SİYASƏT
Azərbaycanın Çexiyadakı səfirliyi Respublika Günü münasibətilə rəsmi qəbul keçirmişdir VİDEO
Bakı, 28 may (AZƏRTAC). Azərbaycanın Çexiyadakı səfirliyi tərəfindən 28 May - Respublika Günü münasibətilə rəsmi qəbul keçirilmişdir.
Səfirlikdən AZƏRTAC-a bildirmişlər ki, qəbulda Çex Respublikası Parlamentinin Deputatlar Palatasının sədri, Çexiya-Azərbaycan parlamentlərarası dostluq qrupunun rəhbəri Yan Hamaçek, Deputatlar Palatasının sədr müavinləri Voytex Filip və Yaroslava Yermanova, Çexiyanın daxili işlər naziri Milan Xovanets, xarici işlər nazirinin müavini Karel Boruvka, Çex Respublikası Prezidenti Administrasiyasının xarici əlaqələr şöbəsinin müdiri Hinek Kmoniçek, Deputatlar Palatasının xarici əlaqələr komitəsinin sədri, keçmiş xarici işlər naziri Karel Şvartsenberq, komitənin sədr müavini, Avropa Parlamentinin yeni seçilmiş üzvü Katerjina Koneçna, keçmiş baş naziri Mirek Topolanek, sabiq xarici işlər naziri Tsıril Svoboda, digər senator və deputatlar, Praqada səfərdə olan Azərbaycan Xarici İşlər Nazirliyinin nümayəndə heyəti iştirak etmişlər.
Azərbaycanın və Çexiyanın dövlət himnləri səsləndirildikdən sonra diplomatik korpus adından çıxış edən Müqəddəs Taxt-tacın Çexiyadakı apostol nunsisi yepiskop Cüzeppe Leanza Azərbaycan xalqını əlamətdar gün münasibəti ilə təbrik etmişdir. Yepiskop C.Leanza Azərbaycanın Çexiyadakı səfiri Tahir Tağızadənin iki ölkə arasında dostluq və tərəfdaşlıq münasibətlərinin qurulması, yüksək səviyyəli qarşılıqlı səfərlərin təşkili, eləcə də iqtisadi, elmi-texniki və mədəniyyət sahələrində əlaqələrin genişləndirilməsi və möhkəmləndirilməsi istiqamətində fəaliyyətindən danışmışdır.
Səfiri Tahir Tağızadə Azərbaycan və Çexiya arasında siyasi, iqtisadi və humanitar sahədə mövcud münasibətlər, bu il keçirilən yüksək səviyyəli səfər və gələcəkdə nəzərdə tutulan görüşlər barədə məlumat vermiş, iki ölkənin tərəfdaşlıq əlaqələrinin daha da möhkəmlənəcəyinə əminliyini ifadə etmişdir.
Çex Respublikası Parlamentinin Deputatlar Palatasının sədri, Çexiya-Azərbaycan parlamentlərarası dostluq qrupunun rəhbəri Yan Hamaçek 28 May-Respublika Günü münasibətilə xalqımızı təbrik edərək, ölkələrimiz arasında yüksək səviyyəli qarşılıqlı səfərlərin əlaqələrin inkişaf etdirilməsinin əsasını təşkil etdiyini vurğulamışdır. O, rəhbərlik etdiyi Çexiya-Azərbaycan parlamentlərarası dostluq qrupunun fəaliyyətindən danışmış, ölkəmizin Çexiya üçün vacib tərəfdaş olduğunu diqqətə çatdırmışdır.
Sonda səfir T.Tağızadə ölkələrimiz arasında səmərəli əməkdaşlığın uğurla davam etdiriləcəyinə ümidvar olduğunu bildirmişdir.
Tədbir konsert proqramı ilə davam etmişdir.