İstanbul, 20 noyabr (AZƏRTAC). Azərbaycanın kütləvi informasiya vasitələrinin nümayəndələri Türkiyənin İstanbul şəhərində “SOCAR-Türkiyə AŞ” şirkətinin direktoru və “Petkim” Petrokimya Şirkətinin idarə heyətinin üzvü Kənan Yavuzla görüşmüşlər.

AZƏRTAC xəbər verir ki, K.Yavuz Azərbaycan Respublikası Dövlət Neft Şirkətinin (SOCAR) Türkiyədə həyata keçirdiyi və gələcəkdə reallaşdırmağı nəzərdə tutduğu layihələrin bu ölkədə neft-qaz və kimya sənayesinin inkişafına təkan verəcəyini demişdir. Bildirilmişdir ki, 2008-ci ildə “Petkim”in əsas hissələrini alaraq Türkiyə bazarına qoşulan SOCAR neft-kimya sektorunun yenidən qurulmasına 250 milyon dollar sərmayə yatırmışdır. Bu da şirkətin illik istehsal həcminin 10 faiz artmasına səbəb olmuşdur.

Qeyd edilmişdir ki, SOCAR-ın qardaş ölkədə ən böyük sərmayəsi “Star” neft emalı zavodunun tikintisinə yönəldilmişdir. İllik 10 milyon ton emal gücünə malik olan zavodun layihə dəyəri 5 milyard ABŞ dolları təşkil edir. Tikintisinin 2017-ci ilə başa çatdırılması planlaşdırılan zavodda emal ediləcək məhsulun 3 milyon tonu “Petkim” şirkəti tərəfindən Türkiyədə istehlak olunacaq, qalan 7 milyon tonu isə dünya bazarına çıxarılacaqdır. Zavod Türkiyədə bir nöqtədə ən böyük investisiya layihəsidir. Layihə çərçivəsində İzmir şəhərinin Əliağa bölgəsində 600 meqavat gücündə yeni istilik elektrik stansiyası da tikiləcəkdir.

Qeyd olunmuşdur ki, artıq İzmir şəhərində regionun və Türkiyənin ən böyük konteyner limanının tikintisinə başlanılmışdır. Layihənin bütün maliyyə məsələləri həll olunmuş, tender nəticəsində tikintidə iştirak edəcək şirkətlər seçilmişdir. Hazırda layihə ərazisində torpağın hazırlanması işi aparılır. Tikintisinin iki ilə başa çatdırılması planlaşdırılan layihənin maliyyə dəyəri 300 milyon dollardır.

Diqqətə çatdırılmışdır ki, SOCAR-ın Türkiyədəki ən böyük sərmayəsi və əhəmiyyətli layihəsi bu yaxınlarda Azərbaycan Prezidenti İlham Əliyevin Türkiyəyə səfəri zamanı bu ölkənin Baş naziri Rəcəb Tayyib Ərdoğanla görüşündə gələn il təməli qoyulmasına qərar verilən Trans-Anadolu boru xətti (TANAP) layihəsidir. İldə 16 milyard kubmetr təbii qaz nəqlinə hesablanmış boru kəmərinin 2018-ci ildə istifadəyə verilməsi nəzərdə tutulmuşdur. Bu kəmərlə daşınacaq qazın 6 milyard kubmetri Türkiyəyə, qalanı isə Avropaya satılacaqdır. Bununla da Azərbaycandan Türkiyəyə ixrac olunacaq qazın həcmi 12,6 milyard kubmetrə çatacaqdır. Layihə üzrə SOCAR-ın da mühəndisləri daxil olmaqla 250-yə yaxın şirkətin əməkdaşı tərəfindən mühəndislik işi aparılır. Boru xətti Türkiyə ərazisində 1750 kilometrə yaxın məsafədən keçəcəkdir. Hazırda “Botaş” şirkəti ilə birgə torpaqların seçilməsi işi aparılır və layihənin keçəcəyi ərazilərdə SOCAR-ın geoloqları işləyirlər.

Bununla yanaşı, SOCAR 2018-ci ilədək Türkiyənin İzmir şəhərində 9 milyard dollarlıq, ümumilikdə isə TANAP layihəsi də daxil olmaqla bu ölkəyə 20 milyard dollara yaxın investisiya yatırdacaqdır. Bununla da “SOCAR-Türkiyə AŞ” “Sabançı” və “Koç” kimi holdinqlər ilə birlikdə ölkənin üç böyük şirkətindən biri olacaqdır. Həmçinin SOCAR Türkiyəyə investisiya qoyan ikinci ən böyük xarici şirkətdir.

Görüşdə qarşılıqlı fikir mübadiləsi aparılmış, azərbaycanlı jurnalistlərin sualları cavablandırılmışdır.