CƏMİYYƏT
Azərbaycanda məşğulluq və inkişaf təlimçilərinin milli şəbəkəsi yaradılıb
Bakı, 28 aprel, AZƏRTAC
Aprelin 28-də ASAN Təlim Mərkəzində “Məşğulluq və İnkişaf Təlimçilər Şəbəkəsi” İctimai Birliyinin təsis edilməsi ilə bağlı tədbir keçirilib. Tədbirdə məşğulluq və inkişaf sahəsində fəaliyyət göstərən peşəkar təlimçilər, dövlət qurumları və sosial tərəfdaşlar, beynəlxalq təşkilatlar və özəl qurumların nümayəndələri iştirak ediblər.
Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsindən AZƏRTAC-a bildiriblər ki, tədbiri giriş sözü ilə “Məşğulluq və İnkişaf Təlimçilər Şəbəkəsi” İctimai Birliyinin təşəbbüs qrupunun rəhbəri, Beynəlxalq Əmək Təşkilatının təlimçisi Azad Rəhimov açıb. O, Azərbaycan Respublikası Prezidenti İlham Əliyevin 2016-cı il aprelin 7-də imzaladığı Sərəncamı ilə ölkədə dövlət səviyyəsində özünüməşğulluq proqramının icrasına başlandığını, bu proqram çərçivəsində Beynəlxalq Əmək Təşkilatı (BƏT) ilə əməkdaşlıq çərçivəsində beynəlxalq standartlara cavab verən təlim materialları əsasında 138 təlimçi hazırlandığını qeyd edib. Bu proqramın icraçısı olan Əmək və Əhalinin Sosial Müdafiəsi Nazirliyi, sosial tərəfdaşlar və BƏT nümayəndələri ilə aparılmış məsləhətləşmələr nəticəsində özünüməşğulluq proqramının davamlı inkişafını təmin etmək məqsədilə təlimçilərin peşəkar qurumda birləşməsi tövsiyə edilib. Özünüməşğulluq proqramı çərçivəsində hazırlanmış “Öz Biznesini Başla və Təkmilləşdir” (ÖBBT) təlimçiləri məsələni müzakirə edərək ÖBBT təlimçilərinin də daxil olduğu “Məşğulluq və İnkişaf Təlimçiləri Şəbəkəsi” İctimai Birliyinin yaradılmasını qərara alıblar.
Tədbirdə çıxış edən əmək və əhalinin sosial müdafiəsi nazirinin müavini Mətin Kərimli bu təşəbbüsü yüksək qiymətləndirdiklərini, ÖBBT təlimçilərinin Əmək və Əhalinin Sosial Müdafiəsi Nazirliyi ilə BƏT arasında olan əməkdaşlıq çərçivəsində hazırlandıqlarını qeyd edib. Nazir müavini Azərbaycan Respublikası Prezidenti İlham Əliyevin 2016-cı il aprelin 7-də imzaladığı Sərəncamı ilə həyata keçirilən özünüməşğulluq proqramının icrasının uğurla davam etdiyini, artıq bu proqramın beynəlxalq səviyyədə yüksək qiymət aldığını, BƏT tərəfindən “müsbət təcrübə” kimi tanındığını və digər ölkələrə tövsiyə olunduğunu bildirib.
Müzakirələrdə Həmkarlar İttifaqları Konfederasiyasının nümayəndəsi Namiq Hüseynov, BMT-nin Bakı ofisinin nümayəndəsi Gülarə Hümbətova, BƏT–in Azərbaycan üzrə ölkə əlaqələndiricisi Yaşar Həmzəyev və başqaları çıxış ediblər. Çıxış edənlər bu qurumun ölkəmizdə həyata keçirilən məşğulluq və inkişaf layihələrinin icrasına, xüsusilə BMT-nin Davamlı İnkişaf Məqsədlərinin yerinə yetirilməsinə mühüm töhfə olacağını, təlim sahəsində peşəkar standartların hazırlanmasında və yeni təlimçilərin hazırlanmasında aparıcı rol oynayacağına ümid etdiklərini bildiriblər.
“Məşğulluq və İnkişaf Təlimçiləri Şəbəkəsi” İctimai Birliyinin təşəbbüs qrupunun üzvü, ÖBBT təlimçisi Könül Hüseynova təşkilatın konsepsiyası, məqsədləri, nəzərdə tutulan tədbirlər haqqında geniş təqdim edib.
Tədbirin ikinci hissəsində “Məşğulluq və İnkişaf Təlimçilər Şəbəkəsi” İctimai Birliyinin təsis edilməsi, İctimai birliyin nizamnaməsinin təsdiq edilməsi, İctimai Birliyin nizamnaməsinə uyğun olaraq idarəetmə və icra orqanları təşkil edilməsi, İctimai birliyin təsis sənədlərinin Ədliyyə Nazirliyinə təqdim edilməsi üçün təsisçilərindən olan qanuni təmsilçi təyin olunması məsələlərini müzakirəyə təqdim edilib və müvafiq qərarlar qəbul edilib. Qərara əsasən, “Məşğulluq və İnkişaf Təlimçilər Şəbəkəsi” İctimai Birliyi təsis edilib və qeydiyyat üçün qanuni proseduraların icrasına başlanıb.