CƏMİYYƏT


Azərbaycanda insan alverinə qarşı mübarizə ilə bağlı yeni layihə icra olunur

Bakı, 12 iyun, AZƏRTAC

Avropa İttifaqının (Aİ) və Beynəlxalq Miqrasiya Təşkilatının (BMqT) ölkəmizdəki nümayəndəliklərinin təşəbbüsü ilə iyunun 12-də “Azərbaycanda insan alverinə qarşı mübarizə üzrə potensialların artırılması” layihəsinin açılış mərasimi keçirilib.

AZƏRTAC xəbər verir ki, açılış mərasimində Aİ-nin Azərbaycandakı nümayəndəliyinin rəhbəri xanım Malena Mard layihənin məqsədi barədə danışıb. Qeyd edib ki, Aİ-nin və BMqT-nin Beynəlxalq İnkişaf Fondunun dəstəyi ilə maliyyələşdirilən və iki il müddətində icra olunacaq layihənin məqsədi insan alverinə qarşı səmərəli mübarizədə Azərbaycan hökumətinə dəstəkləmək, onun imkanlarını artırmaq və insan alveri qurbanlarının qorunması işinə töhfə verməkdir.

Malena Mard bildirib ki, Aİ, Azərbaycan hökuməti və BMqT ilə birgə icra ediləcək layihə mütəşəkkil cinayətkarlığın bir forması olan insan alverinə qarşı mübarizəni əsas hədəf kimi nəzərdə tutur. İnsan alverinin qarşının alınması Aİ-nin təhlükəsizliyinin təminində ən vacib məsələlərdən biridir. Avropa İttifaqı Azərbaycanla bir çox sahələrdə və layihələrdə əməkdaşlıq edir. Bu layihə Azərbaycana göstərdiyimiz dəstək çərçivəsində ümumi strategiyanın bir hissəsidir. İnanırıq ki, Aİ-nin Azərbaycanla əməkdaşlıq təcrübəsi layihəni uğurla həyata keçirməyə kömək edəcək və insan alverinə qarşı mübarizəyə öz töhfəsini verəcək.

Xarici işlər nazirinin müavini Mahmud Məmmədquliyev ölkəmizdə insan alverinə qarşı mübarizə sahəsində aparılan siyasət, bu çərçivədə beynəlxalq əməkdaşlıq məsələləri barədə məlumat verib. Bildirilib ki, BMqT ölkəmizdə 20 illik fəaliyyət dövründə qeyri-qanuni miqrasiya və insan alverinin qarşısının alınmasında dövlət qurumlarının imkanlarının artırılması sahələrində əhəmiyyətli işlər həyata keçirib. Bu layihə isə Azərbaycan, BMqT və Avropa İttifaqı arasında mövcud əməkdaşlıqda yeni səhifədir.

İnsan alverinə qarşı mübarizənin Azərbaycan Respublikasının siyasətinin prioritet istiqamətlərindən biri olduğunu deyən M.Məmmədquliyev qeyd edib ki, ölkəmiz bu sahədə ardıcıl və məqsədyönlü siyasət həyata keçirir. Bu siyasətin əsasında qabaqlama, müdafiə və təqib prinsipləri durur. Xarici İşlər Nazirliyi layihənin icrası müddətində əlaqələndirici və tərəfdaş qismində çıxış edəcək. Layihə çərçivəsində təlimlərin keçirilməsi, xarici tərəfdaşların iştirakı ilə seminar və “dəyirmi masa”ların təşkili nəzərdə tutulur.

Vurğulanıb ki, layihə Azərbaycanla Avropa İttifaqı arasında əməkdaşlığın genişləndirilməsinə töhfə verəcək. Azərbaycan tərəfdaşlıq çərçivəsində Avropa İttifaqı ilə davamlı dialoq və əməkdaşlığın inkişafında maraqlıdır. Tərəfdaşlıq Avropa ölkələrinin ən yaxşı təcrübəsinin öyrənilməsi ilə müvafiq sahələrdə Azərbaycanın potensialının daha da təkmilləşdirilməsinə şərait yaradır. Azərbaycanla Aİ arasında müzakirə olunan yeni strateji saziş layihəsində insan alveri ilə mübarizə məsələsində əməkdaşlığa daha çox diqqət yetirilməsi nəzərdə tutulur. Bu saziş ikitərəfli əlaqələrin inkişafı, Aİ - Azərbaycan əməkdaşlığının gələcəyi üçün mühüm rol oynayacaq.

Daxili İşlər Nazirliyinin İnsan Alverinə Qarşı Mübarizə Baş İdarəsinin rəisi Heydər Heydərov ölkəmizdə insan alverinə qarşı mübarizə sahəsində görülən işlər, insan alveri qurbanlarının müdafiəsinə dəstək məqsədilə qəbul olunan qanunlar, təsdiq olunan Milli Fəaliyyət planları barədə məlumat verib. H.Heydərov deyib ki, insan alveri əksər dünya dövlətləri və beynəlxalq təşkilatlar tərəfindən ciddi transmilli təhdidlərdən biri olaraq qəbul edilir. Bu baxımdan Azərbaycan Prezidentinin sərəncamları ilə təsdiq edilmiş Milli Fəaliyyət planları əsasında 2004-cü ildən etibarən həyata keçirilən sistemli tədbirlər sayəsində həmin hüquqazidd əməllərin profilaktikasında və cinayət təqibi üzrə fəaliyyətdə müsbət nəticələr əldə edilib. 2005-ci ildə Azərbaycanda insan alverinə qarşı mübarizə haqqında qanun qəbul edilib. Milli Fəaliyyət planları müvəffəqiyyətlə icra olunur. Azərbaycanda insan alverinə qarşı mübarizə məsələsinə daim həssas yanaşılır. Bu növ cinayətlərə qarşı sistemli mübarizə aparılıb, insan alverinin qarşısının alınması, onun cinayət təqibi, qurbanların müdafiəsi, eləcə də yerli və beynəlxalq əməkdaşlıq məsələləri prioritet istiqamətlər olub. Azərbaycan insan alverinə qarşı mübarizə sahəsində digər dövlətlərlə, habelə insan alverinə qarşı mübarizə aparan beynəlxalq təşkilatlarla əməkdaşlıq edir və bu əməkdaşlıq daim gücləndirilib. Ümumi cinayətlərin təhlili nəticəsində məlum olur ki, Azərbaycanda insan alveri cinayətləri və onun formaları ilə bağlı qanunsuz hərəkətlərin sayı azdır.

BMqT-nin Azərbaycandakı nümayəndəliyinin rəhbəri Serhan Aktoprak layihənin əhəmiyyətindən danışıb, Azərbaycanın insan alverinə qarşı mübarizə sahəsində nailiyyətlərini yüksək qiymətləndirib.

Sonra layihənin təqdimatı olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.