CƏMİYYƏT


Azərbaycanda peşə standartlarının hazırlanması, təsdiqi və tətbiqi işləri müzakirə olunub

A+ A

Bakı, 7 oktyabr, AZƏRTAC

Əmək və Əhalinin Sosial Müdafiəsi Nazirliyi (ƏƏSMN) və Avropa Təlim Fondunun birgə təşkilatçılığı ilə “Avropa İttifaqının Azərbaycanda insan kapitalının inkişafına və bacarıqlarına dəstəyi: peşə standartları və bacarıqlar” mövzusunda seminar keçirilib.

Nazirliyin ictimaiyyətlə əlaqələr şöbəsindən AZƏRTAC-a bildirilib ki, seminarda ölkəmizdə peşə standartlarının hazırlanması, təsdiqi və tətbiqi ilə bağlı mövcud vəziyyətin öyrənilməsi, bu sahədə qarşıda duran məsələlərin sosial dialoq şəraitində həlli yolları müzakirə edilib.

Aidiyyəti hökumət və qeyri-hökumət qurumlarının, beynəlxalq təşkilatların nümayəndələrinin, ekspertlərin iştirakı ilə keçən tədbirdə əmək və əhalinin sosial müdafiəsi nazirinin müavini Mətin Kərimli ölkəmizdə əmək resurslarının keyfiyyətinin yüksəldilməsi istiqamətində görülən işləri diqqətə çatdırıb. Nazir müavini bildirib ki, qeyd olunan işlər sırasında peşə standartlarının hazırlanması və tətbiqi mühüm yer tutur. Peşə standartı konkret peşə sahələrində işçilərin yerinə yetirdikləri əmək funksiyalarına qoyulan ümumi tələbləri sistemli şəkildə əks etdirən sənəddir. Həmin standartlar əmək bazarının tələblərinə uyğun kadr hazırlığının təşkil olunmasında, işçi qüvvəsinin keyfiyyətinin artırılmasında baza rolunu oynayır. Bu da öz növbəsində iqtisadiyyatın rəqabət qabiliyyətinin artırılmasına, əmək gəlirlərinin və məhsuldarlığının yüksəlməsinə xidmət etməklə, mühüm iqtisadi və sosial əhəmiyyətə malikdir.

Ölkəmizdə peşə standartlarının hazırlanması və tətbiqi işlərinə Dünya Bankı ilə birgə həyata keçirilən “Sosial müdafiənin inkişafı” layihəsi çərçivəsində başlanıldığı qeyd olunub. Bildirilib ki, layihə çərçivəsində 200 peşə standartı paketi (peşə və təlim/qiymətləndirmə standartları) üzərində iş başa çatdırılıb və 2014-cü ildə işəgötürənlərin istifadəsinə verilib. Ötən il və 2016-cı ilin 9 ayı ərzində daha 150 peşə standartının layihələri hazırlanıb. Layihələrin aidiyyəti fəaliyyət sektorları üzrə sahə komissiyaları tərəfindən müzakirəsi və işəgötürənlərlə razılaşdırılması mərhələsi yekunlaşdırılıb.

Azərbaycan Hökuməti ilə Avropa İttifaqı arasında əməkdaşlıq haqqında 2016-cı il üçün Fəaliyyət Planında bir sıra sahələrlə yanaşı, Əmək və Əhalinin Sosial Müdafiəsi Nazirliyinə əmək bazarının öyrənilməsi və proqnozlaşdırılması, kadr potensialının bilik və bacarıqlarının inkişaf etdirilməsi sahəsində dəstəyin göstərilməsi əksini tapıb. Bu istiqamətdə tədbirlər kimi, ƏƏSMN Aparatının məşğulluq siyasəti və demoqrafiya şöbəsinin tərkibində yeni yaradılan peşə standartları sektorunun işinin səmərəli təşkil edilməsi məqsədilə müvafiq sahədə qabaqcıl dünya təcrübəsinin öyrənilməsi, kadr potensialının artırılması ilə bağlı ölkədaxili və ölkəxarici seminarların keçirilməsi nəzərdə tutulub. ƏƏSMN və Avropa Təlim Fondunun əməkdaşlığı şəraitində təşkil olunan bu seminar da qeyd olunan sahədə işlərin səmərəli təşkilinə yönəlib.

Seminarda Avropa İttifaqının Azərbaycandakı nümayəndəliyindən Rza Zülfüqarzadə, Avropa Təlim Fondunun nümayəndəsi Arjen Deij peşə standartlarının əmək ehtiyatlarının keyfiyyətinin yüksəldilməsi və əmək məhsuldarlığının artırılmasında önəmindən bəhs edib, əməkdaşlığın bu sahəni də əhatə etməsinin məqsədəuyğun olduğunu bildiriblər.

Seminar yerli və beynəlxalq ekspertlərin təqdimatları ilə davam edib. Tədbirdə Azərbaycanda peşə standartlarının hazırlanması, təsdiqi və tətbiqi işləri nəzərdən keçirilib, bu sahədə sosial tərəfdaşlarla birgə görüləcək işlərin istiqamətləri müzakirə olunub, sosial dialoq şəraitində bu sahədə görüləcək işlərin sürətləndirilməsi ilə bağlı Tədbirlər Planı təsdiq edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.