Bakı, 18 noyabr, AZƏRTAC

Noyabrın 18-də Baş Prokurorluqda Azərbaycan Respublikasının dövlət müstəqilliyinin bərpasının 25-ci ildönümünə həsr olunmuş “Müstəqillik dövründə Azərbaycan Prokurorluğunun inkişafı” mövzusunda konfrans keçirilib.

AZƏRTAC xəbər verir ki, Azərbaycan Prezidenti İlham Əliyevin “Azərbaycan Respublikasının dövlət müstəqilliyinin bərpasının iyirmi beşinci ildönümü haqqında” 2016-cı il 11 oktyabr tarixli Sərəncamının icrası məqsədilə Baş Prokurorluq üzrə təsdiq olunmuş Tədbirlər Planına uyğun keçirilmiş tədbirdə Prezident Administrasiyasının, Milli Məclisin, Ədliyyə Nazirliyinin, Ali Məhkəmənin, qeyri-hökumət təşkilatlarının və kütləvi informasiya vasitələrinin nümayəndələri iştirak ediblər.

Konfransda çıxış edən baş prokurorun müavini Namiq Əsgərov dövlət müstəqilliyinin bərpasının Azərbaycan xalqının ən böyük sərvəti olduğunu bildirib. N.Əsgərov müstəqilliyin Azərbaycanın hər bir vətəndaşı üçün müstəsna əhəmiyyət daşıyan ictimai-siyasi hadisə olduğunu qeyd edib. Bildirib ki, 1993-cü ildə müasir müstəqil Azərbaycan dövlətinin memarı və qurucusu Heydər Əliyevin hakimiyyətə qayıdışı ilə dövlətçiliyin məhv olmaq təhlükəsi aradan qalxıb, Ümummilli Liderimizin rəhbərliyi ilə müstəqil dövlət quruculuğu istiqamətində məqsədyönlü gərgin və ardıcıl işlər görülüb. Azərbaycan Respublikasının müstəqil, demokratik, hüquqi, dünyəvi, habelə qanunun aliliyinə və vətəndaş cəmiyyətinə əsaslanan dövlətə çevrilməsi məqsədilə milli dövlət quruculuğu prosesinin həyata keçirilməsi üçün zəruri işlər görülüb, ölkə həyatının bütün sahələrini əhatə edən köklü islahatlara başlanılıb.

Xüsusi vurğulanıb ki, ötən illər ərzində, o cümlədən 2000-ci il aprelin 26-da ümummilli lider Heydər Əliyevin rəhbərliyi ilə Baş Prokurorluqda keçirilən müşavirədən sonra həyata keçirilən məhkəmə-hüquq islahatları nəticəsində prokurorluğun səmərəli fəaliyyəti üçün qanunvericilik və normativ-hüquqi baza yaradılıb. Prokurorluğun strukturunun təkmilləşdirilməsi, fəaliyyətində müasir informasiya texnologiyalarının tətbiqi, vətəndaşların müraciətlərinə baxılması işinin təkmilləşdirilməsi, kadr korpusunun formalaşdırılmasında beynəlxalq standartlara uyğun yeni prosedurlardan geniş istifadə olunması, işə qəbulun müsabiqə yolu ilə və şəffaflıq əsasında həyata keçirilməsi, məhkəmələrdə dövlət ittihamının müdafiəsi işinin yenidən təşkili, istintaq işinin səmərəliliyinin artırılması, beynəlxalq əlaqələrin dairəsinin genişləndirilməsi, nüfuzlu beynəlxalq təşkilatlar və dünya ölkələrinin prokurorluqları ilə əməkdaşlıq münasibətlərinin inkişaf etdirilməsi, işdə mövcud mənfi təzahürün və çatışmazlıqların aradan qaldırılması təmin edilib. Nəticədə prokurorluq orqanları ittiham mövqeyində dayanan təsisatdan əsas məqsədi insan hüquq və azadlıqlarının təmin edilməsi olan orqana çevrilib.

Baş prokurorun müavini müstəqillik illərində prokurorluq orqanlarının müasir dövrün yüksək tələblərinə cavab verən dövlət orqanı səviyyəsində təkmilləşdirilməsində Prezident İlham Əliyevin 2008-ci il 27 sentyabr tarixli Sərəncamı ilə təsdiq edilmiş “Azərbaycan Respublikası Prokurorluğunun fəaliyyətinin müasirləşdirilməsinə dair 2009-2011-ci illər üçün Dövlət Proqramı”nın xüsusi əhəmiyyətini qeyd edib. Vurğulayıb ki, Azərbaycan prokurorluğunun tarixində yeni təkmilləşmə və inkişaf, hərtərəfli müasirləşdirmə dövrünün əsasını qoyan dövlət proqramında nəzərdə tutulan tədbirlərin yerinə yetirilməsi hüquq sisteminin inkişafı prosesində prokurorluğun rolunun artırılması, cinayətkarlığa qarşı mübarizə və istintaq aparılmasında digər hüquq-mühafizə orqanları ilə qarşılıqlı fəaliyyətin təkmilləşdirilməsi, prokurorluğun işində müasir elmi-texniki nailiyyətlərdən geniş istifadə olunması, mərkəzləşdirilmiş informasiya-kommunikasiya sisteminin yaradılması, dövlət ittihamının müdafiəsində peşəkarlığın yüksəldilməsi, habelə prokurorluq işçilərinin sosial müdafiəsinin gücləndirilməsi və prokurorluğun maddi-texniki təminatının yaxşılaşdırılması üçün hərtərəfli zəmin yaradılıb.

Tədbirdə Elm-Tədris Mərkəzinin rəisi Nazir Bayramov, müraciətlərə baxılması idarəsinin rəis müavini Aynur Osmanova, Baş Prokuror yanında Korrupsiyaya Qarşı Mübarizə Baş İdarəsinin təşkilati və informasiya təminatı idarəsinin rəisi Orxan İsayev çıxış edərək müstəqillik illərində prokurorluq orqanlarında həyata keçirilmiş tədbirlər, prokurorluğun fəaliyyətinin konkret sahələri üzrə məlumat veriblər.

Konfransda Baş Prokurorluğun nəfis şəkildə hazırladığı “Müstəqil dövlətin müasir prokurorluğu” kitabının təqdimatı olub.

Baş Prokurorluğun hüquqi təminat və informasiya idarəsinin rəisi Natiq Hüseynov prokurorluq orqanlarının fəaliyyətinin bütün istiqamətlərinə və sahələrinə dair ətraflı məlumatın təqdim olunduğu kitab barədə tədbir iştirakçılarına ətraflı məlumat verib.

Dövlət orqanlarının və qeyri-hökumət təşkilatlarının nümayəndələri çıxışlarında müstəqillik illərində Azərbaycanın əldə etdiyi nailiyyətlərdən, o cümlədən prokurorluq orqanlarında həyata keçirilən islahatlardan danışıblar.