CƏMİYYƏT


Azərbaycanda vərəm xəstələrinin sayında azalma müşahidə olunur VİDEO

A+ A

Bakı, 10 avqust, AZƏRTAC

Səhiyyə Nazirliyinin Milli Vərəm Proqramı çərçivəsində Elmi-Tədqiqat Ağciyər Xəstəlikləri İnstitutunun nəzarəti altında respublikada epidemioloji vəziyyəti xarakterizə edən vərəm xəstəliyinə dair statistik göstəricilər toplanaraq analiz olunur. Belə ki, son 5 ildə xəstələnmənin dinamikasında müsbət dəyişikliklər müşahidə olunur. Bu da öz növbəsində vərəm üzrə işin yaxşı təşkilindən xəbər verir.

AZƏRTAC xəbər verir ki, bu fikirlər Elmi-Tədqiqat Ağciyər Xəstəlikləri İnstitutunun fəaliyyətinə həsr edilmiş “dəyirmi masa”da səsləndirilib.

Tədbirdə qeyd edilib ki, epidemioloji vəziyyəti xarakterizə edən əlavə gostəricilərdən biri də ilkin aşkar olunmuş vərəmli xəstələr arasında ayrı-ayrı kliniki formalar üzrə xəstələnmədir. Ümumilikdə ölkə üzrə ocaqlı (erkən) vərəm formalarının artması, infiltrativ vərəm formalarının azalması, gecikmiş, yayılmış vərəm formalarının sayında isə stabilləşmə müşahidə olunur. Epidemioloji prosesin gedişini təyin etmək üçün 14 yaşadək və 15-17 yaş qruplarında xəstələnən uşaqların sayı daim hesablanır.

İnstitutun direktor müavini İradə Axundova bildirib ki, son illər ərzində uşaqlar və yeniyetmələr arasında vərəmlə xəstələnmənin azalması müşahidə olunur. Bu, ölkədə ümumilikdə epidemioloji proseslərin stabilləşməsini göstərir. Vərəmli xəstələrin dərmanla təchizatını dövlət 2010-cu ildən öz üzərinə götürüb. Bununla yanaşı, 2013-cü ildən etibarən dərmana davamlı vərəmli xəstələrin də müalicəsi üçün lazım olan dərman preparatları dövlət tərəfindən təchiz olunur. Hazırda dərmana davamlı vərəmli xəstələrə xidmət üçün müasir standartlara cavab verən 3 mərkəz istifadəyə verilib. Direktor müavini Azərbaycanda 8 minə qədər vərəm xəstəsinin qeydiyyatda olduğunu və onların tam pulsuz müalicə aldıqlarını da söyləyib.

İ.Axundova Elmi-Tədqiqat Аğciyər Xəstəlikləri İnstitutunun elmi fəaliyyətini dövlətimizin başçısının Sərəncamı ilə təsdiq edilmiş “Azərbaycan Respublikasında 2009-2015-ci illərdə elmin inkişafı üzrə Milli Strategiya”ya uyğun aparıldığını diqqətə çatdırıb. Bildirib ki, institut 12 kliniki şöbəni əhatə edən 6 elmi bölmədən ibarətdir. Klinikada yüksək ixtisaslı kadrlar fəaliyyət göstərir. Onların arasında tibb elmləri doktoru, tibb elmləri üzrə fəlsəfə doktorları var.

Tədbirdə respublikamızın bir çox şəhər və rayonlarında ağciyər xəstəliklərinin erkən diaqnostikası, müalicə və profilaktikasının keyfiyyətinin artmasına, həmçinin yerlərdə bu sahədə çalışan həkimlərin və orta tibb işçilərinin təkmilləşdirilməsi məsələlərinə də xüsusi fikir verildiyi qeyd olunub. Bu məqsədlə institutun əməkdaşları tərəfindən Bakıda və rayonlarda, o cümlədən penitensiar müəssisələrdə 500-dən artıq təlimin keçirildiyi bildirilib. Qeyd edilib ki, ilk dəfə məhkum olunmuş şəxslər arasında vərəmin yayılması və xəstəliyin xüsusiyyətləri öyrənilib. Nəticələrə əsaslanaraq müalicə və profilaktika tədbirləri yerinə yetirilib. Azadlığa çıxdıqdan sonra da belə xəstələr yaşayış yerindən asılı olmayaraq uzun müddət ciddi həkim nəzarəti altında müalicə ediliblər.

“Dəyirmi masa”da Dünya Səhiyyə Təşkilatının vərəmlə bağlı statistik göstəriciləri də açıqlanıb. Məlumat verilib ki, dünyada il ərzində 9 milyondan artıq insan vərəmlə xəstələnir və 1 milyon 800 min insan bu xəstəlikdən vəfat edir. Bu səbəbdən vərəm problemi dünya səhiyyə sisteminin qlobal problemi olaraq cəmiyyətin sağlam inkişafına təhlükə yaradır. Xəstəliyin vaxtında müalicə olunmaması əlillik və ölümlə nəticələnir. Bu problemlərin Azərbaycanda da aktual olduğu, lakin son illərdə ölkəmizdə xəstələnmə səviyyəsinin azalması, müalicə effektivliyinin yüksəlməsi, xəstə kontingentin əhəmiyyətli dərəcədə azalması tendensiyasının müşahidə edildiyi vurğulanıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.