İQTİSADİYYAT


Azərbaycanda telefon rabitəsinin yaradılmasının 135 illiyinə həsr olunan müsabiqə elan edilir

A+ A

Bakı, 7 oktyabr, AZƏRTAC

Rabitə və Yüksək Texnologiyalar Nazirliyi (RYTN) ölkəmizdə telefon rabitəsinin yaradılmasının 135 illiyinə həsr olunan müsabiqə elan edir.

Nazirlikdən AZƏRTAC-a bildirilib ki, müsabiqə informasiya və kommunikasiya texnologiyaları (İKT) üzrə ən yaxşı kitab və İKT üzrə ən yaxşı elmi məqalə nominasiyalarında keçirilir.

Müsabiqəyə materialların qəbulu oktyabrın 10-dan noyabrın 10-dək aparılacaq. Materiallar RYTN-in elm, texnologiya və informasiya cəmiyyətinin inkişafı şöbəsinə üzərinə “Müsabiqə üçün təqdim olunur” sözləri yazılmış zərfdə təqdim olunmalıdır (ünvan: AZ 1000 Bakı şəhəri, Z. Əliyeva küçəsi 77).

Materiallara olan tələblərə əsasən, “İKT üzrə ən yaxşı kitab” nominasiyası üzrə 2014-2016-ci ildə nəşr edilmiş kitablar qəbul edilir. Kitablar bir nüsxədə təqdim edilir. Azərbaycan dilində nəşr olunmuş kitablara üstünlük verilir.

“İKT üzrə ən yaxşı elmi məqalə” nominasiyası üzrə 2015-2016-cı illərdə çap olunmuş elmi məqalələr (tezis və konfrans materialları istisna olmaqla) qəbul edilir. Elmi məqalələr çap olunduğu jurnalın üz qapağı, mündəricatı, məqalənin sürəti (ottiski) və internet ünvanı göstərilməklə kağız formasında 2 (iki) nüsxədə təqdim edilir. İmpakt faktorlu jurnallarda çap olunmuş praktiki əhəmiyyətli elmi məqalələrə üstünlük verilir.

Materiallarla birlikdə müsabiqədə iştirak edən müəllif barədə anket məlumatları (adı, soyadı, elmi dərəcəsi, iş yeri və vəzifəsi, əlaqə telefonu və elektron poçt ünvanı) təqdim olunmalıdır. Müsabiqəyə təqdim olunan kitab və ya elmi məqalənin həmmüəllifləri olduğu təqdirdə, əlavə olaraq müsabiqədə iştirakla bağlı onların yazılı razılığı tələb edilir.

Bir müəllif yalnız bir nominasiyada və bir elmi məqalə və ya kitab ilə iştirak edə bilər. Tələblərə uyğun olmayan materiallar müsabiqəyə buraxılmır və təqdim olunmuş kitab və elmi məqalələr geri qaytarılmır.

Nominasiyalar üzrə qəbul olunmuş kitab və məqalələr münsiflər heyəti tərəfindən qiymətləndirilir və qaliblər müəyyən edilir. Qaliblərin adları dekabrın 6-da RYTN sahəsi işçilərinin peşə bayramı günü açıqlanacaq.

Birinci, ikinci və üçüncü yerin qalibləri qiymətli hədiyyələrlə mükafatlandırılacaq.

Əlavə məlumat üçün [email protected] elektron poçtuna müraciət etmək olar.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.