƏRTAC-a bildirilib ki, müsabiqədə iştirak edən ali və peşə təhsil müəssisələrinin tələbələrindən ibarət komandalar “İnnovasiya”, “Oyunlar” və “Dünya vətəndaşlığı” nominasiyaları üzrə yarışıblar. “İnnovasiyalar” nominasiyası üzrə “NoObs” komandası, “Oyunlar” nominasiyası üzrə “IDEAlists” komandası, “Dünya vətəndaşlığı” nominasiyası üzrə isə “Mar-Tech” komandası qalib gəlib. Bu komandalar artıq onlayn yarımfinala qatılaraq, layihə sənədlərini beynəlxalq münsiflərə təqdim ediblər. İyulda ABŞ-ın Vaşinqton ştatının Sietl şəhərində keçiriləcək dünya finalında iştirak edəcək komandaların adları iyunun 1-də elan olunacaq. Müsabiqənin sonunda qaliblərə pul mükafatları təqdim olunacaq və onlar qlobal innovasiya akselerator proqramlarına qoşulacaqlar.

“Microsoft Azerbaijan” şirkətinin baş meneceri Rüfət Hacıəlibəyov deyib: “Məqsədimiz Azərbaycan tələbələrinin istedadını üzə çıxarmaq, onların sabahın bazar tələblərinə hazırlıqlı mütəxəssis kimi yetişdirilmələri üçün şərait yaratmaqdır. Biz tərəfdaşımız olan Təhsil Nazirliyi, Yüksək Texnologiyalar Parkı və “Nar Mobile” şirkəti ilə birlikdə yenilikçi fikir və texniki həllərin yerli və beynəlxalq bazarlara çıxarıla bilməsi üçün elə bir ekosistem yaratmaq istəyirik ki, burada tələbələr fundamental, sənaye bilik və bacarıqları qazansınlar, ən son texniki həllərdən və proqramlardan istifadə etsinlər, özlərini tətbiqi həllərin yaradılmasında sınasınlar, müxtəlif yerli və beynəlxalq müsabiqələrə qatılsınlar və təcrübələri əsasında işlək məhsullarını bazara çıxarmağa nail ola bilsinlər”.

“Azerfon” şirkətinin baş icraçı direktoru Kent MakNili qeyd edib ki, tələbələrin fundamental biliklər əldə etmələri, ən son texniki həllərdən və proqramlardan istifadə edə bilmələri üçün bu cür layihələrin həyata keçirilməsi zəruridir.