İQTİSADİYYAT
Azərbaycanda təşkil olunan sərgilərə maraq göstərən ölkələrin sayı ildən-ilə artır
Bakı, 2 aprel, Ceyhun Rüstəmov, AZƏRTAC
Aprelin 2-də Bakıda “AITF-2015” 14-cü Azərbaycan Beynəlxalq turizm və səyahətlər, “Horex Caucasus-2015” 9-cu Qafqaz Beynəlxalq mehmanxana, restoran və supermarketlər üçün avadanlıq və ləvazimatlar və “CIBS” 2-ci Xəzər Beynəlxalq kater və yaxtalar sərgilərinin açılışı ilə beynəlxalq sərgi və konfransların növbəti ilinə start verilib. Xəzəryanı regionunun aparıcı sərgi təşkilatçısı “Iteca Caspian” şirkəti öz tərəfdaşı - Böyük Britaniyanın “ITE Group plc” şirkəti ilə birlikdə cari ildə də bir çox ixtisaslaşmış sərgi və konfranslar təşkil etməyi planlaşdırır. “Iteca Caspian” şirkətinin direktoru Fərid Məmmədov bununla bağlı AZƏRTAC-ın suallarını cavablandırıb:
- Fərid müəllim, bu gündən Azərbaycanda beynəlxalq sərgi və konfransların növbəti ilinə başlanılır. Zəhmət olmasa bu barədə oxuculara məlumat verərdiniz. 2015-ci ildə hansı sərgilərin keçirilməsi nəzərdə tutulur, “Iteca Caspian” şirkəti bununla bağlı nə kimi işlər görür?
- “Iteca Caspian” şirkəti 2015-ci ildə ölkə iqtisadiyyatının bir çox sahələrini əhatə edən 17 ixtisaslaşmış sərgi və 2 konfransın təşkilini planlaşdırır. Bu il mövsüm aprelin 2-də işə başlayan Azərbaycan Beynəlxalq turizm və səyahətlər (“AITF-2015”), Mehmanxana, restoran və supermarketlər üçün avadanlıq və ləvazimatlar (“HOREX Caucasus-2015”), habelə Kater və yaxtalar (“CIBS-2015”) sərgiləri ilə açılır. Bu sərgilər aktiv yay turizm mövsümü astanasında ən vacib istiqamət və xidmətləri nümayiş etdirir. Daha sonra estafeti nəqliyyat sahəsi üzrə aparıcı tədbir - Nəqliyyat, tranzit və logistika (“TransCaspian-2015”) və Yol infrastrukturu və ictimai nəqliyyat (“Road & Traffic-2015”) sərgiləri götürəcək. Bu sərgilər mayın 12-14-də təşkil olunacaq. Azərbaycanda elan olunmuş “Kənd təsərrüfatı ili” ilə əlaqədar olaraq, tərəfdaşımız “Caspian Event Organisers” (CEO) şirkətinin təşkil etdiyi Azərbaycan Beynəlxalq qida sənayesi (“WorldFood Azerbaijan-2015”) və Azərbaycan Beynəlxalq kənd təsərrüfatı (“Caspian Agro-2015”) sərgilərinə marağın artması müşahidə edilir. Mayın 21-23-də keçiriləcək bu sərgilərdə 250-dən artıq şirkətin iştirakı planlaşdırılır. Həmişəki kimi, regiondakı energetika bazarının iştirakçılarını qiymətləndirmək üçün ən yaxşı platforma qismində iyunun 2-5-də keçiriləcək 5-ci Xəzər Beynəlxalq energetika və alternativ enerji (“Caspian Power-2015”) sərgisi və regionun ən böyük ixtisaslaşmış 22-ci Beynəlxalq Xəzər neft və qaz (“Caspian Oil and Gas-2015”) sərgi və konfransları çıxış edəcək.
Qısa fasilədən sonra isə sentyabr ayında payız sərgi mövsümünün açılışı olacaq. Bu mövsümdə bir sıra beynəlxalq sərgilər - 21-ci Azərbaycan Beynəlxalq səhiyyə (“BIHE-2015”), 9-cu Beynəlxalq gözəllik və estetik tibb (“Beauty Azerbaijan-2015”), 9-cu Beynəlxalq təhsil (“Education-2015”), 9-cu Beynəlxalq karyera (“Career-2015”), 21-ci Beynəlxalq inşaat (“BakuBuild-2015”), 8-ci Beynəlxalq istilik, havalandırma və kondisiyalaşdırma sistemləri (“Aqua-Therm Baku-2015”), 8-ci Xəzər Beynəlxalq mühafizə, təhlükəsizlik və xilasetmə vasitələri” (“CIPS Caspian-2015”), 6-cı Beynəlxalq ətraf mühit (“СТЕ-2015”) və 21-ci Beynəlxalq telekommunikasiya və informasiya texnologiyaları (“Bakutel-2015”) sərgiləri təşkil olunacaq. 2014-cü ildə böyük uğur qazanmış Xəzər Beynəlxalq su texnologiyaları (CATEC) və Azərbaycan Beynəlxalq müdafiə sənayesi (ADEX) sərgiləri isə əvvəlcədən planlaşdırıldığı kimi, 2016-cı ildə keçiriləcək.
- Sizcə, bu sərgi və konfranslar ötən il keçirilmiş eyni tədbirlərdən nə ilə fərqlənəcək?
- Bu il biz sərgilərdə iştirak edən şirkətlərin və təmsil olunan ölkələrin sayca artacağını gözləyirik. Məsələn, 14-cü Azərbaycan Beynəlxalq turizm və səyahətlər (“AITF-2015”) sərgisində 42 ölkə iştirak edir və bu, Azərbaycanda təşkil olunan bütün sərgilərlə müqayisədə rekord göstəricidir. Bəzi sərgilərin isə ekspozisiya sahəsi genişlənmişdir. Builki sərgi iştirakçılarının 50 faizdən çoxu debütantdır və onlar Azərbaycandakı sərgidə müvafiq sahə üzrə ən son texnologiyaları təqdim edəcəklər. Məhz buna görə də əminəm ki, bizi yeni müqavilələrin imzalanması və birgə müəssislərin təsis edilməsi ilə nəticələnəcək maraqlı və məhsuldar sərgi ili gözləyir.
- Builki sərgilərə hansı yeni ölkələr qatılacaq?
- Azərbaycanda təşkil olunan sərgilərə maraq göstərən ölkələrin sayı ildən-ilə artır. Bir qədər öncə mən turizm sərgisinin rekord göstəriciyə imza atdığını vurğuladım. Bu il 42 ölkə arasında Avstraliya sərgidə ilk dəfə təmsil olunur və məhz bu il “AITF-2015” sərgisində Maldiv adalarının milli stendi yer alacaq. Maldiv adalarını təmsil edən şirkətlər daha əvvəl də sərgiyə qatılıblar, lakin onlar bu il ilk dəfə milli stendlə iştirak edəcəklər. 21-ci Azərbaycan Beynəlxalq qida sənayesi (“WorldFood Azerbaijan-2015”) sərgisində isə Əlcəzair, Argentina və Koreya şirkətləri debütantdırlar. Turizm mövsümü yenicə başlandığına görə mən bütün statistik məlumatları hələlik qeyd edə bilmirəm. Lakin bir çox dövlətlər Azərbaycanda mövcud olan sabit iqtisadi vəziyyət və respublikamızın beynəlxalq müstəvidə qazandığı nüfuz sayəsində ölkəmizə potensial tərəfdaş kimi baxır.
- Bildiyimiz kimi, 2015-ci il respublikamızda “Kənd təsərrüfatı ili” elan olunub. Həmçinin, iyun ayında Bakıda birinci Avropa Oyunları keçiriləcək. Sərgilər mövsümündə bu sahələrlə bağlı nə kimi yeniliklər olacaq?
- Bu ilin Azərbaycanda “Kənd təsərrüfatı ili” elan edilməsi şübhəsiz ki, sənayenin inkişafına müsbət təsir göstərərək bütün əlaqədar strukturların diqqətini qida sənayesinin potensialına cəlb edir. Biz yerli və xarici şirkətlərin “WorldFood Azerbaijan-2015” və “CaspianAgro” sərgilərinə göstərdikləri böyük maraq sayəsində bunu görürük. Bu il ənənəvi olaraq eyni tarixdə təşkil olunan sərgilər Bakı Ekspo Mərkəzinin iki salonunu və xarici meydançasını əhatə edəcək. Milli ekspozisiyaların çoxluğu bu ilin fərqləndirici xüsusiyyətidir. Öz milli stendləri ilə çıxış edəcək ölkələr arasında Argentina, Avstriya, Əfqanıstan, Belarus, Litva və Niderland Krallığını qeyd edə bilərəm.
O cümlədən Azərbaycanın müxtəlif bölgələrini təmsil edən fermer və biznesmenlərdən ibarət böyük nümayəndə heyətlərini sərgilərə cəlb etmək istəyirik ki, onlar kənd təsərrüfatı və qida sənayesi sahələrindəki ən son texnologiya və nailiyyətlərlə yaxından tanış ola bilsinlər. Qeyd etməliyəm ki, fermerlər də “CaspianAgro” sərgisinin kənd təsərrüfatı sahəsindəki yeniliklərlə tanış olmaq və bazarın fəal iştirakçıları ilə danışıqlar aparmaq üçün ən yaxşı platforma olduğunu bildirirlər. Biz bütün mütəxəssisləri mayın 21-23-də “CaspianAgro-2015” sərgisini ziyarət etməyə, habelə yeni avadanlıq və texnologiyalarla tanış olmağa dəvət edirik. Şübhəsiz ki, “CaspianAgro-2015” sərgisi Azərbaycanın inkişaf edən kənd təsərrüfatı ilə birlikdə, investisiya yatırımının, eləcə də ərzaq bazarında Azərbaycanın kənd təsərrüfatı məhsullarının rəqabət qabiliyyətinin artmasına da töhfə verəcək.
O ki qaldı birinci Avropa Oyunlarına, sözsüz, iyunda keçirilməsini səbirsizliklə gözlədiyimiz möhtəşəm idman bayramı sərgilərdə əks olunmaya bilməzdi. “Bakı-2015” birinci Avropa Oyunlarının Təşkilat Komitəsi hələ ötən ildən etibarən sərgilərdə iştirak edir və öz stendində bu möhtəşəm tədbiri müşayiət edəcək sərgilərin, eləcə də xidmət və yeniliklərin təqdimatını keçirir. “AITF-2015” turizm sərgisində də Təşkilat Komitəsinin böyük stendi təqdim olunur və burada birinci Avropa Oyunlarına hazırlıq xüsusunda, eləcə də Oyunlarda iştirak üçün biletlərin internet vasitəsilə sifarişi və satın alınması barədə tam məlumat əldə etmək mümkündür.
Mən, həmçinin fürsətdən istifadə edərək, informasiya tərəfdaşımız olan AZƏRTAC ilə əməkdaşlıq etməkdən məmnun olduğumuzu bildirmək istərdim. Sizə sərgilərdə uğurlu iş arzulayır və oxucularınızı təşkil etdiyimiz sərgilərə dəvət edirəm.
- Çox sağ olun, müsahibəyə görə təşəkkür edirəm.