İQTİSADİYYAT
Azərbaycanın “Neuron Technologies” şirkəti beynəlxalq tenderin qalibi olub
Bakı, 30 iyun, AZƏRTAC
Azərbaycanın aparıcı informasiya texnologiyaları (IT) şirkətlərindən biri olan “Neuron Technologies”, Dünya Bankı tərəfindən maliyyələşdirilən beynəlxalq tenderin qalibi olub. Azərbaycan şirkəti Dünya Bankının "Mərkəzi Asiyada hidrometeoroloji xidmətlərin modernləşdirilməsi" layihəsi çərçivəsində Qırğızıstan Respublikası Fövqəladə Hallar Nazirliyi yanında Hidrometeorologiya Agentliyi tərəfindən keçirilən “Müasir veb-resurslar və texnologiyalar vasitəsilə informasiyanın təqdim edilməsi və hidrometeoroloji xidmət proseslərinin avtomatlaşdırılması sisteminin yaradılması” layihəsinin icrasını həyata keçirəcək. Layihənin icrası bir il ərzində həyata keçiriləcək və növbəti 5 il ərzində “Neuron Technologies” şirkəti texniki dəstək xidmətlərini təmin edəcək.
Şirkətdən AZƏRTAC-a bildirilib ki, layihə çərçivəsində texniki avadanlıqların təchizi və quraşdırılması, müvafiq proqram təminatının işlənib hazırlanması, Qırğız Hidrometin korporativ veb-portalının müvafiq hidrometeoroloji sistemlərlə inteqrasiyası işlərinin yerinə yetirilməsi nəzərdə tutulub.
Dünya Bankı və Qırğızıstan Hidrometeorologiya Agentliyi tərəfindən birgə qiymətləndirilən bu beynəlxalq rəqabətli prosesdə “Neuron Technologies” şirkətinin təqdim etdiyi tender təklifi digər iddiaçı şirkətlər arasında texniki cəhətdən ən mükəmməl və kommersiya cəhətdən ən münasib olaraq seçilib. Sevindirici haldır ki, Almaniya, Rusiya, Qazaxıstan, Qırğızıstanın IT şirkətlərinin iştirak etdiyi bu beynəlxalq tenderdə məhz Azərbaycan şirkəti qalib gəlib.
Qeyd edək ki, şirkətin rəhbəri İsmayıl Ələkbərovun başçılıq etdiyi nümayəndə heyəti iyulun 11-də Qırğızıstan Respublikası Fövqəladə Hallar Nazirliyi yanında Hidrometeorologiya Agentliyi ilə müqavilənin imzalanması və layihənin icrası prosesinə start verilməsi məqsədilə Bişkek şəhərinə səfər edəcək.
“Neuron Technologies” şirkəti proqram təminatı həllərinin işlənib hazırlanması, sistem inteqrasiyalarının tətbiqi, informasiya-kommunikasiya texnologiyaları infrastrukturunun qurulması üzrə ixtisaslaşıb və son illər Azərbaycanda və bir sıra xarici ölkələrdə informasiya idarəetmə sistemlərinin, proqram təminatı həllərinin tətbiqi üzrə uğurlu layihələr həyata keçirib. Şirkətin “Made in Azerbaijan” brendi altında xarici ölkələrə ixracının miqyası genişlənməkdədir və Şərqi Avropa, MDB və Mərkəzi Asiya, Yaxın Şərq və Afrika regionları əsas ixrac istiqamətləri olaraq müəyyən edilib.