CƏMİYYƏT
“Azərbaycanın gənc dostları” Beynəlxalq Klubunun sıraları genişlənib
Bakı, 12 avqust, AZƏRTAC
“Multikulturalizm Azərbaycanda həyat tərzi kimi: milli və dini dəyərlər” adlı III Beynəlxalq multikulturalizm məktəbi layihəsi çərçivəsində yaradılan “Azərbaycanın gənc dostları” Beynəlxalq Klubu sıralarını genişləndirib.
Bakı Beynəlxalq Multikulturalizm Mərkəzinin mətbuat xidmətindən AZƏRTAC-a bildiriblər ki, III Beynəlxalq multikulturalizm məktəbində iştirak edən Litva Pedaqoji Universitetinin magistrantı Salomeya Lukaite və Yunanıstan Amerikan Kollecinin tələbəsi Dimitrios Asproulisin öz təşəbbüsləri ilə yaratdıqları “Azərbaycanın gənc dostları” Beynəlxalq Klubunun üzvlüyündə indiyədək Azərbaycanda təşkil olunan beynəlxalq multikulturalizm məktəblərinin xarici tələbələri, eləcə də 13 xarici ölkədəki universitetlərdə Azərbaycan multikulturalizmi fənninin tədris olunduğu fakültələrin dinləyiciləri təmsil olunacaq. Bu klub üzvü olan hər bir xarici gənc üçün Azərbaycanda təhsil imkanları yaratmağı, ölkəmizlə bağlı aparacaqları tədqiqatlarda onlara yardımçı olmağı, Azərbaycan dilinin və mədəniyyətinin öyrənilməsində hər bir üzvə kömək etməyi nəzərdə tutub. “Azərbaycanın gənc dostları” Beynəlxalq Klubunun yeni fəaliyyətə başlayan internet saytı (www.youngfriends.az) beynəlxalq gənclər auditoriyasının diqqətini cəlb etməkdədir.
Sentyabrın sonlarında “Azərbaycanın gənc dostları” Beynəlxalq Klubunun yaradıcıları Salomeya Lukaite və Dimitrios Asproulis Yunanıstan Amerikan Kollecində klubun təqdimatını edəcəklər. Təqdimat zamanı kollecin tələbələrinə Beynəlxalq Klubun məqsəd və vəzifələri açıqlanacaq, eyni zamanda, onlara Azərbaycanın multikulturalizm modeli, Bakı Beynəlxalq Multikulturalizm Mərkəzinin (BBMM) yay və qış məktəbləri layihəsi ilə bağlı ətraflı məlumat veriləcək. Təqdimat mərasimində “Azərbaycanın gənc dostları” Beynəlxalq Klubunun Himayəçilər Şurasının üzvü, ABŞ-dan olan müstəqil jurnalist və analitik Peter Teys de iştirak edəcək.
Beynəlxalq Klubun yaradılması ilə bağlı fikirlərini bölüşən Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, BBMM-in Himayəçilik Şurasının sədri, akademik Kamal Abdullayev bildirib ki, yay və qış multikulturalizm məktəblərinin keçirilməsi Prezident İlham Əliyevin ideyasıdır və dövlətimizin başçısının arzularından biri də Azərbaycanın gənc vətəndaşlarının xaricdə intellektual dostlarının sayının artmasıdır. Dövlət müşaviri “Azərbaycanın gənc dostları” Beynəlxalq Klubunun yaradılması xəbərini dostları, həmkarları ilə bölüşdüyünü və onların bu xəbəri yüksək sevinclə qarşıladığını qeyd edib, klubun fəaliyyətinə son dərəcə böyük ümidlər bəsləndiyini diqqətə çatdırıb.