SİYASƏT


“Azərbaycanın Gənc Dostları” multikultural birliyinin dünyadakı həmyaşıdlarına müraciəti

Bakı, 7 iyul, AZƏRTAC

“Azərbaycanın Gənc Dostları” multikultural birliyi dünyadakı həmyaşıdlarına müraciət edib.

Bu barədə AZƏRTAC-a Bakı Beynəlxalq Multikulturalizm Mərkəzinin mətbuat xidmətindən məlumat veriblər.

Müraciətdə deyilir: “Ermənistanın Azərbaycan Respublikasının dünya birliyi tərəfindən tanınan ərazilərinin 20 faizini işğal etməsi nəticəsində dinc insanlara qarşı törədilən hərbi cinayətlər bu gün də davam edir. Cəbhə boyu ərazilərdə yaşayan Azərbaycan vətəndaşları mütəmadi olaraq müxtəlif silahlardan atəşə tutulur, artilleriya hücumuna məruz qalır.

Biz - Azərbaycanın multikulturalizm sahəsində əldə etdiyi nailiyyətləri, uğurlu təcrübəni dünyada yayan Azərbaycanın gənc dostları olaraq iyulun 4-də Ermənistan silahlı qüvvələrinin Azərbaycanın işğal olunan ərazilərindən Füzuli rayonunun Alxanlı kəndinin dinc əhalisini, yaşayış yerlərini qəsdən məhv etmək məqsədilə mina və qumbaraatanlarla atəşə tutaraq növbəti təxribat törətməsini qətiyyətlə pisləyirik. Dünyanın müxtəlif ölkələrində yaşayan həmyaşıdlarımızı, dünyada sülh və əmin-amanlığı təbliğ edən dostlarımızı, sülhpərvər insanları, o cümlədən BMT-ni, Avropa İttifaqını, Avropa Şurasını, ATƏT-in Minsk qrupunu, İslam Əməkdaşlıq Təşkilatını mülki şəxsləri, məsum körpələri, qadın və qocaları hədəf seçən bu cinayətkarların tezliklə cəzalandırılması istiqamətində səylərini birləşdirməyə çağırırıq.

İyulun 4-də baş verən və 2 yaşlı günahsız Zəhranın ölümünə səbəb olan erməni silahlı birləşmələrinin törətdiyi dəhşətli cinayət faktı uşaq ölümlərinə göz yummayan hər bir dünya insanını ayağa qaldırmalıdır. Bu cinayət bir azərbaycanlı körpə qıza qarşı deyil, bütün bəşəriyyətə, sabahımız olan uşaqlara qarşı yönələn cinayətdir.

Biz - Azərbaycanın gənc dostları, öz həmyaşıdlarımızı, beynəlxalq ictimaiyyəti dinc insanların amansız qətlinə qarşı öz qətiyyətli münasibətini bildirməyə, təcavüz və təxribat hallarını kəskin qınamağa çağırır, bu kimi halların qarşısının alınması, ədalətli sülhün bərqərar olunması naminə öz səslərini ucaltmağa səsləyirik.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.