İQTİSADİYYAT


Azərbaycanda pambıq istehsalının perspektiv imkanları ilə bağlı təkliflər hazırlanacaq

A+ A

Bakı, 17 noyabr, AZƏRTAC

Noyabrın 17-də Azərbaycanın kənd təsərrüfatı nazirinin müavini Seyfəddin Talıbov Avropa Yenidənqurma və İnkişaf Bankının (AYİB) Bakıdakı daimi nümayəndəliyinin yeni təyin olunmuş rəhbəri İvana Duartenin rəhbərlik etdiyi nümayəndə heyəti ilə görüşüb.

Nazirliyin mətbuat xidmətindən AZƏRTAC-a bildiriblər ki, görüşdə AYİB ilə aqrar sahədə perspektiv əməkdaşlıq imkanları müzakirə olunub.

Qonaqları səmimi salamlayan nazir müavini Seyfəddin Talıbov ölkə rəhbərliyinin aqrar sahəyə göstərdiyi diqqət və qayğı, həmçinin hökumət tərəfindən kənd təsərrüfatının müxtəlif sahələrinə ayrılan subsidiyalar, ixracyönümlü və prioritet hesab olunan sahələr, o cümlədən pambıqçılıq və baramaçılıq sahələri barədə geniş məlumat verib. Qlobal dəyər zəncirinə inteqrasiyanı gücləndirməklə bazara çıxış imkanlarının yaxşılaşdırılması, dövlət və özəl sektor arasında sıx əlaqələrin yaradılması, ixracın coğrafiyasının genişləndirilməsi barədə danışan nazir müavini kredit-maliyyə sahəsində risklərin qiymətləndirilməsi, aqroparkların yaradılması məqsədilə birgə əməkdaşlıq üçün perspektiv imkanların mövcudluğunu diqqətə çatdırıb.

Azərbaycanda kənd təsərrüfatı sahəsində məqsədyönlü işlərin həyata keçirildiyini bildirən nazir müavini Seyfəddin Talıbov əsas hədəflər hesab olunan ərzaq təhlükəsizliyinə - əhalinin ərzaq məhsullarına olan tələbatının yerli istehsal hesabına ödənilməsinə, ölkəmiz üçün ənənəvi sayılan qədim əkinçilik sahələrinin inkişaf etdirilməsinə və ixrac yönümlü məhsulların istehsalına xüsusi diqqət yetirildiyini vurğulayıb. Donor təşkilatlarla əlaqələrin genişləndirilməsinə önəm verildiyini vurğulayan nazir müavini beynəlxalq maliyyə təşkilatlarının, xüsusilə AYİB-in Azərbaycanda həyata keçirdiyi layihələri yüksək qiymətləndirib, əlaqələrin inkişaf etdirilməsinin vacibliyini qeyd edib.

Səmimi qəbula görə təşəkkürünü bildirən xanım İvana Duarte AYİB-in Azərbaycan hökumətinin həyata keçirdiyi islahatlar proqramını dəstəklədiyini diqqətə çatdırıb. Bildirib ki, Avropa Yenidənqurma və İnkişaf Bankının prezidenti Suma Çakrabartinin bu ilin may ayında Azərbaycan Respublikasının Prezidenti İlham Əliyevlə görüşündə kənd təsərrüfatının prioritet sahələri, xüsusən pambıqçılığın inkişafı müzakirə olunub. Xanım İvana Duarte qeyd edib ki, bu məqsədlə artıq Azərbaycanda pambıq istehsalının perspektiv imkanlarının araşdırılması üçün xüsusi məsləhətçilər cəlb olunub və təkliflər hazırlanaraq təqdim ediləcək.

Xanım İvana Duarte kənd təsərrüfatında orta və kiçik sahibkarlığın inkişafına maliyyə dəstəyinin verilməsi, eyni zamanda, kənd təsərrüfatında biznes sahələrinin ixrac imkanlarının artırılmasının dəstəklənməsi, özəl sektora kreditlərin verilməsi, fermerlərə informasiya məsləhət xidmətlərinin göstərilməsi barədə məlumat verib və fəaliyyəti dövründə kənd təsərrüfatının əsas prioritet hesab olunan sahələri üzrə əməkdaşlığın davam etdirilməsi üçün səylərini əsirgəməyəcəyini bildirib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.