SİYASƏT
Azərbaycanın Ukraynadakı səfirliyində “Əsrin müqaviləsi Heydər Əliyevin neft strategiyasının təməl daşıdır” mövzusunda “dəyirmi masa” keçirilib
Qonaqlar əvvəlcə tədbirin keçirildiyi “Heydər Əliyev salonu”nda Ümummilli Liderin fəaliyyətinə dair asılmış sərgidə nümayiş etdirilən fotoşəkillərlə tanış olublar.
“Dəyirmi masa”da Azərbaycanın Ukraynadakı səfiri Eynulla Mədətli çıxış edərək ulu öndər Heydər Əliyevin “Əsrin müqaviləsi” ilə başlamış yeni neft strategiyasının Azərbaycanın sonrakı inkişafının təminatı olduğunu diqqətə çatdırıb, bu müqavilənin tərkib hissəsi olaraq həyata keçirilmiş layihələr və xüsusən Bakı-Tbilisi-Ceyhan neft boru kəməri barədə məlumat verib. Səfir dahi liderin Azərbaycan neftinin ixracı yollarının şaxələndirilməsi sahəsində səylərinin ölkəmizin bir istiqamətdən asılılığını azaltdığını, təhlükəsizliyinə zəmanət yaratdığını vurğulayıb.
E.Mədətli daha sonra iri qaz ixracatçısına çevrilmiş ölkəmizin təşəbbüsçüsü və əsas iştirakçısı olduğu Bakı-Tbilisi-Ərzurum və “Əsrin müqaviləsi”nin imzalanmasının 20 illiyi kimi əlamətdar gündə bünövrəsi qoyulacaq Trans-Anadolu qaz kəməri layihəsi barədə də danışıb. Səfir fürsətdən istifadə edərək ölkəmizdə daim şərəfli iş sayılan neftçiləri peşə bayramı münasibətilə təbrik edib, dahi Heydər Əliyev tərəfindən bünövrəsi qoyulmuş və Azərbaycan Prezidenti İlham Əliyev tərəfindən uğurla davam etdirilən neft strategiyasının ölkəmizin və xalqımızın rifahı naminə həyata keçirilməsində onlara uğurlar arzu edib. Diplomat Azərbaycan-Ukrayna iqtisadi əlaqələrinin inkişafında ARDNŞ-in Ukrayna nümayəndəliyinin fəaliyyətini xüsusilə yüksək qiymətləndirib.
Tədbirdə Türkmənistanın Ukraynadakı səfiri Nurberdi Amanmuradov, Türkiyənin Ukraynadakı səfirliyinin müşaviri Fatih Erdal, Ukraynanın səfiri professor Yuriy Koçubey, Ukrayna Prezidenti yanında İdarəetmə Akademiyasının rektoru, professor Yuri Kovbasyuk, Ukrayna Kiçik Elmlər Akademiyasının prezidenti Stanislav Dovgiy, Azərbaycan Respublikası Dövlət Neft Şirkətinin Ukrayna nümayəndəliyi rəhbərinin müavini Həzi Aslanov, “Ukrayna Azərbaycanlılarının Birləşmiş Diasporu” İctimai Təşkilatının sədri Hikmət Cavadov, “Birləşmiş Ukrayna Azərbaycanlıları Konqresi” və “Ukrayna Millətlər Assambleyası” ictimai təşkilatlarının sədri Rövşən Tağıyev, Ukraynada yaşayan azərbaycanlı alimlərdən Arif Quliyev və Fərhad Turanlı, “Azərbaycan-Ukrayna İş Adamları Birliyi” təşkilatının rəhbəri Əli Əliyev, Ukraynada Azərbaycanlı Gənclər Birliyinin sədri İlhamə Allahverdiyeva və digər rəsmi şəxslər çıxış edərək “Əsrin müqaviləsinin əhəmiyyətindən danışıblar.
Türkmənistan səfiri Nurberdi Amanmuradov belə əlamətdar günün sevincini bölüşmək məqsədilə dəvət olunduğuna görə Azərbaycan səfirinə təşəkkür edərək, Bakı-Tbilisi-Ceyhan boru kəməri layihəsinin açılışında iştirakı barədə xatirələrini bölüşüb. O, regiondakı elə çətin bir şəraitdə Azərbaycanın dahi rəhbəri Heydər Əliyevin bu cür uğura nail olmasının möcüzəyə bərabər olduğunu deyib.
Səfir Türkmənistanın da energetika sənayesi barədə danışaraq Azərbaycan və Türkmənistanın regionun enerji təhlükəsizliyində rolunun tədricən daha da artacağını vurğulayıb. N.Amanmuradov Türkmənistan tələbələrinin Azərbaycanda neft-qaz sənayesi üzrə təhsil aldıqlarını xatırladıb, bu sahədə mütəxəssislərin yetişdirilməsinə verdiyi dəstəyə görə qardaş Azərbaycana minnətdarlığını ifadə edib.
Türkiyənin Ukraynadakı səfirliyinin müşaviri Fatih Erdal neft-qaz ehtiyatı olmayan Türkiyənin Azərbaycan kimi qonşusu olduğuna görə bəxti gətirdiyini demiş, ölkəsinin qardaş Azərbaycan və Türkmənistan üçün enerji daşıyıcılarını beynəlxalq bazarlara çıxartmaqda dəhlizə çevrildiyini qeyd edib.
Daha sonra digər çıxışçılar da Azərbaycanda həyata keçirilən neft strategiyası və bu strategiyanın uğurla davam etdirilməsi nəticəsində iqtisadiyyatın başqa sahələrinin də inkişafından danışıb, bir çox ölkələrin qısa müddətdə böyük inkişafa nail ola bilmiş Azərbaycandan nümunə götürməli olduqlarını vurğulayıblar.
Zeynal Ağazadə
AZƏRTAC-ın xüsusi müxbiri
Kiyev