ELM VƏ TƏHSİL
Azərbaycanı Danimarkada tanıdan professorlar
AzərTAc-ın Kopenhagendən reportajı VİDEO
Kopenhagen, 6 dekabr, A.Həsənova, E.Şahbalayev, AZƏRTAC
Xaricdə yaşayan soydaşlarımız təkcə yaşadıqları ölkələrdə diaspor təmsilçisi kimi fəaliyyət göstərmir, eləcə də həmin ölkələrin ictimai-siyasi, elmi və mədəni həyatında yüksək fəallıq göstərərək Azərbaycanı uğurla təmsil edirlər.
AZƏRTAC-ın Danimarkaya ezam edilmiş əməkdaşları belə azərbaycanlılardan olan, Danimarkanın Qlostrup xəstəxanasının nevrologiya şöbəsinin baş həkimi, Kopenhagen Tibb Universitetinin professoru Məsud Aşina və onun qardaşı, Nyu-York Tədqiqatlar İnstitutunun baş elmi işçisi, Nyu-York Tibb Universitetinin professoru Səid Aşina ilə görüşüblər.
Məsud Aşina 1965-ci ildə Bakıda doğulub, Azərbaycan Tibb Universitetini bitirib, aspiranturada təhsil aldıqdan sonra Danimarkada doktorluq dissertasiyası müdafiə edib. Danimarkada həkim kimi Kopenhagenin Rigs xəstəxanasında fəaliyyətə başlayıb, sonra Qlostrup xəstəxanasında bir çox layihələrə rəhbərlik edib.
AZƏRTAC-a müsahibəsində Məsud Aşina uzun illər Danimarkada yaşamasına baxmayaraq, Azərbaycan ilə sıx əlaqə saxladığını, Vətənə tez-tez gəldiyini dedi. O, Azərbaycanda son on ildə gördüyü dəyişikliklərə çox sevindiyini bildirdi. Öz sahəsində şöhrət qazanmış həkim Azərbaycanda tibb sahəsində bir sıra layihələr həyata keçirdiyini, o cümlədən nevrologiya üzrə beynəlxalq konfrans təşkil etdiyini diqqətə çatdırdı.
Qlostrup Hospitalının Nevrologiya şöbəsinin baş həkimi M.Aşina tibb sahəsində, xüsusilə miqren xəstəliyinin öyrənilməsi, müalicəsi ilə bağlı ciddi nailiyyətlər əldə edib. Bu sahədə 200-dən artıq məqalənin və 35-dən çox elmi kitabın müəllifi olan professor 2011-ci ildə “Nevrologiya” sahəsi üzrə “Mogens Fog” mükafatına layiq görülüb.
M.Aşina bu gün iştirak etdiyi beynəlxalq tədbirlərdə ünsiyyətdə olduğu tanınmış alimlərlə söhbətində ölkəmiz haqqında eşitdiyi müsbət rəylərin onda xoş təəssürat oyatdığını bildirərək dedi: “İndi Azərbaycanı dünyanın hər yerində tanıyırlar. 10-15 il əvvəl belə deyildi. Ölkəmizdə keçirilən beynəlxalq konfrans və seminarlar Azərbaycanı dünyada tanıtmaq imkanı yaradıb. Mən tez-tez xarici ölkələrdə mühazirələr oxuyuram. Getdiyim hər yerdə azərbaycanlı olduğumu bilən kimi, ilk növbədə Bakıdan, onun gözəlliyindən söz açılır və bu, məni sevindirir”.
Doktor Məsud Aşina son illər tibb sahəsində əldə etdiyi nailiyyətlə Danimarka ictimaiyyəti və dünya tibb mütəxəssislərinin diqqətini özünə cəlb edib. Belə ki, professor miqren üzrə 1998-ci ildən 2013-cü ilədək irəli sürdüyü nəzəriyyələrin tətbiqi ilə bağlı rəhbərlik etdiyi qrupla bir il ərzində araşdırma aparıb.
M.Aşina tanıdığı elm adamlarının bu gün Ermənistan-Azərbaycan, Dağlıq Qarabağ münaqişəsi ilə çox maraqlandıqlarını vurğulayaraq dedi: “Mənə Dağlıq Qarabağ problemi ilə bağlı verilən suallara cavabım bir olur: Bizim ərazilərimiz işğal edilib, insanlarımız evindən, eşiyindən, doğma torpağından didərgin düşüblər. Azərbaycan dövləti də, xalqı da hələ ki münaqişənin sülh yolu ilə həllinə tərəfdardır”.
Qeyd edək ki, Məsud Aşinanın birillik araşdırma qrupunun fəaliyyətində onun qardaşı Səid Aşina da iştirak edib.
Səid Aşina tibb sahəsində əldə etdiyi nailiyyətlər, baş ağrıları və miqrenin müalicəsi istiqamətində həyata keçirdiyi tədqiqatlardan danışdı. O bildirdi ki, bu gün Azərbaycanda da bu xəstəlikdən əziyyət çəkənlər çoxdur və Vətəndə də bu istiqamətdə həyata keçirilən layihələrdə yaxından iştirak edir.
S.Aşina Bakıda anadan olub. Burada orta məktəbi bitirən Səid sonradan ali təhsilini Danimarkada davam etdirib. Kopenhagen Tibb Universitetinin məzunudur. Hazırda isə o, Nyu-York Tədqiqatlar İnstitutunun baş elmi işçisi, Nyu-York Tibb Universitetinin professorudur. Hazırda Nyu-Yorkun Albert Eynşteyn Tibb Universitetində elmi tədqiqatlarını davam etdirir. O, həmçinin Manhettendə, Beth İsrail Tibb Mərkəzinin nevrologiya və anesteziologiya kafedrasının dosenti və baş ağrıları proqramının direktorudur.
S.Aşina Azərbaycanda tibb sahəsində çox böyük potensialın olduğunu qeyd edərək bildirdi: “Bu gün Azərbaycanda çox savadlı gənc həkimlər yetişir. Bu isə səhiyyəmizin inkişafı deməkdir. Ümumiyyətlə, Bakıda çox böyük dəyişikliklər var. Müasir infrastruktur, yaraşıqlı küçə və meydanlar, yeni tikilən binalar şəhəri daha da gözəlləşdirir. Biz buna çox şadıq və əminik ki, Azərbaycan daha da inkişaf edəcək”.
S.Aşina Londonda keçirilən baş ağrıları üzrə beynəlxalq konqresdə nüfuzlu mükafata layiq görülüb. O, bu mükafata Albert Eynşteyn Tibb Universitetində apardığı elmi tədqiqatların uğurlu nəticəsi və miqren üzrə yeni kəşfinə görə layiq görülüb.