Kopenhagen, 7 may (AZƏRTAC). Azərbaycanın “Eurovision-2014” mahnı müsabiqəsində təmsilçisi Dilarə Kazımova bu mötəbər yarışmanın finalına vəsiqə qazanmışdır.

AZƏRTAC-ın Danimarkaya ezam olunmuş müxbiri xəbər verir ki, müsabiqədə ölkəmizin təmsilçisi Dilarə Kazımova isveçli Stefan Örnün bəstələdiyi “Start a fire” mahnısını təqdim etmişdir.

Dilarə Kazımovanın ifa etdiyi “Start a fire” mahnısının bəstəkarı Stefan Örn bundan əvvəl 2010-cu ildə Norveçin paytaxtı Oslo şəhərində keçirilən “Eurovision-2010” mahnı müsabiqəsində Səfurə Əlizadənin ifa etdiyi “Drip drop” və Azərbaycana 2011-ci ildə qələbə sevincini yaşadan Eldar Qasımov və Nigar Camalın “Running scared” mahnılarının da müəllifidir. Stefan Örn hazırda Stinq, Bono və digər dünya məşhurları ilə birgə çalışır.

Azərbaycan təmsilçisi geyimindən tutmuş səhnə tərtibatına qədər mükəmməl performans nümayiş etdirmişdir. O, havada hərəkət edən qadın gimnast və arxada ifa edən üç ifaçı ilə səhnəyə çıxmışdır.

“Eurovision” mahnı müsabiqəsinin tarixində ilk dəfədir ki, havada gimnast hərəkət nümayiş etdirir.

Dilarə Kazımovanın səhnə performansının quruluşçu rejissoru isveçli rejissor və xoreoqraf Osa Enqmandır. Səhnə quruluşu yapon əsilli polşalı xoreoqraf Petr Torazava Giroya məxsusdur.

Təmsilçimizin şousunda sevgidə baş verən dəyişikliklər səhnə performansında təcəssüm olunur. İnsanların bir-birinə, ətrafındakılara qarşı daha duyarlı olmağa çağırılır. Mahnıda adi qığılcımın böyük bir alov yarada biləcəyindən söhbət açılır.

Həzin səsi, gözəl ifa tərzi ilə seçilən Dilarə Kazımova “Eurovision-2014” mahnı müsabiqəsinin favoritlərindən hesab olunur.

Jurnalistlər və bu müsabiqəni izləmək üçün Avropanın müxtəlif ölkələrindən gəlmiş fanlar təmsilçimizin finalda şansını yüksək qiymətləndirirlər.

Üzeyir Hacıbəyli adına Bakı Musiqi Akademiyasını bitirən Dilarə Kazımova pop formatında musiqilərin, həmçinin soul, ballada janrlarında mahnıların mahir ifaçısıdır.

Dilarə Kazımova “Böyük səhnə” müsabiqəsindən sonra daha da məşhurlaşmışdır. Təmsilçimiz bir sıra mötəbər yarışlarda ölkəmizi layiqincə təmsil etmiş, mükafatlara layiq görülmüşdür.

Dilarə Kazımova İctimai Televiziya və Radio Yayımları Şirkətində yayımlanan “Böyük səhnə” layihəsinin qalibi olmuş və ölkəmizi bu mötəbər yarışmada təmsil etmək hüququ qazanmışdır.

Anar Rzayev

AZƏRTAC-ın müxbiri

Kopenhagen